Capitains Nemo

Et broche le cheval,cele part est alés .
Li jaians estoit lons,si n''estoit pas armés ;
Et li enfes le fiert par si ruiste fierté

[ fol. 0104 ]

Par desus les espaules li a le chief copé
Que le bu et les jambes fait voler ou fossé,
Et la teste a ensamble à .I .perron hurté .
Et dist le cuens Bertrans :«Çà me randés les clés,
«Que je serai portiers por la porte garder .
«Il le m''est eschéu ;mon cheval m''a tué .
-Seignor,ce dist dist l''enfes¹ Guis,envers moi entandés :
«Vos demorrés vos .V .por la porte garder,
«Et nos .V .en iron à Huidelon parler .»
Et cil ont respondu :«Si com vous commandés .»
Cil Sires les conduie qui en crois fu penés !
Que,ainçois qu''il soit vespres ne solaus esconsez,
N''i vodroit li mieudre estre por l''or de .X .cités .

EL palais en monterent tuit li .V .mesagier ;
Les escus devant eus,tienent les brans d''acier .
L''enfes Guis de Borgoigne les prist à araisnier :
«Seignor,or escoutés :je pallerai premier ;
«Trestuit coi vous taisiés,faites pais,si m''oiés ;
«Selonc ce que dirai,pansés de l''esploitier .»
Et li baron respondent :«Biaus sire,volentiers .»
Huidelons l''orguilleus est ou palais plenier .
Vestus estoit li rois d''un vermeil paile chier,
A bendes de fin or par les costes vergiés .
.I .chapel de bonnet ot li glous en son chief,
Sa barbe li baloie jusc''au neu du brayer .
Par desus les oreilles ot les grenons treciez,
Et le baston d''or fin el haterel lacié .
Desus le faudestuef faldestol² se sist li rois prisiés ;
.I .eschamel d''argent ot li rois à ses piés .
Et tenoit .I .baston qui fu à or vergiés,
.XLV .aniaus i pendoient mult chier,
A or et à baricles ert li baston liez .
Quant le fiert sor la table,oiant ses chevaliers,

[ fol. 0105 ]

Trestout fait le palais fremir et gresloier .
«Seignor,fait Huidelons,fetes pais,si m''oiés :
«Karles est en Espaigne,li fors rois droituriers ;
«Tous avés nos chastiaus et nos bours essilliez,
«Et ocis nos enfans qu''erent de nos moilliers .
«Primes,conquist Bordele au fer et à l''achier,
«Et prist Ais en Gascoigne,qui fu Forré le viel,
«Et si prist Monjardin,il est si chevalier .
«Estorges et Navare nos ont fait peçoier,
«Et s''a fait une ville estorer à Pamers .
«El boschet de Vaucaire corurent li forier .
«Prist le Groing et l''Estoile,Pampelune le fié,
«Forscasés Carion nos a mis au derrier .
«Il a près de .VII .ans que de Nobles partié,
«Quant ala à Luiserne,où il encore siet ;
«.VII .anz i a ja sis,mult li doit anoier .
«Or me dout à merveilles certes dou repairier,
«Que Karles me het plus que nul home sos ciel,
«Et,se il me puet panre,fera moi detranchier .»
Et li enfant monterent sus ou palais plenier ;
Les escus devant eus,tienent les brans d''acier .
N 'an sot mot Huidelons,il ne si chevalier,
Si vit le roi Guion devant lui apoier ;
Gentement le salue,à guise d''ome fier :
«Cil Damediex de gloire qui tot a à jugier,
«Et en la sainte crois se laissa travillier,
«Il saut et benéie le roi Karle au vis fier,
«Et garisse de mort Rollant et Olivier
«Et Sanson de Borgoigne et Naime de Baivier,
«Et puist ton cors honir,confondre,vergoignier !
«Je sui hons Karlemaine,le fort roi droiturier ;
«Par icel saint apostre que quierent chevalier,
«Se je te voi movoir ne les mains ne les piés,
«Je te ferai la teste voler an ce foier .»

[ fol. 0106 ]

Quant Huidelons l''entent,n''ot en lui c''aïrier ;
Où que il voit ses homes,ses prent à araisnier :
«Diva,fait il à eus,c''avés fait del portier
«Qui me gardoit ma porte vers tos ceus desos ciel ?
«Il a mort de François assés plus d''un millier .
-Sire,dist .I .paiens,li a le chief tranchié,
«Par Mahomet,biax sire,.I .de ces mesagiers .»
Quant Huidelons l''entent,le sens quide changier .

APRÈS Guion parla Bertrans,li fils Naimon ;
Fierement salua le paien Huidelon :
«Cil Damediex de gloire qui Longis fist pardon,
«Et suscita de mort le cors saint Lasaron,
«Marie conforta en la maison Simon,
«Et,si comme Diex,fist à la dame pardon,
«Si gart et benéie l''emperéor Karlon,
«Et Naimon à la barbe,et Ogier et Sanson,
«Rollant et Olivier,le barnage Guion,
«Huidelon,toi confonde et doinst maléiçon !
«Je sui hon Karlemaine o le flori guernon ;
«Si te mande par moi (por coi le celeron ?)
«Que li rant Montorgueil et le regne environ .
«La tour de Montesclair avoc te demandon,
«Et se ensi nel fais com nos te devison,
«Et Karles te puet panre,ja n''auras raençon
«Que ne te face mettre el col le chéaignon ;
«Plus haut te fera pendre que nul autre larron .
«Par icel saint apostre c''on quiert an pré Noiron,
«Par poi que ne t''arache la barbe et le guernon,
«Ou que ne te porfent de ci qu''ens el menton .»
Il volt passer avant sans nule arestoison .

Gui de Bourgogne

Geste