Capitains Nemo

Jal ferist de l''espée,qui pallast ne qui non ;
Mais l''enfes de Borgoigne le saisi au giron,
Ariere le sacha,que mult ert gentils hon .

[ fol. 0107 ]

Quant Huidelons l''entent,ne dist ne o ne non .

ESTOUS,li fils Oedon,n''i volt plus arester,
A sa vois qu''il ot clere commença à crier :
«Huidres de Montorgueil,ne te quier à celer,
«Laissié ont du mesage,més je t''an voil conter
«Canque mes sires Karles m''en daigna commander .
«Trestous premiers te mande,ne te quier à celer,
«Que li rens Montorgueil,qui tant fait à loer,
«Il te fera en fons bautisier et lever,
«Si te randra ta terre maintenant à garder ;
«Et se ce ne veus faire,d''el te covient paller .
«Fai dont une grant boursse entor ton col noer,
«Et,par non de servage,li venras aporter,
«Et fai .IIII .deniers en la boursse poser ;
«Et se tu ci nel fais com tu m''os deviser,
«Et Karles puet ton cors ne tenir ne combrer,
«Il te fera ou col une grant hart noer,
«A la queue d''une yve te fera traïner .
«Mais cele blanche barbe qui tant fait à loer,
«Où je voi cel or pendre et ces botons posez,
«Véistes onques chien que tant soit deschirés
«Qu''il ne se muet des mousches garantir ne tenser ?
«En icele maniere les te fera oster,
«Puis fera les grenons et ardoir et bruller,
«Après,fera ton cors laidement traïner .
«Mult est ore grans hontes que tant nos fais pener .»
Par poi que nel feri de son branc d''acier cler ;
Mais il se porpensa qu''il le lera ester,
Que miels veut que commencent Sarasin et Escler .
Quant Huidelons l''entent,color prist à muer,
Mais plus n''en osa faire que le chief a crollé .

TORPINS,li gentils clers,s''est .I .poi avanciés,

[ fol. 0108 ]

Où qu''il voit Huidelon,si li prist à huchier :
«Huidres de Montorgueil,à celer nel vos quier,
«Je suis hons Karlemaine,qui tant fait à prisier ;
«En ces illes de mer t''a ci adès laissié,
«Ne dois pas Montorgueil ne tenir ne bailler .
«Or li rans Montorgueil,qu''il le te mande et quiert,
«La tour de Montesclair,qui tant fait à proisier ;
«Et se tu si nel fais com devise li briés,
«Et Karles te puet panre,mors ies et trebuciés .
«Il te fera la teste fors du bu rooigner
«Et arracher du cors et les mains et les piés ;
«Chastel ne seignorie ne t''i aura mestier .
«Et si fera tes fils trestous vis escorcier,
«Après,si les fera en un fu graeillier,
«Et si fera ardoir ta cortoise moillier,
«Ou au meins les mameles de son cors arrachier .»
Quant Huïdres l''entent,le sens quide changer .
Il en a apelé trestous ses chevaliers,
En latin lor a dit :«Armés vos,franc guerrier,
«Certes,s''il vos eschapent,mal somes engignié .»
Et cil li respondirent :«Biaus sire,volentiers .»
En une maison entrent li gloton pautonier,
Et vestent les haubers,s''ont les hiaumes laciez,
Et si cheignent espées,si retornent arier .
Quant Huïdres les voit,onques ne fu si liés .
«Par mon chief,dist Torpin,mal somes angignié .
-Voire,ce dist Estous,pensons de l''esploitier ;
«Miels vaut que nos assaillent que l''aions commancié .»
L''enfes Guis de Borgoigne s''est .I .poi avanciez,
Et va ferir Puillart,qui fu fils Aucipier ;
La teste en fet voler devant lui el foier,
Et le bu et les jambes verser ens el braier .
Turpins li archeveskes va .I .autre paier,
De ci que es espaulles li fait coler l''acier .

[ fol. 0109 ]

Bertrans,li fils Naimon,reva ferir le sien ;
Une grant toise longe li fit voler le chief .
Estous,li fils Oedon,n''a soing de menacier,
Savari de Toulouse pense dou chaploier .
Icil Sires les gart qui le mont doit jugier !
Que il,einçois qu''il voient le soleil abaissier,
N''i vaudroit li mieudre estre por l''or de Monpellier .

MULT fu grans li estours sus el palais mellez .
L 'enfes Guis de Borgoigne s''i est bien esprovez,
Et Bertrans et Turpin,Estous et Gilemer .
Bien se contint li rois en guise de sengler :
De l''angoisse qu''il ot prist tous à tressuer,
Chascune fois escrie :«Monjoie !car ferés !»
Cil les ont entandus qui là val sont remez .
«Seignor,dist Auberis,envers moi entandez :
«Certes,j''oi moult grant noise sus el palais pavé ;
«Par le mien enciant,il se sont ja mellé .
«Car lor alons aidier,franc chevalier menbré .»
Et cil li respondirent :«Ce fait à créanter .»
Il ont fermé les portes,si ont les pons levez,
Que léans n''en entrassent Sarazin ne Escler .
Sus el palais en montent touz les degrés pavez ;
Les escus devant aus,traient les brans letrés .
Quant il voient paiens,sis ont haut escriés :
«Fil à putain gloton,certes n''i garirés .»
Quant Sarasin l''entendent,ses ont mult redotés ;
Car il quident sans faille plus an i ait assés .
Nes oserent atendre,en fuies sont torné,
Et saillent tuit à terre ens enmi le fossé .
Ains qu''il viegnent à terre ont il les cuers crevés .
Huïdes l''orguilleus est en fuies tornés ;

Gui de Bourgogne

Geste