Capitains Nemo

Que .XII .liues grans nes convenist errer .

Karles se regarda et vit François plorer,
Lor enfans et lor femes durement regreter .
«Baron,dist l''emperere,grant duel vos voi mener ;
«Je ne m''en mervoil mie,trop vos poez pener .
«Qui or s''an veut en France ariere retorner,
«Je lor doins bon congié,je ne lor puis véer ;
«Mais une chose voil que sachent de verté :
«Par la foi que je doi sainte crestienté,
«Il et touz ses linages sera sers racheté,
«Touz les jors de sa vie sera il sers clamé .»
.IIIIm .et .VIIc .en sont de l''ost torné,
Gascoins et Angevins,ains n''an i ot .I .d''el .

[ fol. 0055 ]

Et Karles l''emperere les a tous anbrevez ;
Ileuc furent li sers premerain contrové .²
L''ost se est aroutée,si pensent de l''errer .
Tant chevauchent par vaus et par puis et par prez,
Par pluies,par orés,par bel tans et par cler,
Tant que il sont venu à Luiserne sor mer .
Si l''a Karles asisse le premier jor d''esté,
Puis i fu il .VII .ans c''onques n''i pot entrer .
Et li enfant de France se furent aüné,
.L .et .IIIIm .à Paris la cité,
En la greve de Saine venu et aüné .
Bertrant,li fils Naimon,a premerains parlé .
«Seignor,ce dist Bertrant,or oez mon pansé :
«Karles est an Espaigne,o lui son grant barné ;
«Il a .XXVII .anz acomplis et passez
«Qu''il anmena les peres qui nos ont angendrez .
«Or nos ont tant nos meres et couchiés et levez,
«Merci Dieu,que nos somes chevalier adoubé .
«Car faisons roi en France,se vos le commandez,
«A qui nos clamerons et du bien et du mel,
«Et de qui nos tandrons totes nos heritez ;
«Se nos nos mellions,ce seroit grans viltez .»
Et cil li respondirent :«Si com vos commandez .»
«Seignor,ce dist Bertrant,il nos convient jurer
«Celui que nouz voldrons faire roi coroné
«Que se il le desdit,le chief aura copé .»
Et cil li respondirent :«Ce fait à créanter,»
.L .et .IIIIm .qui tuit furent sené .
«De qui ferons nos roi ?»dient li bacheler .
A une part se traient li .VII .des plus aisnez,
De tous les plus haus homes,du miels anparantez .
«Seignor,ce dist Bertrant,or avons nos juré ;
«Foi que doi saint Denis,j''en dirai mon pansé :
«Vés Sanson de Borgoigne,qui gentils est et ber,

[ fol. 0056 ]

«S''a la serour Karlon,le fort roi coroné,
«Et si en a li dus .I .vallet angendré ;
«N''a pas encor .I .an que il fu adobé :
«Car fesons celui roi,se vos le commandez .
«Se revient l''emperere ariere en son rené
«Et il trueve celui que l''aions coroné,
«Il ne l''ocira mie,de son linage est né .
«Et se il ne revient,si aura l''erité ;
«Car nos ne volons mie Karlon deseriter .»
Et li enfant respondent :«Bien l''avez commandé .»
A icele parole ont l''enfant apelé .
«Sire Guis de Borgoigne,dist Bertrant,çà venez ;
Premerain i vint Gui,le fiz al duc Sampçon ;
Après i vint Bertran,le fiz al duc Neimon,
Berard de Muntider,fiz Terri le baron ;
S''i vint Estus de Lengres,le fiz al duc Odon,
E Gefrei l''Angevin,le fiz à Salemon,
E le fiz Angeler,Savari le Gascon ;
E s''i fu Albers,fiz Basin le Burgoinon ;
Le fiz Richard i fu,ki ot nun Terrion ;
S''i fu le fiz Ivoire d''Ivorie,Haston,
E le fiz Anséis ;s''i fu le fiz Huon ;
S''i fu le fiz Gerin,Gerin sun compainon .³
Tut li meillur i vindrent et de plus grant renon .
«Ke nus tendra en France en pes et à reson :
«Ja ne valt un réalme san segnor un boton .»
Et li enfant dient :«Et nos ben l''otréum .»
Un des fiz Guenelon s''en est en pez levez ;
Maucion ot à nun,si fu li fiz mainés .
Grant fu e parcréu,si ot pendant le nés,
Si ot la barbe rousse,et fu molt lonc et lez .
«Bertran,dit Maucion,certes ben dit assez :
«Si l''em feit rei en France,je m''en sui presentez,
«Si demant la corone,ke vos la me donez .
«Si de mei feites rei,grant honur en aurez,
«Kar vos serrez por mei enhaucé et amez .
«Baruns,je seie reis,si vus lecomandez ;
«Molt ert bien enploïe en mei la realtez,
«Kar je sui gentils hom e de grant parentez :
«Alorin est mi niep,e mun cosin Hardrez,
«Et Richart mun parent e Focher le barbez,
«Et Isoart li jesnes e Brihan li einnez,
«Malveisin e Malingres,et Miles et Forrés .
«Ne sai ke plus en die ;trop sui enparentez .
«E si est mun pere Guenes,k''od Karlon est alez ;
«Sa serur od a femme,si ke ben le savez :
«Pur ce dei en France estre haltement coronez .»
E dit Estus de Lengres :«Trop vos estes hastez ;
«N''atendistes pas tant ke fussez apelez .
«Maucion,teisez vos ;n''en déussez parler .»
«Si demand la corone,je la ruis à vos tuz ;
«Si d''altre fetes rei,ja n''ert si gentils homs
«Je n''en prenge la teste par desuz le mentons .»

Gui de Bourgogne

Geste