Capitains Nemo

Quant Huidelon le voit,.I .souspir en gita :
«Amis,menjas tu hui ?nel me celer tu ja .
-Naie,sire,dist it,par mon chief,tiers jors a .»

[ fol. 0116 ]

Quant Huidelon l''entent,forment en sospira,
Mahon et Apolin hautement an jura,
Ainçois que coup i fiere,que assés en aura ;
Et quant Guis l''entandi,forment l''an enclina .

HUIDELON l''orguilleus fu chevaliers membrés ;
Son seneschal apele :«Sinagon,çà venés :
«Une blanche toaile meintenant m''aportés
«Et plain henap de vin et .I .pain buleté .»
Et cil li respondi :«Si com vos commandés .»
Et Huidelon li fait .I .poon aporter ;
Il méismes ses cors li vait l''eve doner .
Tant a mené Guion qu''il l''asiet au disner .
L''enfes vit la vitaille,s''a tandrement ploré,
Diex de si riche cuer se prist à porpanser,
A sa vois,qu''il ot clere,commença à crier :
«Ja Damedieu ne place,qui le mont doit garder,
«Que je après cestui doie dantée avaler
«Tant que mi compaignon en aient à planté,
«Qui sont an cele tor là dedens anserré .»
Quant Huidelon l''entent,si a le chief crollé,
Et dist à l''autre mot :«Il en auront assés .»
Tant lor fait de vitaille sus el palais porter
Que .XXX .chevaliers an éussent assés ;
Et l''enfes Guis menja,que mult l''ot desiré .
Tot menja le paon et le pain buleté,
Et si but tot le vin qui estoit ou boucler .
Sarasin et Persant l''en ont mult regardé,
Et dist li uns à l''autre :«Por Mahomet !véés :
«Tant par a cil François et pain et vin usé
«Que .IIII .chevaliers an éussent assés .
-Fil à putain gloton,ce dist Huidres li ber,
«Il est bons chevaliers,il est bien anpliés,
«Il n''en a .I .meillor en la crestienté

[ fol. 0117 ]

«Hom qui si bien menjue ne fera ja lasté .»
Quant l''enfes ot mengié,sor ses piés est levés,
Et Huidelon li fet ses armes aporter .
Et li anfes s''adoube sans point de demorer .
Il a vestu l''auberc,si a l''iaume fermé,
Et a ceinte l''espée au senestre costé .
Huidelon en apele Sarasins et Esclers :
«Baron,dist Huidelon,à moi en entandés :
«Se je lais cest enfant ce bon cheval mener,
«Mes fils li ocira,je le sai de verté ;
«Mais j''en ai là jus .I .bauçant et poumelé,
«Celui li chargerai,se vous le me loés .
«Se mes fils li ocist,c''en est la verités,
«Je n''an seroie mie demain einsi blasmés .»
Et Sarasin escrient :«Mult avés dit que ber .»
Huidelon li a fait le cheval amener,
Et par devant l''enfant l''a fait bien anseler ;
L''enfes Guis i monta par le senestre lé .
Huidelon li bailla son fort escu bouclé ;
Il méismes ses cors li a au col posé,
Puis li baille .I .espiel dont li fers fu quarés,
A .III .clous de fin or li gonfanons fermés .
Et Huidelon apele del miels de ses privés :
«Là aval en la place cel enfant me menés,
«Gardés que il n''i soit ledengiés ne blasmés,
«Que,par icelui Dieu à qui me sui donés,
«Si vos li dites riens qui ne li soit à gré,
«Chascun de vos ferai tous les membres couper .»
Et Sarasin s''escrient :«Ja n''an estuet douter,
«Nous ne li dirons chose qui ne li soit à gré .»
En la place l''enmoinent tot fors de la cité .
Sarasins et Persans le keurent esgarder,
Et dist li uns à l''autre :«Véés com bel armé !»
De ci que en la place ne se sont aresté .

[ fol. 0118 ]

Sous .I .arbre s''esturent où lor fu commandé,
Et l''enfes Guis s''apuie sor son arçon doré .
Damedieu reclama,le roi de majesté :
«Glorious sires peres,qui te lessas pener
«Dedens la sainte crois por ton pueple sauver,
«Garissiés hui mon cors de mort et d''afoler,
«Qu''encor puissons véoir Karlon et son barné .»
A icele parole a tendrement ploré,
Et li viels Huidelon a Danemont mandé .

HUIDELON l''orguilleus a mandé son enfant,
Et il i est venu tost et isnelemant .
Quant Huidelon le voit,si li dist maintenant :
«Biaus fils,or perc ma terre et tot mon tenemant
«Et trestout mon roiaume,se tu ne le desfant .
«Çaiens vindrent François par lor grant herdimant,
«Si les i anvoia Karles,li rois des Frans ;
«Ma terre me roverent et tot mon chasemant,
«De mesdit et d''anui me firent .I .presant,
«Et quistrent tel orgueil,(que l''iroie celant ?)¹
«Que les fis assaillir à la paienne gant ;
«Mais il se desfendirent com chevalier vaillant,
«Mon palais me tolirent et tot mon tenemant,
«Traïteur m''apelerent ;que l''iroie celant ?
«Mès j''en ai pris bataille vers .I .d''aus seulemant,
«Sol à sol,par ton cors,par armes voirement .
«Si mes Diex ne m''aïde,livrés sui à torment ;
«Tote perdrai ma terre,jel sai à esciant .»
Et Danemont respont :«Grans mercis vos en rant .
«Par Mahomet,mon dieu,où ma créance apant,
«Teus .X .en ociroie par mon cors seulemant .»

Gui de Bourgogne

Geste