Capitains Nemo

Et li espiel sont roide qu''il ne sont pas froé .
Par tel vertu les portent li destrier abrievé

[ fol. 0122 ]

Que les cengles rompirent,ne porent plus durer,
Et seles et estrier refirent autretel .
Par deseure les croupes des destriers sejornés
Se sont li dui baron à la terre porté,
Si que li cuing des hiaumes sont ensamble hurtés,
Et andeus les escus lor sont des cous volés .
De l''angoisse qu''il orent sont il andui pasmé .
Ains péust on mult bien une grant liue aler
Que li uns ne li autres se péust remuer .
Cil de la tour le voient,mult en sont esfréé :
«Par mon chief,dist Bertrans,grans cous se sont doné .»
L''archevesque Turpin a Huidre escrié :
«Biaus sire,à refaire est ;por Dieu de majesté,
«Faites les remonter par vostre loiauté .
-Par foi,dist Huidelon,je l''otroi et le gré .»
Lors broche le cheval,cele part est alés,
Et li .VII .chevalier qui o lui sont remés .
Il descendent sor l''erbe des destriers sejornés .
Huidelon les a fait en la place amener
Et le destrier Guion refait estroit cengler,
Le destrier Danemont refait bien anseler .
Atant sont li baron revenu de pasmer .
«Sainte Marie Dame !»dist Guions li senés .
Il fist crois sor son front,à Dieu s''est commandés,
Et Huidelon li fet son destrier amener,
Et li anfes i monte sans plus de demorer .
Et Huidelon li fait son escu aporter,
Puis saisi .I .espiel dont li fers fu quarés .
Et Danemons remonte,qui gentils est et ber .
A sa vois,qu''il ot clere,commença à crier :
«Par Mahomet !mon Dieu,trop avons demoré ;
«J''en déusse ore avoir teus .XIIII .tués .
-Se Dieu plaist,ce dist Guis,quant vos m''eschaperés,
«Si ert aparissant comment vos le ferés .»

[ fol. 0123 ]

L''archevesques Turpin s''est en haut escriés :
«Sire Guis de Borgoigne,or vos doit remembrer
«De Sanse vostre pere,qui gentils est et ber,
«Que onques ne véistes an trestout vostre aé ;
«Et se vos bien nel faites,jamès ne le verrés .»
Quant l''enfes Guis l''entent,li cuers li est levés ;
lors Lores¹ ne doutast il .IIII .rois coronés Turcs defaez² .
Où qu''il voit Danemont,cele part est alés .

OR furent li baron sor les chevauz de pris .
Il baissierent les lanches as gonfanons de pris,
Et brochent les chevaux,qui furent ademis .
Merveilleus cous se donent es escus d''asur bis ;
Jamès de si fort joste n''orra parler marchis .
Les lanches sont brisies,ne porent plus soffrir,
Tot contreval les chans en volent li esclis .
Par tel vertu les portent li bon cheval braidis
Des escus de lor cous se fierent ens es pis,
Que regnes et enarmes firent tot desartir .
De ci jusqu''es espaulles sont des cous estordis ;
Nis li oeil de lor testes lor furent esbloïs,
Ains éussiés alé .II .arpens et demi
Que l''uns ne set de l''autre quel part il est guencis .
L''enfes Guis de Borgoigne fu mult amanevis,
Mervilleus cop li done en l''escu d''asur bis,
Que les flors et les pierres an fist aval saillir .
La coiffe li trancha du blanc hauberc treslis ;
Se ne fust la cuirie que li Turs ot vesti,
Tot l''éust porfandu contreval jusqu''el pis .
Por quant si l''a du cop encombré et aquis
Sor le col du destrier li fist les dens venir ;
Li arçons de la sele est froissiés sor son pis .
Contreval vers senestre est li bons brans gancis,
Amont desus l''espaulle a l''auberc consuï,

[ fol. 0124 ]

Plus de .IIIIc .mailles,où fu li ors sartis,
En a fait defauser,si com dist li escris .
Li chevaus s''agenoille,ne pot le cop sosfrir,
Si qu''en l''erbe du pré li musiaus an feri ;
Et quant il sailli sus,si fu tous esfréis,
Teus .IIII .arpens galope parmi le pré flori
Que ne sot Danemons quel part il dut gancir .
L''enfes Guis li escrie :«Deçà vous ai senti ;
«Pansés de l''aleger,vous avés avant pris .»
Cil de la tour l''entendent,et chascun en a ris .

QUANT li rois Danemons sent que cil l''a feru,
Et Huidelon ses peres avoit le coup véu,
Bien set cil de la tor en ont grant joie éu ;
Plus li est de la honte que de l''ahan ne fu .
Il broche le destrier,sore li est coru,
Où que il voit Guion,ne li rent nul salu,
Ains li a escrié par mult ruiste vertu :
«Par mon chief,dans vassaus,grant cop m''avés feru ;
«Se je,ainçois le vespre,ne vous ai confondu,
«Jamès ne soit pucele qui me tiegne à son dru .»
Il broche le cheval,plus n''i a atandu,
Mervillous cop li done desor le hiaume agu
Amont es maistres quares,qui à or fu batu .
La coiffe li trancha del clavain qui bons fu ;
Se ne fust li ganbais que l''enfes ot vestu,
Et la force de Dieu,c''on apele Jhesu,
Et les bones prieres où l''archevesques fu,
Jusqu''el neu du braier l''éust tot porfandu .
Por quant l''a si du cop chargié et confondu
Sor l''arçon de la sele l''a envers abatu,
Et li trança tout outre le quartier de l''escu .

Gui de Bourgogne

Geste