Gui de Bourgogne

Geste

Gui de Bourgogne: Numérisation de l'édition de Guessard de 1858 sous la direction de Jean-Baptiste Camps édition numérique Alice Cochet , , éd. par François Guessard , Henri Michelant , Gui de Bourgogne: Chanson de geste P. Jannet Paris 1858 F. Vieweg Paris 1859

  1. Sor destre regarderent parmi .I .prè flori,
  2. Choisirent l''ost Guion,le chevalier de pris,
  3. Virent les trés de soie yndes,vermaus et bis,
  4. Virent les aigles d''or dont reluist li païs .
  5. Et quant ce vint dus Naimes,entendés envers mi,
  6. L''enfes Guis de Borgoigne s''est levés par matin,
  7. Vers destre se regarde,vit les barons venir,
  8. Quida que ce fuïssent paiens et Sarasins .
  9. Bertrant le mesagier à apeler an prist :
  10. «Amis ce li dist Guis :«Entendés envers mi :
  11. «Je voi ici vers nos mult fiere gent venir ;
  12. «Car prenés de vos homes de ci à .XVm .:
  13. «Ce seroit mult grans hontes s''estïons si sopris .
  14. -Mult volentiers,biaus sire »,dist Bertrans li marchis .
  15. A icele parole est sus ses piés saillis .
  16. Quant il vit les vieus homes,si a gité .I .ris ;
  17. Où que il voit Guion,si li dit à haus cris :
  18. «Si m''aït Diex,dist il,or poés estre fis
  19. «Que durement vos aime Karles de Saint Denis ;
  20. «Véés :des meillors homes de trestot son païs
  21. «Il vos envoie querre ;je le sai tout de fi .»
  22. -Hé Diex !ce dist li enfes,or t''an ran ge mercis,
  23. «S''or i estoit li pere dont sui angenoïs .»
  24. Et Bertrans li respont :«Par mon chief,si est il .
  25. -Amis,ce dist li enfes,faites le moi véir .»
  26. -Sire,ce dist Bertrans,tout à vostre plesir :
  27. «Vés le là tout devant,à ce pelichon gris,
  28. «A cele blanche barbe qui li gist sor le pis,
  29. «Et li autres,dus Naimes,o le guernon flori,
  30. «Et li autres après,li Ardenois Tierri,
  31. «Qui est peres Berart,que vous véés ici ;
    32. [ fol. 0135 ]
  32. «Et li autre sont pere as damoisiaus de pris
  33. «Que faites ostoier an estrange païs .»
  34. Quant li enfant l''entendent,si crient à haus cris :
  35. «Sire Guis de Borgoigne,frans chevaliers gentis,
  36. «Lai nos aler nos peres besier et conjoïr .»
  37. Quant l''enfes Guis l''entent,si jura saint Denis :
  38. «N''i a .I .seul de vous qui tant soit de haut pris,
  39. «S''il se fait à son pere connoistre ne véir,
  40. «Que ne li face ancui le chief du bu tolir .»
  41. Quant li enfant l''entendent,es les vos esfréis ;
  42. Lors maudient tuit l''eure que Guis si longes vit .
  43. «Seignor,dist Huidelon,entendés envers mi :
  44. «D''ont sont cil chevalier dont vos menés tel cri ?
  45. -Biaus sire,il sont de France,de cest nostre païs ;
  46. «Or ne vous poist il mie se les alons véir ?»
  47. Et Huidelon respont :«Par mon chief,non fait il .»
  48. A iceste parole se sont as chevaus pris,
  49. Encontre les vieus homes sont à la voie mis .
  50. L''enfes Guis de Borgoigne les a à raison mis :
  51. «Seignor baron,dist il,bien puissiés vous venir !»
  52. Et dus Naimes respont,qui ot le poil flori :
  53. «Seignor,Damediex puisse les vos cors benéir !
  54. «Li quels est rois de France ?bien le poons véir ?
  55. -Par mon chief,ce dist Guis,il vous sera bien dit .
  1. -SEIGNOR,ce dist dus Naimes,envers moi entandez :
  2. «Li quels est rois de France ?gardés nel me celés .
  3. -Par mon chief,ce dist Guis,bien vos sera mostré ;
  4. «Vous vanrois avec nous là dedens,en son tré .»
  5. Et cil li respondirent :«Si com vous commandez .»
  6. A icele parole se sont acheminez .
  7. L''enfes Guis de Borgoigne s''an est avant alés,
  8. Et Bertrans et Berart,Torpins et Gilemers .
  9. Lors s''est li enfes Guis gentement conréés :
    10. [ fol. 0136 ]
  10. .I .mantel sebelin a à son col geté,
  11. .I .chapel de bonet li ont el chief posé ;
  12. Sor .I .faudestuef monte,qui d''or fu esmeré,
  13. .I .bastoncel a pris en sa main par fierté .
  14. Atant es les barons qui descendent el tré,
  15. Trestuit communalment en sont dedens antré,
  16. Puis se sont tuit assis belement par les trés .
  17. Mais Naimes de Baiviere est sor ses piés levés,
  18. Son mantel laist chaoir,qu''il avoit afublé,
  19. Le chapel de bonet a de son chief osté .
  20. Sa barbe li baloie jusc''au neu del baudré,
  21. Par deseur les oreilles ot les guernons tornez ;
  22. Mult resamble bien prince qui terre ait à garder .
  23. Où que il voit Guion,si l''a haut salué :
  24. «Cil Damediex de gloire qui meint en Trinité,
  25. «Il saut le roi de France et son riche barné !»
  26. Et Guion li respont :«Diex vos croisse bonté !»
  27. Quant l''entent li dus Naimes,s''a tendrement ploré ;
  28. Bel et cortoisement a l''enfant apelé :
  29. «Sire,ce dist dus Naimes,por Dieu de majesté,
  30. «Levés vos en de ci,venés à moi parler .
  31. -Sire,ce dist li enfes,volentiers et de gré .»
  32. A icele parole issirent fors del tré .
  33. Ains n''i ot chevalier de si haut parenté
  34. Qui léans avoc aus i fust onc apelés .
  35. «Sire,ce dist dus Naimes,or ne vos soit celé,
  36. «Je vos conjur de Deu,le roi de majesté,
  37. «Et de la sainte crois en coi il fu penés,
  38. «Te pri ge et requier que me dies vertez .
  39. -Par saint Denis,dist Guis,bien m''avés conjuré ;
  40. «Mais,par cele corone dont il m''ont queroné,
  41. «Que à Paris me mistrent el chief estre mon gré,
  42. «Se vos me dites chose dont me doie peser,
  43. «Je vos ferai la teste fors du bu desevrer .
    44. [ fol. 0137 ]
  44. -Par mon chief,ce dist Naimes,dont nos covient garder .
  45. -Voire,ce dist li anfes,se vous tant vos amés .