Capitains Nemo

Mais lor nom ne lor sont changié ne remué .
Bien furent .XVm .esléu et nombré
Qui tuit por Huidelon pristrent crestienté .

QUANT or fu Huidelon levés et batoiziés,
Et si fil ambes .II .et tuit si chevalier,
Bien les puet on nombrer à plus de .XX .milliers .
Huidelon l''orguelleus a Guion araisnié :
«Sire,dist li viellars,por la vertu du ciel,
«Venés à Montorgueil :les clés vos voil baillier,
«Et ferons bautoizier ma cortoise moillier,
«Et tous ceux de mon regne,et mes borjois prisiés ;
«Lors irons à Karlon,le fort roi droiturier .»
Dont se lieve Dus Naimes et Sanses et Ogiers :
«Si m''aït Diex,biaus sire,bien fait à otroier ;
«Jhesu puisse sauver si vaillant chevalier !»
A icele parole se vont aparillier,
Et chevauchent ensanble,sans plus de delaier,
Li vieillart et li jone et tuit li bautoisié,
Et passent les .IIII .eves où li aïmans siet .
A Montorgueil entrerent baut et joiant et lié .
A la france roïne le vait .I .mes noncier,
Et ele li escrie :«D''ont viens tu,chevalier ?
-Dame,de l''ost Guion,à celer nel vous quier .
«Je vi vostre seignor lever et bautoisier,
«Et ambes .II .vos fils vi ge en fons plongier .
«Ici vient li rois Guis o sa gent,.III .milliers,
«Et feront vostre cors lever et bautoisier .
-Hé Diex !dist la roïne,tu soies graciés !»

QUANT or ot la novele la dame Marguerite
Si fils sont bautoizié et Huidelon ses sires,

[ fol. 0141 ]

De la joie qu''ele ot tous li cuers li sospire .
Qui dont véist aler la cortoise meschine ;
Il n''ot en la cité riche drap ne cortine,
Tires ne siglaton ne pailes d''Aumarie
Qu''elle ne face tout estendre par la vile .
Atant es Huidelon et sa grant baronie .
La dame va encontre,qui moult fu eschevie .
Quant a vu son seignor,si li a pris à dire :
«Bien soiés vous venus et vostre compaignie !
-Dame,dist Huidelon,Diex vous doinst bonne vie !
-Por Dieu,ce dist la dame,estes bautoisiez,sire ?
-Oïl,ce dist li rois,nel vos celerai mie,
«Si voil que recevois créance et bautestire .»
Et li rois de Borgoigne ne s''aséura mie,
Et commande à Turpin :«Faites les fons,biaus sire .»
Cil les fait maintenant,qui bien set le servisse .
Tantost font bautoizier la cortoise roïne ;
Bien puet on aesmer la gent à .XV .mile
Qui por Dieu i reçurent créance et bautestire .
Et li rois de Borgoigne ne s''aséura mie ;
Où qu''il voit Huidelon,molt belement li prie :
«Je vos rant vostre terre et vostre seignorie .
-Par mon chief,dist li rois,issi n''ira il mie ;
«Par la foi que jo doi au fil sainte Marie,
«Ja ne tanrai plain pié de ma terre garnie
«S''aurai véu Karlon,le roi de Saint Denie ;
«Moi et tote ma terre metrai en son servisse .»
Quant li baron l''entendent,mult très grant joie en firent .
La terre ont commandée la cortoise roïne,
Et laissierent o lui de la chevalerie .
De si à l''ost Guion ne s''aséurent mie .
Et les dames des chars plorent forment et crient .
L''enfes Gui fait crier par mult grant seignorie
Que s''il a dame en char nesune tant hardie,
Se ele se demoustre,que ne perde la vie .
Cil demanderent l''eve et au mangier s''asistrent .
Quant il orent mangié,tuit fors des trés saillirent .
Dus Naimes de Baviere,à la barbe florie,
Est venus à Guion,si li a pris à dire :
«Sire rois,gentils hom,por Dieu le fil Marie,
«Vanrois vous à Karlon,le roi de Saint Denie ?»
Et respondi li anfes :«Nel vos celerai mie,
«Quant j''aurai pris par force la fort tor d''Augorie,
«Dont irai à Karlon por faire son servisse ;
«Certes,je n''irai pas tant que je l''aie prise .
-Dont,n''i venras tu ja,dist Naimes,en ta vie .
-Si ferai,dist li enfes,ne vous esmaiés mie,
«Se Diex me veut aider,li fils sainte Marie .»

DUS Sanses de Borgoigne fist forment à prisier,
Et sachiés tot sans faille qu''il ot Guion molt chier,
Qu''il l''avoit engendré de sa france moillier .
Bel et cortoisement le prist à araisnier :
«Sire rois,gentils homs,por Dieu ne me noier ;
«Quant tu méis en France corone sor ton chief,
«Et tu féis venir les fils de nos moilliers ;
«Por coi ne venis tu à Karlemaine aidier,
«Si m''aït Diex de gloire,que il en a mestier ?
-Par Dieu,ce a dit Guis,qui le mont doit jugier,
«Ja n''irai à Karlon,le fort roi droiturier,
«s''aurai ces .II .citez sos moi à josticier,
«Et les randrai Karlon,si m''en aura plus chier .
-Si m''aït Diex,dist Sanses,Trop avez le cuer fier .
«Ja ne verrés Karlon,se vous tant delaiés .
-Si ferai,ce dist l''enfes,or ne vos esmaiés .
«Salués moi le roi,mon seignor droiturier ;
«Je li envoierai .M .murs et .M .somiers,
«Tuit seront de vitaille et trossé et chargié,
«Et .M .haubers saffrez et .M .hiaumes gemés,
«Et .M .escus à or,.M .brans et .M .espiés .
-Sire,dist li dus Naimes,com vous plera si ert ;

Gui de Bourgogne

Geste