Gui de Bourgogne

Geste

Gui de Bourgogne: Numérisation de l'édition de Guessard de 1858 sous la direction de Jean-Baptiste Camps édition numérique Alice Cochet , , éd. par François Guessard , Henri Michelant , Gui de Bourgogne: Chanson de geste P. Jannet Paris 1858 F. Vieweg Paris 1859

  1. «Amis,ce dist li rois,vos garnemens prenez,
  2. «Si faites ceste angarde sorvéoir et monter,
  3. «Savoir se vous verrez Sarrazins et Esclers ;
  4. «Et se vous véés chose qui ne vos soit à gré,
  5. «Retornez tost ariere ces noveles conter .
  6. -Sire,dist li traïtres,nos ne l''osons véer .»
  7. Puis dist entre ses dens,qu''il n''i fu escoutez :
  8. «Par la foi que je dois à ceus dont je suis nez,
  9. «Je vous ferai encore coreçous et irez !»
  10. Tost et isnelemant se corurent armer,
  11. Et furent bien .Xm .sor les chevaus montés ;
  12. Lor chevauchent ensamble,Diex les puist craventer !
  13. Et l''ost au roi Guion ne volt asséurer ;
  14. Li roi Guis en apele Huidelon le menbré :
  15. «Sire,quant venrons nous à Luiserne sor mer ?
  16. -Par mon chief,ce dist Huidres,ains ert midis passés »
  17. Quant li enfes l''entent,grant joie en a mené .
  18. Tost et isnelemant se sont bien acesmé
  19. De riches dras de soie et d''ermins engolés,
  20. De riches dras de soie,qui sont à or ovrez,
  21. De manteaus vairs et gris,qui mult sont à loer .
  22. Lors resamblent tuz1 angre de sainte majesté,
  23. Et montent es chevaus corans et abrievés .
  24. Les chars font maintenant esploiter et errer,
  25. Les uns encoste l''autre et rangier et serrer,
  26. Et ont fait les enseignes desur les chars fermer .
  27. Se les dames ont joie,ne l''estuet demander .
  28. Lors commencent .I .mont belement à monter .
  29. Et Ganelon chevauche,Alori et Hardré,
    30. [ fol. 0163 ]
  30. De ci qu''en son le tertre ne volrent arester .
  31. Et gardent contreval,s''ont l''ost Guion visé,
  32. Les enseignes vermeilles et les escus dorez,
  33. Et virent d''autre part touz les chars arotez,
  34. Et .I .si grant empire nus ne les puet esmer .
  35. Lors quident que ce soit Marsiles li menbrés ;
  36. Tel paor ont éu,ariere sont tornez .
  1. LI traïtor retornent,que Diex puist maléir !
  2. Qui ains ains,qui miels miels2 chevauchent par estrif,
  3. Trestouz en font suer les bons chevaus de pris ;
  4. De ci à l''ost Karlon n''i ot regne ganchi .
  5. Quant les voit l''empereres,si est an piés saillis,
  6. Et Naimes et Ogier et Sanses et Tierris ;
  7. Et Ganes,le traïtres,s''escria à haus cris :
  8. «Sire,dist il au roi,ci vient nostre enemis,
  9. «Or vos covient le siege laissier et deguerpir ;
  10. «Montés sor vos chevaus et pansés dou foïr .
  11. «Vés ci si grant empire,ne vos en quier mentir,
  12. «Puis que Diex de la virge en Beléant nasqui,
  13. «Ne fu teus gens véue com il venra ja ci .
  14. -Hé Diex !dist l''empereres,aiez de moi merci !
  15. «Ahi !Guis,gentils rois,com sui por vous maris !
  16. «Jamès ne vos verrai,biaus amis,ne vos mi ;
  17. «Cil sires nous conduie qui onques ne menti,
  18. «Et sauve la compaigne qui est ensamble ci,
  19. «Et vous laist après moi douce France tenir !»
  20. Après ce mot se pasme,ne se pot atenir .
  21. Rollans et Olivier et Ogiers li gentis
  22. L''ont moult bien conforté,com chevalier de pris .
  1. «SIRE,dist li dus Naimes,vous avés moult grant tort :
  2. «Vos savez bien sans faille,tuit morrons d''une mort ;
  3. «Se li jors est venus,si prenons bon confort,
    4. [ fol. 0164 ]
  4. «Si commandons à Dieu nos ames et nos cors .
  5. «Or faisomes armer nos hommes par esfors,
  6. «Vos méisme,vestés la broigne en vostre doz,
  7. «Et montez el cheval,l''escu à vostre col,
  8. «Si i ferés premiers por esbaudir les nos ;
  9. «Cherement nos vandons ains que nos soions mors .»
  10. A icele parole firent soner .I .cor .
  11. Quant li baron l''oïrent,si s''arment tuit par l''ost ;
  12. Li rois est adoubez et dus Naimes mult tost .
  13. Lors est montés li dus desus .I .cheval sor,
  14. Et fist François loger,n''i ot gieu ne deport .
  15. Olivier va devant et Ogiers au gent cors .
  16. «Sire dist li dus Naimes,n''alez mie si tost ;
  17. «Lessiés me à vous parler,por conseiller vostre ost .»
  1. DUS Naimes de Baviere a Karlon apelé,
  2. Et Oger le Danois,et Sanse l''alosé .
  3. «Sire,dist il au roi,or oez mon pansé :
  4. «Faites vostre grant ost tot coiement monter,
  5. «Que ne nos aperçoivent la gent de la cité ;
  6. «Que si li Sarrazin sevent la verité,
  7. «Il nos venront deriere fervestu et armé ;
  8. «Por ce porïons estre plus tost acoveté .
  9. «Et g''irai cele angarde sorvéoir et monter,
  10. «Et menrai avec moi .Xm .ferarmés ;
  11. «Par la foi que vos doi,sire empereres ber,
  12. «Ne retornerai mès s''aurai Turs encontrés .
  13. -Naimes,dist l''emperere,à Damedieu alés,
  14. «Que garisse ton cors et te puisse sauver !»
  15. A icele parole pense d''esperoner,
  16. De ci que en l''angarde ne vodrent arester .
  17. Et gardent contreval,virent Guion monter,
  18. O lui son grant barnage et les chars arouter ;
  19. Virent les escus d''or luire et restinceler,
    20. [ fol. 0165 ]
  20. Les gonfanons de soie contre vent vanteler .
  21. Et quant Naimes les vit,si les connut assés ;
  22. A ses compaignons dist :«Assés avons alé,
  23. «Retornons ent ariere à Karlon le sené,
  24. «Si li dirons noveles du gentil bacheler
  25. «Qui le secors amaine,que tant poons amer .»
  • 1. Correction de Guessard dans le texte sans justification.
  • 2. Correction par Guessard dans le texte sans justification.