Capitains Nemo

A icele parole ont les chevaus hurtés ;
Par tel aïr les brochent tous les font tressuer,
De ci que à Karlon ne sont aséuré .
Et quant Naimes le voit,si l''a haut escrié :
«Sire,fait il au roi,soiés asséurés,
«Que,puis que Jhesu Cris fu en la crois penés,
«Ne fu si biau secors com ja véoir porrés,
«Que vous envoie ci li jones queronés .»
Quant Karles l''entendi,li cuers li est levés :
«Hé Diex !ce dist li rois,or ai vescu assés .
«Or sai ge bien sans faille que prise ert la cités .»
Atant es vous Guion qui le tertre a monté,
Et ses riches barnages après lui arouté .
Et quant Karles le voit,grant joie en a mené ;
Ses barons en apele,com ja oïr porrés :
«Baron,ostés vos armes et si vous desarmez,
«Alés tuit à la tere sans chauce et sans soller,
«A genous et à paumes encontre lui alez :
«Qui tel secors amaine bien doit estre honorez .»
Et il si firent sempres,quant il l''ot commandé ;
Méisme l''emperere a son cors desarmé .
Et li rois de Borgoigne a tout ce esgardé ;
Où que il voit Bertrant,si li a demandé :
«Amis,ce dist li enfes,dites moi verité :
«Qu''etoit ce que ses gens sont issi atorné ?
-Sire,ce dist Bertrant,ce est humilité ;
«Si grant joie ont de vous ne sevent où aler .
-Helas !ce dist li enfes,com somes mal mené !

[ fol. 0166 ]

«Ce déussons nos faire,qui somes li moisné .»
A sa vois,qu''il ot clere,commenca à crier :
«Baron,or tost à terre !n''i ait plus demoré,
«Et li pon des espées soient desus torné,
«Et coutes et genous à la terre metez .»
Et il si firent sempres dès qu''il l''ot commandé,
Et tuit li converti refirent autretel .
Li uns encontre l''autre très par milieu du pré :
Karles connut Guion,s''est encontre levez ;
Andeus,brace estendue,se sont entr''acolé .
Ains péust on avoir une grant liue alé
Que il s''entrelassassent ne péussent parler .
Et quant il s''entrelaissent,si se sont regardé ;
Lors se corurent sore,si se baisent souef .
L''enfes Guis de Borgoigne li est au pié alés .
«Merci,dist il,biaus sire,ma parole escoutez :
«Il a .XXVI .ans acomplis et passés
«Qu''enmenastes les peres qui nos ont engendrés ;
«Nos fumes à Paris an .I .jor assamblé,
«Si firent de moi roi trestot estre mon gré ;
«Se je ne l''otroiasse,il m''éussent tué .
«Mès ains ne ting en France ne chastel ne cité,
«Ains les fis après vous chevaucher et errer,
«Tous premiers pris Carsaude,une bone cité,
«Et après Montesclair et Montorgueil delés,
«Et si fis Huidelon bautoisier et lever,
«Et plus de .XXXm .que Persans,que Esclers,
«Et si pris Augorie et Maudrane dalés .
«De tous ces grans avoirs et de ces .V .cités
«Vous rent je la baillie,s''en soiés avoués .
«Et si vés ci m''espée,et si la recevés ;
«S''il vos vient à plaisir,la teste me coupés .
-Par mon chief,ce dist Karles,preus estes et senés .
«Ja jor de vostre vie querone ne perdrés,

[ fol. 0167 ]

«Ains vous donrai Espaigne,se panre la poés .»
Atant es le barnage d''ambes pars assamblez ;
Lors reprenent lor dras,chascuns s''an est levés .
L''enfes Guis de Borgoigne s''est en haut escriés :
«Enfans,or à vos peres,et si les acolés !»
Et cil ont respondu :«Si com vous commandés .»
Il méisme ses cors est à Sanson alés,
Plus de .C .fois li baise et la bouche et le nés .

L''ENFES Guis de Borgoigne est alés à Sanson,
Plus de .C .fois li baise la bouche et le menton,
Et Berars à Tierri et Estous à Oedon .
Bertrans,li preus vassals¹ ,est alés à Naimon,
Et tuit li autre aussi² ,sens nule arestoison .
Puis que Diex herberja saint Piere en pré Noiron,
Et qu''il resucita le cors saint Lasaron,
N''ot nus hon tel joïe en fable n''en chançon,
Ne ne vit tant de gent en cité n''en donjon
Que le jour sous Luiserne esgarder péust on .
Cele joie fesant vindrent au tref Karlon .
L''enfes Guis en apele Bertrant,le fils Naimon :
«Faites venir les dames sans nule arestoison,
«Car merveilles desire chascune son baron .
-Sire,ce dist Bertrans,à Dieu benéiçon !»
Quant il les vit venir si s''escrie à haut ton .
Primes descendi Giles,la suer au roi Karlon,
Et avec lui bele Aude,vestue .I .siglaton ;
ll n''ot si bele dame el tref le roi Karlon .

QUANT les dames l''entendent,si lor vint mult à gré ;
Main à main sont venues as loges et as trés .
Et Karles va encontre,et Naimes li barbés,
Et Sanses,et Ogiers,et Richart l''aduré,
Li dus Oedes de Langres,et des autres assés .

[ fol. 0168 ]

Chascuns a pris sa feme,grant joie i ont mené .
Le jor fut cele lie qui ot son avoé,
Et qui ne le trova,si a grant duel mené,
Et Karles l''emperere la fist bien marier .
Li rois prist bele Audain,s''a Rollant apelé :
«Biaus niés,vés ici cele que tant devés amer .

Gui de Bourgogne

Geste