Capitains Nemo

De ci que à Bordele panserent de l''errer ;
Là trespassent Gironde à barges et à nez ;
Par le mileu des landes se sont acheminé,
Et costoient Belin,une povre freté .

[ fol. 0059 ]

De ci que à la Faue ne se sont aresté ;
Li enfant la trespassent,s''ont le chemin trové .
Iluec virent le bois que Karles fist planter .
Jusc''à Ais en Gascoigne ne se sont aresté .
.I .pelerin troverent essillié et gasté,
Qui revient de saint Jake,où il ot converssé,
Et en Jherusalem avoit .III .fois esté ;
Et n''avoit .I .seul lieu en la crestienté
Ne bon repaire nul où il n''ait demoré,
Et son cors mainte fois travillié et pené .
L''enfes Gui de Borgoigne l''a premiers salué :
«Paumier,Jhesu te gart par la soie pité !»
Et li paumiers respont :«Diex vos croisse bonté !
«D''ont estes,de quel terre,qui tel avoir menez ?
-Rois sui de douce France,de Paris la cité .»
Et li paumiers respont :Or m''avez vos gabé ;
«Vos n''estes mie Karle le fort roi queroné,
«N''a gaires que gel vi à Luiserne sor mer .
«Certes,tous a les poins et les genous anflez,
«A paines puet li rois sor son cheval monter,
«Et tuit si home sont de faim si agrevé
«Que li auquant ne pueent très parmi l''ost aler .»
Quant li enfes l''entent,le sens quide derver ;
Où qu''il voit le paumier,si l''en a apelé :
«Amis,car me di ore,por sainte charité,
«Quant tu as en l''ost Karle longement conversé,
«Se tu i connoistroies nes .I .des .XII .pers .
-Oïl,dist li paumiers,je les sai bien nomer .
«Je connois bien Rollant et Olivier son per,
«Et Naimon à la barbe et Ogier l''aduré,
«Richart de Normendie et Renier l''alosé,
«Et Yvon et Yvoire et Haton le sené,
«Le duc Tierri d''Ardane et Oede le barbé,
«Et Sanses de Borgoigne,qui est gentils et ber .»

[ fol. 0060 ]

Quant li enfes oï de son pere parler,
Li cuers qu''il ot ou ventre li commence à plorer .
Où qu''il voit le paumier,si l''en a apelé :
«Amis,car me di ore,garde nel me celer,
«Cil Sanses de Borgoigne est il de grant fierté ?
-Oïl,par ma foi,sire,riches hom est assez ;
«Mais tous li est faillis,et li pains et li blez .
«Je me jui .IIII .jors malades en son tref ;
«Certes,je n''i manjai,ce vos di par verté .»
Quant li anfes l''entent,si l''en a mult pesé,
Par poi qu''il n''est chéu de son destrier pasmez .
Où qu''il voit le paumier,si l''en a apelé :
«Amis,car me di ore,par ta crestianté,
«Qui destruit si Karlon,com tu m''as ci conté ?
-Si m''aït Diex,biaus sire,cele riche cité,
«Vés le là sor cel tertre dont cele tour apert .
«.IIII .ans i sist Karlon le fort roi coroné,
«Ainc n''i mesfist dedens .I .denier monéé ;
«Ariere la lessa,si fist que fous provez .
«Certes or li est si li chemins ancombrez
«Que nus n''i puet por voir ne venir ne aler,
«Ne vitaille qui vaille .I .denier monéé .
«Pelerins ne paumier n''i ose trespasser
«Qu''il n''i perde la teste ains qu''il soit avespré,
«Et c''est mult grant merveille quant j''en sui eschapé .»
Quant l''enfes Guis l''entant,s''a Bertrant regardé .
Quant Bertran l''a oï ;s''a .I .souspir gité .
«Amis,ce dist li rois,avez vos escouté ?
«Vés vos cele grant tour qui gete grant clarté,
«Qui destruit en Espaigne no riche parenté ?
«Ganchissiés i tout droit,m''oriflambe i portez,
«Et si faisons les chars esploitier et errer ;
«Que,par cele corone dont m''avez coroné,
«C''à Paris me donastes trestot outre mon gré,

[ fol. 0061 ]

«Ne par la foi que doi sainte crestienté
«Ne que je doi mon pere le duc Sanson porter,
«Ne m''istra de mon col mes fors escus bouclez
«Ne mes hiaumes ne m''ert de mon chief desposez,
«Ne ne despoillerai mon blanc hauberc saffré,
«De ci à icele oure qu''ert prise la cité .»
Lors remaudient l''eure qu''il l''orent queroné .

OR chevauce li rois et il et si guerrier .
Les buez font charoier et les chars atirier,
Les gonfanons de soie font au vent desploier .
Autresi grant poudriere demainent li somier,
Que parmi ne volast ostoir ne esprevier
Qu''il ne hurtast as fers de lor tranchans espiez .
Tot droit vers la cité vont li enfant rangié .
Sarasin et Persant leverent dou mangier,
As fenestres des murs s''alerent apoier,
Et voient les enfans qui vienent tuit rangié .
Virent les escus d''or luire et reflamboier,
Les gonfanons de soie contre vent baloier,
La poudriere choisirent que mainent li somier .
«Seignor,dist Escorfaus,Karles revient arier .
«Esté a à Luiserne,mès ne la puet bailler ;
«Or s''an reveut en France li vieus or repairier .
«Mult estoie musars et de son sens vuidiés,
«Que il s''an quide aler sans aucun anconbrier .
«Armez vos erralment,je vos en voil proier,
«Que ja les assaudrons et devant et derier .
Et Sarrazin respondent :«Biaus sire,volantier .

Gui de Bourgogne

Geste