Gui de Bourgogne

Geste

Gui de Bourgogne: Numérisation de l'édition de Guessard de 1858 sous la direction de Jean-Baptiste Camps édition numérique Alice Cochet , , éd. par François Guessard , Henri Michelant , Gui de Bourgogne: Chanson de geste P. Jannet Paris 1858 F. Vieweg Paris 1859

  1. -Seignor,dist Boïdans,Karles est ci arier ;
  2. «En ces estranges terres a son cors travillié .
  3. «Ce n''est mie rois Karles qui France a à bailler,
  4. «Ne Naimon à la barbe,ne Tierri ne Ogier,
  5. «Ne Yvon ne Yvoire,Haton ne Berangier,
    6. [ fol. 0062 ]
  6. «Ne Sanse de Borgoigne,ne Richart ne Renier,
  7. «Par Mahomet mon Dieu,je les connois mult bien :
  8. «Lor escu sont plus noir c''arement en mortier,
  9. «Lor chevaus desferez et ont touz nus les piez ;
  10. «Mès c''est secors de France qui après Karlon vient .
  11. «Atendez moi .I .poi ;g''irai à eus plaidier,
  12. «Si lor demanderai que ce fu et que iert .»
  13. Et cil li respondirent :«Pansez de l''esploitier .»
  14. Li Sarasins monta sor .I .corant destrier .
  1. SOR .I .corant destrier monta li Sarasins,
  2. Des esperons le broche,de la vile s''an ist,
  3. Jusc''à l''ost des François ne prist il oncques fin .
  4. En arcage grezois les salua et dist :
  5. «Baron,de Mahomet soyez vos benéis !»
  6. Et l''enfes Gui respont,qui le cuer ot hardi :
  7. «Amis,Diex mete en toi créance et saint Espir,
  8. «Que il ne perde l''ame que dedens ton cors gist !
  9. -D''ont estes vos,sire enfes ?»li Sarasins a dit .
  10. -Amis,ce li dist Guis,je sui rois de Paris .»
  11. -Non estes,par ma foi,li paiens respondi .
  12. «Vos n''iestes mie Karles,le roi de Saint Denis .
  13. «N''a pas encor .I .mois que l''emperéor vi ;
  14. «Par Mahomet mon Dieu,n''a pas si cler le vis .
  15. «Mès dites moi d''ont estes,que il n''i ait menti .»
  16. Et respondi li enfes et por voir li a dit :
  17. «Si m''aïst Diex,dist Guis,bien le sachiés de fi
  18. «Que je sui rois de France,d''Orliens et de Paris .
  19. -Onques mès tel n''oï,ce dist li Sarasins .
  20. «Maléoite soit France de Mahon qui me fist,
  21. «Quant ele puet .II .rois tanser et garantir !
  22. «Mauchief puist ele panre et à mauchief venir !»
  23. Et dist à l''autre mot :«Je n''ai mie bien dit ;
  24. «En France croist li blez et si est li bons vins,
    25. [ fol. 0063 ]
  25. «Si i sont li preudome qui ont les cuers hardis,
  26. «Qui bien doivent conquerre et terres et païs .
  27. «Où devez vos aler ?ce dist li Arrabis .
  28. -Si m''aït Diex,dist Guis,cele vile assaillir .
  29. -Vos ferés grant folie,li paiens respondi .
  30. «Karles i sist .III .anz,li rois de Saint Denis,
  31. «.LX .mangoniaus i fist as murs flatir,
  32. «Ains n''i mesfist dedens vaillant .I .parisi .
  33. -Se Diex plaist,ce dit Guis,or i est venus cil
  34. «Dont hontes et domages vos est à avenir .
  35. -Par ma barbe mellée,ce dist li Sarasins,
  36. «Ne cuit pas que soiés li rois de Saint Denis .»
  37. Quant l''enfes Guis l''entent,tous li sans li fremist .
  1. «SEIGNOR,dist Boïdans,je m''en voil retorner
  2. «Et dire à mon seignor que j''ai à vous parlé ;
  3. «Il m''en crera mult bien,par Mahomet mon Dé .
  4. «Par Mahomet mon Dieu,que j''ai mon chief doné,
  5. «Se mes consaus estoit oïs ne escoutez,
  6. «On vous rendroit la vile sans traire et sans giter .»
  7. A icele parole s''an est li Turs tornez ;
  8. Ains ne tira sa resne si vint en la cité .
  9. Quant Escorfaus le voit,si li a demandé :
  10. «Diva,quel gens sont ce où tu as converssé ?
  11. -Sire,dist Boïdans,j''en dirai mon pensé :
  12. «Ce ne sont mie gent,ains sont angre anpené .
  13. «Certes,s''or les veiés,sor les chevaus montez,
  14. «Com li cheval les portent les piés amoncelez,
  15. «Les escus à leur cous com s''il erent plantez !
  16. «Par Mahomet mon Dieu,qui j''ai mon cors doné,
  17. «Se tut li Sarasin qui de mere sont né,
  18. «Ne se trestuit li mort erent resucité
  19. «Et erent là aval en ce champ assamblé,
  20. «Si fuissent li enfant avoques eus mellé,
    21. [ fol. 0064 ]
  21. «Ses auroient amort ains soleil esconsé .
  22. «Lor Diex veille por aus,qui les tient en bonté ;
  23. «Mès li nostre se dorment,qui tuit sont rasoté :
  24. «Car par le leur nos vient et li pains et li blez
  25. «Li vins,la char salée,li pimens,li clarez .
  26. -Amis,dist Escorfaut,je quit vous i créez .»
  27. Et dist à l''autre mot :«Paien,or vos armez,
  28. «Que ja les assaudrons sans point de demorer .»
  29. Et cil li respondirent :«Si com vos commandez .»
  30. Lors vestent les haubers,s''ont les hiaumes fermez,
  31. Et ceignent les espées as senestres costez,
  32. Et montent es chevaus corans et abrievez,
  33. Et portent à lor cous les fors escus bandez ;
  34. Les espiels ont saisis,dont li fer sont quarez,
  35. Et issent de la porte,les frains abandonez .
  36. Bien furent .XVm .quant furent assamblé .
  37. Les gonfanons de soie lessent au vent aler,
  38. Qui ains ains,qui miels miels pensent d''esporoner .
  39. Quant l''enfes Guis les voit,s''a Jhesu reclamé :
  40. «Glorieus sire pere,qui me féistes né,
  41. «Garissiez hui mon cors que n''i soie afolé,
  42. «Et sauvés ces enfans que j''ai ci amenez,
  43. «C''ancor puissons véoir Karlemaine au vis cler
  44. «Et li façon secours à Luiserne sor mer !»
  45. A icele parole commença à plorer .
  46. Turpins estoit evesque de novel adobez ;
  47. Où qu''il voit les enfans,ses a araisonez .
  48. «Enfans,dist l''archevesques,à moi en entandez :
  49. «Alez trestuit à terre,benéiçon prenez .»