Capitains Nemo

Ne menjuent de fain,d''avoine ne de blés,
For que herbe de chans,d''araines et de prés .
Et pendent à lor cous les fors escus bouclés,
Pristrent les roides lances as gonfanons fermés,
Bien furent .XVm .quant il furent armé ;
De .IIII .pars se sont parti et desevré .
Et li rois les commande au cors méismes Dé

[ fol. 0074 ]

Qu''il les puisse conduire et maint à sauveté .
Et li baron chevauchent as gens cors honorés :
En .I .val,lés .I .tertre,là les ont encontrés ;
Ce furent li enfant qu''il orent engendrés .
N''i avoit fors des cous de maintenant doner .
Quant virent les escus croissus et painturés,
Lors set bien li dus Naimes que de France sont nés ;
S''il ot en son cuer joie,ne l''estuet demander .
Lors broche le cheval,cele part est alés .
Trestout le premerain que il a encontré,
Ce fu son fil Bertrant,que il ot engendré .
Onques mais ne le vit an trestot son aé .
Et quant Naimes le vit,si l''a plus enamé
Que autant n''ama home en la crestienté .
Il le prist par le hiaume,contremont l''a tiré,
Gentement le salue,ne l''a pas ranposné :
«Cil Damedieu de gloire qui maint en trinité
«Saut et gart ces enfans par la soe bonté !
«Enfant,d''ont estes vos ?De quel terre estes nés ?
«Estes vos marchéant qui cest avoir menés ?
«Se vous le volés vendre à deniers monéés,
«Karles li empereres vos en donra assés .
«A or et à argent sera mult bien pesés ;
«Ja ne serés mais povres an trestous vos aés .»
Et Bertrans respondi,qui gentils est et ber :
«Cil sires vos garisse qui en crois fu penés !
«Ne somes marchéant,ne l''avons acheté ;
«Ains somes né de France où croissent li vin cler,
«Home somes au roi qui tant fait à loer .
«Et vos,de quel terre estes,qui ma resne tirés ?
«Comment avés vos non,qui si m''araisonés ?
-Par mon chief,dist Dus Naimes,je dirai verités :
«On m''apele Naimon,et sui des .XII .pers .»
Quant Bertrans vit son pere,s''a le cuer si serré

[ fol. 0075 ]

Que d''une grant loée ne pot sor piés ester,
Por ce qu''il ne l''osa baisier ne acoler,
Que li enfes Guion li ot bien devéé ;
A poi qu''il ne chaï de son destrier armé .
Après a respondu,si a haut escrié :
«Dahais ait qui en chaut,ce dist Bertrans li ber .
«Poi vos doit vostre fame et vostre fils amer
«Que onques ne véistes an trestot vostre aé !
-Ha Diex !ce dist dus Naimes,ai ge fils engendré ?
-Oïl,ce dist Bertrant,.I .mult biau bacheler .
«N''a encor pas .I .an que il fu adoubés ;
«N''est pas graindres de moi,bien est de mon aé .
«Par icel saint apostre c''on quiert en Noiron pré,
«Je li oï sor sains et plevir et jurer
«Que,s''il vos puet en champ véoir et encontrer,
«Il vous fera la teste fors du bu desevrer .
«Lessié avés sa mere en longe veveté .
-Si m''aït Diex,dist Naimes,or puis le sans derver,
«Quant je oi de ma feme et de mon fil parler,
«Que je onques ne vi en trestot mon aé !»

LI dus Oedes de Lengres ot mult cuer de baron ;
Il broche le destrier qui li cort de randon,
Prist son fil par la resne,qui mult ert gentils hon,
Envers lui le sacha,si l''a mis à raison .
«Amis,ce dist li dus,comment avés vos non ?
-Sire,ce dist li enfes,Estous m''apele on,
«Nés sui de douce France,hons sui le roi Guion,
«Qui envoie à Karlon vitaille et garison ;
«Onques nel vit mes sire,si li a fait tel don .»
Et dist Huedes de Lengres :«Je le tien à bricon,
«Quant il corone a prise deseur le roi Karlon ;
«Il en pendra encore à grant destruccion .»
Quant Estous l''entendi,si fronci le guernon

[ fol. 0076 ]

Et rooille les ieus,samblant fait de felon .
Où que il voit son pere,si li dit sans reson :
«Par mon chief,dans viellars,je vos tien à bricon,
«Quant vos issi mesdites du riche roi Guion ;
«Onques meillor de lui ne chauça d''esperon .
«Par icel saint apostre c''on quiert en pré Noiron,
«Par poi ne vos arrache la barbe et le guernon,
«Ou que ne vos porfent entresci qu''el menton .»
Et dist Oedes de Lengres :«Tu as mult verai non :
«Tu es fel et estous ;Estous t''apele l''on .»

LI dus Tierri d''Ardane a brocié le destrier,
Prist son fil par la resne,Berart de Mondisdier,
Envers lui le sacha,si li prist à huchier :
«Amis,comment as non ?Garde nel me noier .
-Sire,j''ai non Berart,l''enfes li respondié ;
«Hons sui au roi Guion,qui tant fait à proisier,
«Qui envoie à Karlon ces murs et ces somiers,
«Et tuit sont de vitaille et trossé et chargié .
«Et vos,de quel terre estes,qui ma resne sachiés ?
-J''ai non Tierri d''Ardane et sui .I .chevaliers .»
Quant Berart vit son pere,mult an fu coreciés,
Por ce qu''il ne l''osa acoler ne baisier,
Que li rois de Borgoigne li ot fet fiancier .
Et dist à l''autre mot :«Dahés ait qui en chiet !
«Fil à putain,gloton,lechiere,pautonier,
«Si vos demaine Karles comme ronci trotier,

Gui de Bourgogne

Geste