Capitains Nemo

-Diva !qui ai ce fait ?di lou moi à estros .
-Par Maonmot,biau sire,.II .François orguelous
«Que li rois ai mandez por conquere t''enor .
«.I .jovancel i ai qui à mervoile est prouz ;
«Fernagu,vostre fiz,vos ai mort à delour .
«Ancor an ai à gart qu''i conquist an l''estour .»
Quant l''entant l''amiraus,tote an pert la quelour ;
Paumez chéi à terre,qu''i n''ot point de vigour,
Quant l''en corent drecier .IIII .rois poignaor .

«AMIRAUS,sire rois,dient li Sarazins,
«Amiraus,riche rois,por coi t''esmaies si
«Por .I .recet mauvais que François ont sesis ?
«Or irons an lor terre,si lor en todruns .M .

[ fol. 0362 ]

-Barons,dit l''amiraus,mout par avez bien dit .
«Or ferai don mes homes ajoter et venir
«Et mon ariere banc que je aurai tresmiz .»
Si vos lairons ester de l''amiraul Persi,
Si dirons dou roi Flore,de lui et de ses fiz,
Com il vint le chatel raviner et saisir .
Floovans vet encontre,braz et braz se sont pris,
Et puis se sont asis desuis un paile bis .
-Amis,ce dit li rois,commant vos estet il ?
-Mult bien,la merci Deu,Floovans respondi .
«Onques n''i ot essaut,ne trait,ne lancéiz ;
«Por force et por prouoce fut ce chestais conquis :
«Melle pelle i entrames ovec les Sarazins .
«Mout est granz li avoirs que nos avons conquis ;
«Or le prennez,bau sire,tot à vostre devis,
«Et si le departez à vos et à vos fiz,
«A moi et à ces autres qui l''avons desservi .
-Barons,dit li rois Flores,prouz estes et jantis ;
«De ma terre vos doins tan com vodroz tenir ;
«Si vos donrai ma file,Florete au cler vis .
-Sire,dit Floovans,de Due .Vc .merci .

EN sus de ce chatel,la traitie d''un arc,
Ot planté .I .vergier que l''on apale gart,
Anvirons clous à murs ;lai moinent lor eschac .
Floovans et Urbans jantemant le depart ;
Onques n''ann i ot nus qui mult ne s''an loast .
Maugalie est aus estres,la file l''amiraur,
Aveques le Florote,file le roi d''Ausai .
Maugalie fut fiere qui premiere parlai :
«Car plaüt à Maon,qui le segle estora,
«Ce soudoiiers de France qui prous est et loiaus,
«Qu''i m''éust prisse à famme,à moilier principel .
«Si me tenist mes peres,li riches amiraus,

[ fol. 0363 ]

«Plus me donroit de terre Romenie ne vaut .
-Dame,ce dit Florete,vos avez trop grant chaut .
«Il est droiz à paien,quant sa fanme prise ai,
«Que il la tene tant que ele anprenerai ;
«Puis an panrai il .III .ainçois que li anz part .
«Daaz ait Maonmoz ne qui jai le croirai ;
«La loi de Maonmot la nostre ne vaudrai .»
Quant l''antant Maugalie,durement la pesai :
-Por ma foi,damoiselle,moult sont vilains vos gas .
«N''ai pas ancor .I .mois,vos parlates tot d''aul :
«Je vos vi à la court mon pere l''amiraur
«A .C .et à .L .trestote communaul,
«Chacuns por .I .denier,comme fanme venaul .
-Dame,ce dit Florote,vos me dites grant maul ;
«Por riens que m''aiez dit ne sarai moins loiaus .
«Se Sarrazins me pristrent,onc n''orent an moi part par;
«Il me tindrent .III .jors,eschapai lor au quart .
«Fernagu,vostre frere,por fou me achetai,
«Ge le vis mort giter por lou cop d''un vasail ;
«Vostre druc vis ocire,Escorfan de Baudas ;
«Or volés celui panre qui ocis les vos ai !
«Si ferïés vos .XXX,si fust qui vos donast .
«Dahez ait qui vos croit ne qui jai vos crorai .»
Formant se contralient a deçai et delai ;
Jai venisent ansanble quan l''on les desservrai .
Li rois Flore d''Ausai Floovant apelai :
«Gardez moi ce chatel,tan que je vene çai,
«Puis vos donrai ma file,que jai ne demorai .
-Sire,dit Floovans,isi com vos plairai .»
Or s''an vai li rois Flores,son eschac anmenai,
Et sa file la belle,et ses fiz les boisaiz .
Damedex les confunde,qui lou monde estorai !
Puis murent à Flovant tel doel et si grant mal
Isi com vos orez,se la chançon ne faut .

[ fol. 0364 ]

MAUDARANS et Maudaires sont glotons et mavais ;
Braz et braz se sont pris,à une par sont traiz .
«Frere,dit Maudaranz,une riens te dirai :
«N''ein pas ce soudoier,mas togor le errai .
«Larges est de doner et varsal et cortois ;
«Tuit nostre home le servent,li bons et li mauvais :
«S''il prant nostre serour,chaüz sumes à fais .
«Aulons à l''amiraur,batison li tel plait
«Qu''an sa chartre le giet,puis n''ann itrai jemais .
-Frere,ce dit Maudoire,ja ne vos an faudrai ;
«Se puis ma serour pandre,anz en .I .feu l''ardrai,
«Et Richier et Urbam au vain ancroerai .»
Seignor,or escoutez,faites paiz si oez :
Si faite traïsom ne fut ne jemais n''iert,
Ne mas fors de Judas qui ann ot son loier,
Qui Damedeu vandi por son maul anconbrier .
Mauderanz et Maudoires sont cuvers losoigier ;
Au serain de la lune pristrent au chevachier,
Avec aus n''anmenerent fors que .II .escuiers,
Et sont venuz à Basme ainz que li soroz liet .