MDCXII

Loys, par la grace de Dieu roy de France. Savoir faisons, etc. nous avoir receu l’umble supplicacion de nostre bien amé Jaques de Saincte Flayve1, escuier, contenant que pour ce que, ou moys de mars derrenier passé, il oyt crier l’arrière-ban des nobles du païs et conté de Poictou et que lesdiz nobles fussent prestz à certain jour, montez et armez, ledit suppliant qui est nobles homs et qui a acoustumé de frequenter noz guerres, pour soy mettre sus, armer et monter, en esperance d’aler en nostre service, [p. 214] le cinquiesme jour d’avril derrenier passé, se transporta au lieu de Chastenay, pour empruncter de l’argent ou engaiger certain heritaige que autresfois il a acquis de feu Jehan Maynner. Et le lendemain vi^e jour dudit moys, ledit suppliant s’en ala au lieu de Saint Laurens de la Sale en la parroisse où est assis ledit heritaige parler à certaines gens ausquelz il esperoit bailler ledit heritage et recevoir de l’argent pour l’employer en ce qu’il avoit à faire pour nostre dit service ; et ainsi que ledit suppliant faisoit diligence de recouvrer ledit argent, luy fut dit que ledit Jehan Maynner, qui luy avoit vendu ledit heritaige y mettoit empeschement et que jà il avoit fait courir l’eaue par les prés dudit heritaige, et que ledit Maynner avoit achapté la partie d’aucunes personnes qui y avoient droit. Et lors ledit suppliant commença à dire telz motz : « C’est ung mauvais homme de ainsi faire en mon absence ; car je l’ay bien payé et il est obligé de le me garentir, et fait bien mal de ainsi se prendre au mien, quant je ne y suis pas. » Et tantost après à l’yssue de vespres ledit suppliant et le vicaire de l’eglise dudit lieu de Saint Laurens, parlans ensemble d’aucuns leurs affaires et eulx promenans par la rue, passa d’aventure par devant eulx ledit Maynner, et ainsi que ledit suppliant l’advisa, il luy dist telles parolles : « Maynner, pourquoy vous prenez-vous au dommaine que vous m’avez vendu ? Ne vous ai-je pas bien payé. » Lequel Maynner luy respondit qu’il ne se y prenoit pas et ledit suppliant luy dist que sy faisoit et qu’il faisoit courir l’eaue par dedans lesdiz prés comme s’ilz fussent encores siens, et que il le faisoit pour en prendre tousjours possession. Et lors ledit Maynner va respondre certaines grosses parolles arrogantes et non servans au cas ; et sembla audit suppliant que lesdictes parolles dictes par ledit Maynner estoient par manière de derrision et moquerie. Et à ceste cause ledit suppliant qui avoit ung braquemart pendu à sa seinture, desplaisant de [p. 215] ladicte response et qu’il n’avoit lors chose dont il peust faire argent pour soy monter et mettre sus, senon dudit heritaige, donna de chaulde cole audit Maynner sept ou huit cops de sa main seulement, en disant : « Villain, tu te mocques de moy ! » et en ce faisant, eschappa ledit Maynner audit suppliant et s’enfouyt ; et ainsi qu’il s’en fuyoit, ledit suppliant print une pierre non pas pour le vouloir fraper, mais pour luy faire paour. Et ainsi que ledit suppliant gecta ladicte pierre, ledit Maynner fist ung faulx pas et arriva de male adventure ladicte pierre contre la teste dudit Maynner et ne luy rompit que la peau. Mais ledit Maynner dudit cop ou autrement cheut de l’estomac et du visaige sur de grosses pierres qui estoient en la rue, tellement que cinq jours après ou environ, par faulte de gouvernement ou autrement, il est alé de vie à trespas. Pour occasion duquel cas, dont ledit suppliant est très desplaisant et a cheuy à partie, icelluy suppliant s’est absenté, etc. Pour quoy nous, etc., audit suppliant avons quicté, etc. Si donnons en mandement au seneschal de Poictou, etc. Donné à Paris, ou moys de juillet l’an de grace mil cccc. soixante dix huit et de nostre règne le xvii^me.