[p. 222]

MDCXV

Rémission accordée à Jacques Blanchart, Guillaume Charbonnier, sergent, Jean Matignon et Denis, charretier, serviteurs et familiers de l’hôtel de la Villedieu, compromis dans la même affaire de meurtre.

  • B AN JJ. 206, n° 29, fol. 7
  • a P. Guérin, Archives historiques du Poitou, 41, p. 222-223
D'après a.

Loys, par la grace, etc. Savoir faisons, etc., nous avoir receue l’umble supplicacion de Jacquet Blanchart, jeune fils de l’aage de xxi ans ou environ, Guillaume Charbonnier, barbier, sergent des lieux et seigneuries de Sales et de la Villedieu, Jehan Matignon et ung nommé Denis …1, charretiers, serviteurs et familiers de l’ostel de la Villedieu, contenant que le xie jour de ce present moys de juillet, lesdiz supplians estans oudit lieu de la Villedieu, Guillaume Blanchart, frère dudit Jaquet Blanchart, survint oudit lieu et trouva Jaquet Blanchart, auquel il dist qu’il venoit des eaues de Sales et que illec il avoit trouvé des pescheurs qui peschoient ausdictes eaues auprès du moulin Thabouril, lesquelz l’avoient voulu batre et gecter en l’eaue, et demandant où estoit Monseigneur. Et incontinent se departy de luy et entra en la maison pour aler prendre son espée. Et lors ledit Jaquet, desplaisant de l’oultrage que ledit Guillaume son frère disoit lui avoit esté faicte par lesdiz pescheurs, print son espée, une arbaleste avec une vire et ala seul au lieu ou sondit frère luy avoit dit que lesdiz pescheurs estoient, mais ne les trouva point, et d’illec sans bender son arbaleste ne autre chose faire, ala jusques près la chaussée dudit moulin, et en escoutant oyt aucunes gens qui parloient sur ladicte chaussée, mais [p. 223] pour ce qu’il estoit presque nuyt, ne pot cognoistre quelz gens ce estoient. Et ce pendant ledit Guillaume son frère s’en ala par devers ledit Jaques Gilier qui estoit alé esbatre à la prée Mothoyse avec Estienne Le Ferron et autres, pour luy adnoncer qu’il avoit trouvé lesdiz pescheurs ausdictes eaues de Sales. Et trouva lesdiz Gilier et Ferron, lesquelz par le moyen du rapport que leur fist ledit Guillaume Blanchart de ce qu’il avoit esté batu par lesdiz pescheurs et gecté en l’eaue, s’en vindrent audit lieu de la Villedieu, ledit Ferron tenans une forche de fer, et ledit Gilier n’avoit aucun baston. Et dist ledit Gilier audit Charbonnier : « Il fault aler prendre ces pescheurs ; que on appelle deux ou troys de noz gens. » Et incontinent ledit Charbonnier, appella lesdiz Jehan Matignon, Denis …2 et le paige dudit Ferron, nommé Aubert, et prist iceluy Denis suppliant une javeline et ledit Matignon ung braquemart et alèrent jusques au plus près dulieu où ledit Blanchart disoit avoir trouvé lesdiz pescheurs, etc., (ut in precedentibus, mutatis mutandis). Donné ou moys de juillet l’an de grace mil cccc. soixante dix huit, et de nostre règne le xviiime.

Ainsi signé : Par le roy, à la relacion du Conseil. De Villebresme. — Visa. Contentor. Picart.


1 Blanc au registre.

2 Blanc au registre.