MDCXXXIX
Rémission obtenue par Jean Petit Ganaud, de Champetit, qui craignait d’être poursuivi comme complice d’un meurtre commis quatre ans auparavant, lui présent, par un de ses parsonniers, dans un conflit armé provoqué par les trois frères Le Couturier du Chaslar, qui revendiquaient la possession d’un champ appartenant audit Petit Ganaud et à ses copropriétaires.
- B AN JJ. 205, n° 433, fol. 247
- a P. Guérin, Archives historiques du Poitou, 41, p. 293-295
Loys, par la grace de Dieu roy de France. Savoir [p. 294] faisons à tous, presens et avenir, nous avoir receue l’umble supplicacion de Jehan Petit Ganaud de Champety, parroissien de Saint-Julien près Laront1, contenant que ledit suppliant avec ses autres procureurs, habitans dudit Champeti, sont vraiz seigneurs ratilz propriétaires et possesseurs des lieux nommez de Champeti et du Pont, et toutes les appartenances et deppendances, et entre autres appartenances et deppendances des diz lieux est et a acoustumé d’estre ung champ nommé de la Varnhola situé et posé entre le Puys Radeau d’une part et le Pont de la Chaulm, tirant le grant chemin de Saint Léonard, d’autre part, et tenant au Puy Fromenteau. Et est avenu que le dimanche devant la Nostre Dame d’aougst, à heure de vespres, quatre ans a ou environ, ledit suppliant et ses autres parsonniers de Champeti faisoient garder et pasturer leur bestail groz et menuz oudit champ, et lors survindrent illec Liénard, Pierre et Jehan Le Cousturier du Chaslar, frères, enfans de Pierre Petit du Chaslar, parrochiens du Peyrat, mal meuz et embastonnez chacun d’un baston, lesquelz malicieusement et de couraige courroucié avec leursdiz bastons viroient et chassoient le bestail desdiz champs, et entre aultres ledit Liénard du Chaslar, et sur ce se meut bruit et debat entre lesdiz du Chaslar assaillans et lesdiz de Champeti à l’occasion dudit champ et deboutement [p. 295] dudit bestail, et frapèrent les ungs sur les autres tellement que par chaleur et oudit conflit et debat, ung nommé Pierre Goudré dudit Champeti, en la compaignie duquel ledit suppliant estoit, gardant et deffendant ledit bestail, frappa d’un baston de boys de chassanli, en soy deffendant, ledit Lienard du Chaslar l’un desdiz assaillans et agresseurs, et l’ataigny sur la teste, tellement qu’il tomba à terre, fut emporté d’illec et le lendemain, par deffault de bon gouvernement ou autrement, il alla de vie à trespassement. Depuis lequel cas avenu, enquestes ont esté faictes par justice, à qui appartenoit ledit champ et par icelles a esté trouvé qu’il appartenoit audit (sic) de Champeti. A l’occasion duquel cas, que ledit suppliant n’a pas commis ne frappé le coup, mais il estoit en la compaignie, il n’ouse seurement converser ne repairer ou pays, doubtant rigueur de justice, et pour ce nous a humblement fait supplier et requerir noz grace et misericorde luy estre sur ce imparties, humblement requerant icelles. Pour quoy, nous, ces choses considerées, voulans misericorde preferer à rigueur de justice, etc. Si donnons en mandement, par cesdictes presentes, au seneschal de Poictou et à tous noz autres justiciers ou à leurs lieuxtenans, presens et advenir, et à chacun d’eulx, si comme à luy appartiendra, etc. Donné à Larchant, ou moys de juillet, l’an de grace mil cccc. soixante dix neuf, et de nostre regne le dix huitiesme.
Ainsi signé : Par le roy, à la relacion du Conseil. De Villechartre. — Visa. Contentor. F. Texier.
