DCCCXXV

Charles, etc. Savoir faisons à tous, presens et avenir, [p. 257] que comme en nostre joyeux advenement et entrée du chastel de le Motouere près de Ardre, Jehan Lesnare, dit de Magny, surnommé Alain, né de la seneschauciée de Poitou, fust prisonnier au dit lieu de le Motouere pour ce, si comme l'en dit, que environ a XX ans, après ce qu'il ot dit de par la dame de Meno à Jehan du Boulon, demeurant pour lors à Chielle soubz Pierrefons, que la char lui cousteroit plus que le poisson et que le dit du Boulon fu sailli hors de sa maison, en disant au dit prisonnier qu'il estoit très mauvaiz lierres et que qui lui fist raison, l'en le pendroit à un gibet qui lui monstroit au doy, et que ycelui prisonnier eust respondu qu'il mentoit comme mauvaiz villain Jaques qu'il estoit, disant qu'il s'en retournast à l'ostel ou male aventure lui vendroit, le dit Boulon le poursui tousjours, en continuant contre lui les dictes paroles bien jusques au giet d'une pierre à plain poing ou environ; et quant le dit du Boulon l'ot actaint en tenant une serpe en sa main, le dit prisonnier veant qu'il perseveroit de le poursuir comme dit est, sacha un coustel qu'il avoit environ en manche et en tout de pié et demi de long, dont il lui en donna deux ou trois cops sur la teste ; et lors le dit du Boulon empoingna le coustel à deux mains, et le dit suppliant le tira à lui et tant que le dit du Boulon le tira si fort par la lemelle qu'il la se bouta ou corps, tant que tantost après mort s'ensuy en la personne du dit Boulon. Pour lequel fait le dit Lesnare qui a esté appeliez à noz droiz et ne scet s'il est banny, nous a fait humblement supplier lui estre pourveu de nostre grace. Nous, pour consideracion de nostre dit joyeux advenement ou dit chastel de le Montojere et que l'en dit le dit Alain en autres cas estre de bonne vie et renommée, avons le dit Alain fait délivrer des prisons du dit lieu de le Montoire et lui avons le dit fait quicté, remis et pardonné, etc. Si donnons en mandement au bailli de Touraine et à tous noz autres justiciers, etc. Donné à Saint Omer, ou [p. 258] mois d'octobre l'an de grace mil CCC IIII^XX XVI, et le XVII^e de nostre regne.
Par le roy, present monseigneur le duc d'Orléans et pluseurs des chambellans. Charité.