DCCCXL

Charles, etc. Savoir faisons à tous, presens et avenir, nous avoir receue l'umble supplicacion de nostre amé Pierre de Breneain1, escuier, capitaine de la Roche sur Ion pour nostre amé et feal le sire de Clichon, contenant que, comme environ la mi karesme l'an mil CCC IIII^XX et XVI, le dit suppliant et sa femme feussent venus du dit lieu de la Roche au lieu de Minières2 lez Saumeur en Anjou, veoir la mere de la femme d'icellui suppliant, qui pour lors estoit malade, et aussi certains heritaiges et possessions qu'ilz avoient prez du dit lieu de Saumur, desquelx heritaiges Jehan de Lezenet3, parent du dit suppliant, avoit eu la garde et gouvernement par aucun temps. Et pendant que le dit suppliant et sa femme demourerent ou dit païs, le dit Lezenet, acompaignié de pluseurs compaignons armés, prindrent [p. 296] de fait Thiphaine du Fou, niepce de Jehan du Fou4, elle estant en la compaignie du dit Jehan du Fou, de sa femme et autres gens, lesquelx s'efforcerent de resqueure la dicte Thiphaine, et pour ce furent, si comme l'en dit, navrez et batus parle dit de Lezenet et ceulx de sa compaignie, qui enmenerent de fait la dicte Tiphaine en un lieu appellé la Fontenelle5, à demie lieue prez du manoir de Minières, appartenant au dit suppliant6. Ou quel lieu le dit de Lezenet envoya quérir ycellui suppliant, qui ala ou dit lieu de Fontenelle, où il trouva ycelle Thiphaine avec ledit de Lizenet, qui lui dist que c'estoit sa femme. Et lors le dit suppliant respondi qu'il l'en amoit mieulx et lui fist bonne chiere. Et tantost après, s'en retourna le dit suppliant [p. 297] au dit lieu de Minieres où sa dicte femme estoit, et se partirent pour aler au dit lieu de la Roche, où ilz trouverent le dit de Lezelet (sic) et la dicte Tiphaine qui se disoit estre sa fiancée. Aus quelx le dit suppliant, sa femme, parens et amis firent très bonne chierre, et aux compaignons, tant au dit lieu de la Roche que ou païs d'environ, par l'espace de huit jours ou environ, depuis ce que ledit Lezenet lui ot dit la maniere du fait dessus dit. Et aprez ce, le dit de Lezenetet la dicte Tiphaine se partirent pour aler en Bretaigne devers les pere et mere du dit de Lezenet, afin de espouser l'un l'autre et faire les solempnitez et noces, comme acoustumé est de faire en tel cas, si comme le dit de Lezenet disoit. Et depuis ce, nostre très chiere et amée tante la royne de Jehrusalem et de Secille7 eust rescript au dit suppliant comment le fait dessus dit avoit esté commis et perpetré en son païs d'Anjou et qu'il feist diligence de savoir et enquerir où estoit la dicte Thiphaine, et que s'il la povoit trouver, il la preist et admenast par devers elle à Angiers, et les dictes lettres receues, se feust le dit suppliant acompaignié de pluseurs personnes et parti pour aler ou dit pais de Bretaigne, pour savoir s'il pourroit trouver la dicte Thiphaine, laquelle il trouva en la ville du Bourc d'Auguen, à quatre lieues prez de Josselin en Bretaigne, et ycelle prist et mena en garde au dit lieu de Josselin, avec la femme du capitaine dudit lieu, où il la laissa, pour doubte que elle ne lui feust rescousse et ostée, et vint le dit suppliant par devers nostre dicte tante au dit lieu d'Angiers, lui dire la diligence qu'il avoit faicte et le lieu où il avoit laissée la dicte Thiphaine. Et tantost après, nostre dicte tante renvoia le dit suppliant avec son cappitaine du chastel du dit lieu d'Angiers et autres ses gens au dit lieu de Josselin, querir la dicte Thiphaine ; laquelle il admenerent [p. 298] par devers nostre dicte tante, qui ycelle a depuis rendue à ses parens et amis, et a esté mariée, si comme l'en dit. Pour occasion du quel fait, les biens d'icellui suppliant ont esté prins et mis en nostre main, et avec ce a esté adjourné à comparoir en personne et de main mise en nostre court de Parlement, pour respondre à Guillemet Laignel, soy disant tuteur et curateur du dit (sic) Jehan de Margie8, à nostre procureur général et à autres qui partie s'en vouldront faire. Et pour ce, le dit suppliant doubtant rigueur de justice, nous a humblement supplié que sur celui vueillons impartir nostre grace. Pour quoy nous, attendu ce que dit est et que le dit suppliant a tousjours esté de bonne vie, renommée et honneste conversacion, sans ce qu'il feust oncques reprins, convaincu ne attaint d'aucun vilain cas, et nous a grandement servi ou fait de noz guerres, et que par sa bonne diligence, la dicte Thiphaine a esté rendue à ses parens et amis saine et entiere, et sans avoir esté corompue ne violée par le dit de Lezenet, ne autre de la compaignie, et a esté depuis et est bien et grandement mariée, si comme on dit, et pour contemplacion du dit sire de Cliçon dont le dit suppliant est famillier, etc., le fait et cas dessus dit, etc., lui avons pardonné, quicté et remis, etc. Si donnons en mandement à noz amez et [p. 299] feaulx conseillers tenans nostre present Parlement et à tous noz autres justiciers, etc. Donné à Paris ou mois d'avril l'an de grace mil CCC IIII^XX et XVIII, et de nostre regne le XVIII^e.
Par le roy, à la relacion du conseil. Chaligaut.