[p. 163]

CCLXV

Don à Philippe du Paile de vingt livres de rente annuelle et perpétuelle sur les cens et coutumes dus au roi à Latillé.

  • B AN JJ. 72, n° 117, fol. 80
  • a P. Guérin, Archives historiques du Poitou, 13, p. 163
D'après a.

Philippes, etc. Savoir faisons à touz, presenz et avenir, que, pour consideracion des bons services que Philippe du Pelle, de Latilly, chevalier, nous a faiz, tant en noz guerres comme en la seneschaucie de Poitou et de Lymozin, en la compaignie de noz amez et feauz Pierre de Rabastain, jadis seneschal de la dite seneschaucie, et de Jourdain de Loubert, à présent seneschal d'icelle seneschaucie, si comme par leurs rapors et tesmoignages et autres dignes de foy nous a apparu, nous au dit Philippe, pour li et pour ses hoirs nez et à nestre, de son propre corps engendrez en loyal mariage, avons donné et donnons, de grace especial, à touz jours mais, pour consideracion des diz services, vint livrées tournois d'annuelle et perpetuelle rente en deniers de cens et coustumes que nous avons en la parroisse de Latilly et entour. Si donnons en mandement au seneschal de Poitou ou à son lieutenant que les dites vint livrées de rente par an li assigne et assoie des diz cens et coustumes, pour li et pour ses diz hoirs, à pranre par leurs mains perpetuelment, et de l'assignacion et assiete que faite en aura baillé au dit chevalier la saisine de par nous et en nom de nous. Et tenront le dit chevalier et ses diz hoirs les dites vint livrées de rente en fié et en homaige de nous et de noz successeurs, rois de France. Et desjà en avons receu en nostre foy et homaige le dit chevalier. Et que ce soit ferme chose et estable à perpetuité, nous avons fait mettre nostre seel en ces lettres. Donné en la priouré Nostre-Dame en Valoys, le tierz jour de novembre, l'an de grace mil ccc. trente et neuf.

Par le roy. Barriere.