[p. 315]

CCCXVII

Nouvelle prorogation d'un an accordée à Raoul II, comte d'Eu et de Guines, connétable de France, pour le rachat de la terre que son père avait vendue au cardinal de Mortemart, dans la châtellenie de Civray.

  • B AN JJ. 269, n° 204, fol. 94
  • a P. Guérin, Archives historiques du Poitou, 13, p. 315-316
D'après a.

Philippes, etc. A tous ceux qui ces lettres verront, salut. Comme nostre chier cousin jadis le conte de Eu, connestable de France, darrainement trespassé, eust vendu, pour cause de sa neccessité et pour nous miex servir, deux cenz livres de terre à tournois en sa chastellenie de Civray, en Poitou, au cardinal d'Aucerre jadis, et depuis les executeurs du [p. 316] testament d'iceli cardinal eussent octroie à nostre dit cousin que il peust rachater et retraire les dictes deux cenz livres de terre dedens certain temps en paiant telle somme d'argent ou de florins comme il en avoit receu, le quel argent les gens de nostre dit cousin avoient assemblé pour faire le dit retrait, mais pour cause de nos guerres convint qu'il fust converti en autres usaiges, et depuis nous li aions continué et aloingnié par aucun temps le dit retrait, si comme en nos lettres est plus à plain contenu, le quel retrait il n'a peu faire pour pluseurs grans missions qu'il a faites pour cause de nos guerres. Savoir faisons que nous avons octroie et octroions, de grace especial et de nostre auctorité royal, à nostre amé et feal cousin, le conte de Eu et de Guynes, connestable de France, filz et hoir de nostre dit cousin, qui sur ce nous a supplié, que le dit retrait et achat il puisse faire jusques à un an du jour de la date de ces lettres, en la maniere que autrefois fu octroie à son dit pere par nos dictes lettres, pourveu que ce pendant les levées de la dicte terre soient à la dicte execucion. Donné à Saint-Germain en Laye, le x e jour de janvier l'an de grace mil ccc. xl. et cinq1.


1 Ces lettres sont copiées une seconde fois au fol. 107 du même registre, mais avec une date un peu postérieure : Données au bois de Vincennes, le xviiie jour de février, l'an de grace mil ccc. xlv. Signées ainsi : par le roy. Verriere.