MXXVI

Charles, par la grace de Dieu roy de France. Savoir faisons à tous, presens et avenir, que, comme pour les grans clameurs qui nous ont esté faictes par les gens des troys estas de nostre royaume et seigneurie à l’encontre d’aucuns particuliers et tenans en leurs compaignies plusieurs gens d’armes et de trait, et autres, faisans grant quantité de roberies et pilleries, lesquelx ont endommaigé et endommaigent continuelment et incessanment noz subgiez, tant marchans et laboureurs que autres de noz païs de Poictou, Xanctonge et Limosin, et autres païs voisins, nous, afin de obvier et pourveoir à ce et faire cesser les dictes pilleries et roberies, ayons mandé et fait venir par devers nous plusieurs barons, seigneurs et autres noz feaulx vassaulx et subgiez, en nostre ville de Poictiers, et par grant et meure deliberacion, ayons fait certains statuz et ordonnances pour faire cesser les dictes pilleries et roberies1, et aussi pour faire cesser plusieurs faulses monnoyes de nouvel mises sus en nostre royaume, sanz nostre congié et licence2. Après la publicacion desquelles [p. 9] ordonnances nostre amé et feal Jehan de la Roche3, escuier, seigneur de Barbesieux et de Mussidan, a juré tenir et garder icelles ordonnances ; et en oultre a juré et promis que doresenavant il ne tendra, soustendra ne favorizera, par soy ne par autres, pilleries ne roberies, ne aucunes gens faisans dommaiges, maulx ne inconveniens quelxconques ès diz païs de Poictou, Xanctonge, Limosin et Angolmoys, ne en autres païs à nous obeissans, et ne tendra gens pour ce faire ; et s’aucuns de ses gens, le [p. 10] bastard de Saint Cyre4, ou autres, tant qu’ils seront de sa compaignie, faisoient le contraire, il en respondra et fera reparer, et baillera ses dictes gens ès mains des officiers de la justice des lieux où ses dictes gens auront fait les diz malefices ; et s’ilz estoient despartiz de sa dicte compaignie, il fera son loyal povoir de faire reparer les diz cas qui auront esté ou seront par eulx commis, et de les bailler à justice ; et obeira aux gens de nostre dicte justice, tant de nostre court de Parlement comme à noz seneschaulx et autres officiers, et leur fera faire ouverture de ses places pour avoir les malfaicteurs, quand il en sera par eulx requis. Et fera et aura fait vuider toutes ses gens, dedens quinze jours prouchainement venans, de toutes les forteresses, esglises et maisons fortes que lui ou ses dictes gens tiennent et occupent ès diz païs, et icelles mettra et fera mettre reaument et de fait en nostre main, excepté celles qui sont l’eritage de son pere et de lui, c’est assavoir Barbesieux, le Vivier Jussault et aussi les places de Montendre, la Tour Blanche, Mussidan, Puy Normant et Engolesme5. Et en oultre il ne donnera ne souffrera donner par aucuns de [p. 11] ses gens quelxconques sauf conduiz, souffrances ne aucunes seurtez à nulz de noz subgiez, ne prendra ne souffrera prendre par les dictes gens, le bastart de Saint Cyre ne autres de ses dictes gens, vivres, apatiz ne rençonnemens sur nosdiz subgiez ; et delivrera quictes et sans rançon ou finance tous les prisonniers qui sont èsdictes places, et ne prandront ou emporteront, lui ne ses dictes gens, aucuns des biens des bonnes gens qui sont demourans ou retraiz en icelles. Et avec ce, a promis et juré que ès places de son dit pere ne de lui, qui sont deça la riviere de Charante, il ne tendra aucunes garnisons de gens [de guerre], mais seulement y tendra gens pour la garde d’icelles et les fera garder aux despens de la revenue d’icelles, et ne prendront riens ceulx qui y seront sur noz hommes et subgiez, à nous obeissans, ne sur leurs terres ; et ne leur mettra charges ne redevances, sans le congié et licence de nous. Et avec ce, fera presentement vuider toutes les gens qu’il tient ès places dessus nommées, lesquelles ne sont point exceptées ne reservées, et toutes gens qu’il tient sur les champs et de son adveu èsdiz païs, et les fera logier ès dictes places de Barbesieux, Montendre, la Tour Blanche et Puynormant, sans retorner pour prendre vivre ne faire autres maux ne exactions sur nos diz subgiez et obeissans, où qu’ilz soient. Et en oultre, nous a promis et juré le dit Jehan de la Roche que, toutes et quantes foiz que nous passerons oultre la riviere de Saine, il passera et vendra avec nous avec le nombre de gens d’armes et de traict qu’il pourra finer, ses dictes places gardées ; ausquelx nous ferons faire paiement, comme aux autres qui passeront avecques nous. Et en oultre, nous a juré et promis le dit de la Roche que, en lui baillant Hervy le Chastel ou autre place de la riviere de Saine convenable pour le logeiz de luy et de ses gens, avecques la somme de mille frans, incontinent qu’il sera de ce acertenné, il partira avecques tout le plus grant nombre de gens qu’il pourra en sa compaignie, [p. 12] et les menera oultre la dicte riviere de Saine. Toutes6 lesquelles choses le dit Jehan de la Roche nous a promises et jurées sollennement, en presence de pluseurs de nostre sang et gens de nostre grant conseil et de nostre court de Parlement, de pluseurs gens d’esglise, nobles, bourgeois et autres en bien grant nombre. Et nous a très humblement supplié et requis le dit de la Roche que, moiennant ce, tous les excès, crimes et malefices, roberies, pilleries, meurtres, aggressions de chemins et forcemens de femmes, sacrileges, abrasemens d’esglises et autres edifices, et maulx par luy et autres de sa dicte compaignie faiz et commis, luy voulsissions remettre, quicter et pardonner, et par forme de abolission iceulx crimes et malefices effacer et abolir, especialment à luy, à Regnault Chabot7, Jehannot Chabot, Brisset de Saint Cire, chevalier, Jehan de Peruce8 bastard, Guillaume Parceval9, Colas Barbastre, Pierre Auneau, Boniface Tistin, Heliot de Lavau, Jehan Paquaut10, Laurent Faure, Perenot de la Guirande11, Jehan Helie12, Symonnet de Boyn, Jehan d’Aragon, [p. 13] Jehan de la Mare, Cabouche, Jehan Saunier, Jehan Le Clerc, Jehannet des Cars, bastart, Jehan Goussart, Colin du Pin13, Pierre Quenault, Pierre de Saint Jalais14, Yvoys de Barro15, le Bourgoignon, Jehan Desmier16, Pierre Aubaneau, Jehan Pichier17, Mery du Chastelier, Jehan de Saint Martin18, Ferminat, Pierre Clerc Saint Jame, Thomas Rosseleau, Jehan Richart, Pierre de la Croix19, Petit Pierre, Jehan de Poictou20, Pierre de Baille, le Normant, Olivier Mousse, Petit Jehannin, Jehan d’Acy, Colinet, [p. 14] Perrinet du Bois21, Touchart Aubert, Jehan Doublet, Jehan Guenault, Jehan de Tillo, Jehan Martin, de Saint Georges de Longuepierre, Thomas de la Court22, Michau Perrinet, Gilet Rousseau, le bastart de Laligier23, Estor des Essars24, le bastart de la Porte, Olivier, Maurice Lalant, ung nommé Calo, Mery Queroy, Jamet Chapelle, Guillaume de l’Espinas, Jehan Paillier, Artus Guillen, de Laleu, Jehan Otier, Fargon, Jacoton, Jamet l’Escossais, Guillaume François25, Joachin Belivier26, Jehan Caille, Pierre Larcher, Mery Villeneufve, [p. 15] Olivier Villeneufve, Loys Michau, Guion Faideau27, Jehan de Saint Benoist, Caillaut28, Jehan Minaut, Besselance, Jehan Sabin, Richart, Jehan de Tillo, Macias de Tillo, Tenot Bonin29, Jehan Herodeau, Anthoine du Pesle30, Perrenet de Mery, Jehan d’Azay, Guillaume Robert, Heliot Menin, Jehan Palete, Colin de Mere, le bastart du Sable, Perrinet Grasset31, Franqueville, Jehan Grangier et Granchier (sic), son frere, Petit André Migroget, Bernart de la Fousse, François Vigier, Guillaume de la Tour, Jehan Le Blanc, Jehan Saunier, [p. 16] Perrinet de Joigny, Alain Mery du Chastelar, Bertrand de Bouteville, Pierre, son frere, Perrinet Chauvet32, Pierre Quentan, Robin Brizejon, Capd’osteau, [de] Limalongue, le Rasle, mestre Jehan Bonnier, Recidat33, Petit Jehan, Arnault de Bazillac, Casaudet, Jehannot Calart, Pierre Marchant, Pierre Morin, Yvonet d’Agonnois, le Grant Colin, Jehan d’Aubigné, Jehan Herbert34, Evrat Bigot35, Jehan Moreau36, Beguinaut, George Valentin, Guy l’Escossois, Jehan Prevost, Heliot Robert, le Grant Paton, le Petit Paton, Chery Escossez, Jehan Montagu, Chaumont, Guillaume de la Faye, Jehan du Brueil37, Heliot de Pantro, Saussay, Jehan de Nolet, Guillon François, Thomin de Chaufour, Hevrart Lestap, le Camus, Jehan Jobert38, Jehan de Mailly, le Grant Jehannin, Pierre Pacaut, Jehan Guillart, Jehan Chattaigner39, le Grant Olivier, le bastart de Leve, André Mulot, Jehan Le Madre et autres quelxconques40, estans de present de sa dicte compaignie, et [p. 17] aussi lui remettre, quicter, pardonner et abolir le crime et offense qu’il a commis envers nous et nostre magesté royal, à l’occasion de ce qu’il a fait batre, sans noz congié et licence, monnoye tant d’or que d’argent en la ville d’Angolesme, de mendre poix et loy que ne sont noz monnoyes, et à la impression et coings de nos dictes monnoyes aians cours en nostre royaume41.

Pour quoy nous, ayans consideracion à ce que ledit Jehan de la Roche s’est employé bien et voulentiers, dès le temps de sa jeunesse, en nostre service et a fait pluseurs destrousses sur noz ennemis, et avecques ce a prins pluseurs chasteaulx et forteresses qui estoient occuppées par iceulx nos diz ennemis, ès païs de Gascoigne, Xanctonge et Angolmois, desquelles il a prins les aucunes par sieges, par lui et autres du païs tenuz devant iceulx chasteaulx et forteresses, les autres prins par assault et par force ; et aussi eu consideracion aux bons et notables services faiz à nous et à noz predecesseurs roys de France par le pere42 et [p. 18] autres predecesseurs du dit suppliant, et à la très grant priere et supplicacion d’aucuns grans seigneurs, ses parens et amis, qui nous ont très instanment supplié et requis, audit Jehan de la Roche et autres dessus nommez et tous autres de sa dicte compaignie, et à chascun, avons, par forme de abolicion les diz crimes et malefices, tant de pilleries, roberies, meurtres, efforceis de femmes, aggressions de chemins, insultacions et assaulx d’eglises, abrasemens, sacrileges et autres crimes quelxconques, par eulx et chascun d’eulx commis et perpetrés par entreprise, voye de fait et autrement, avecques l’offense faicte et commise par ledit Jehan de la Roche, à cause des dictes faulses monnoyes, remis, quicté et pardonné, quictons, remettons, par donnons et abolissons par ces mesmes presentes, avec toute paine et offense que, pour occasion des choses dessus dictes, il et les dessus nommez et autres de sadicte compaignie ont encouru envers nous et justice, et, de plaine puissance et auctorité royal, iceulx crimez et deliz abolissons et effaçons, et voulons du tout estre aboliz et effacés, et sans ce que ledit Jehan de la Roche, les dessus nommez et autres de sa dicte compaignie soient [p. 19] aucunement tenuz d’iceulx crimes autrement specifier ne declairer ; ainçois voulons et nous plaist que ces presentes leur soient d’autel valeur et effect, comme si tous et chascuns les diz [crimes] et malefices par eulx commis et perpetrez ès choses dessus dictes et chascune d’icelles nous avoient esté exprimez et estoient en ces presentes expressement et nommement specifiez et declairez. En imposant sur ce scilence pepetuel à nostre procureur et tous autres. Et en faveur des choses dessus dictes, voulons et ordonnons, et mandons à noz seneschaulx de Poictou, Xanctonge et Limosin, et à touz noz autres seneschaulx et gouverneurs que, s’aucuns rotiers, gens d’armes et de trait venoient èsdiz païs, pour courir sus au dit de la Roche, qu’ilz lui donnent conseil, confort et aide, et le gardent d’oppression, violence et voye de fait, à tout leur povoir. Si donnons en mandement par ces dictes presentes à noz amez et feaulx conseilliers les gens tenans nostre Parlement et qui tiendront ceulx avenir, que de nostre presente grace, abolission, remission et octroy facent, seuffrent et laissent joir et user plainement et paisiblement ledit Jehan de la Roche, les dessus nommez et tous autres de sa dicte compaignie, sanz leur faire ou donner ne souffrir estre fait ou donné, en corps ne en biens, ores ne ou temps avenir aucun empeschement ou destourbier au contraire ; ainçois si les dessus diz ou aucun d’eulx, leurs biens ou d’aucuns d’eulx estoient pour ce saisiz, arrestez, detenuz ou empeschez, pour les causes dessus dictes ou aucunes d’icelles, les mettent ou facent mettre tantost et sans delay à plaine delivrance, et noz presentes lettres facent publier en nostre dicte court de Parlement et enregistrer ès registres d’icelle, à memoire perpetuel. Au vidimus des quelles, fait soubz scel royal ou autre autentique, nous voulons plaine foy estre adjoustée, comme à l’original. Et de nostre plus ample grace voulons et nous plaist, et au dit Jehan de la Roche et autres dessus nommez, et tous autres de sa dicte [p. 20] compaignie, avons octroyé et octroyons par ces mesmes presentes que la dicte publicacion qui de ses dictes presentes sera faicte en nostre dicte court de Parlement leur vaille, et à chascun d’eulx, plainiere verificacion, sans ce qu’ilz soient tenuz de autrement les verifier, ne pour ce comparoir personnelment en la dicte court. Et afin que ce soit chose ferme et estable à tousjours mais, nous avons fait mettre nostre seel à ces presentes. Donné à Poictiers, le ix^e jour du mois d’avril l’an de grace mil quatre cens trente et ung, et de nostre regne le neufviesme.

Ainsi signée : Par le roy en son conseil. Malliere. Visa.

Lecta Pictavis in camera Perlamenti. Et ibidem juravit Johannes de la Roche complere et observare articulos de quibus in albo fit mencio, die sabbati xxi^a mensis aprilis anno Domini millesimo quadringentesimo xxxi°.