MCCLXXIX

Charles, etc. Savoir faisons, etc., nous avoir receu ['umble supplicacion de Jehan de Vivonne1 escuier, à present detenu prisonnier ès prisons de la Conciergerie de nostre Palaiz à Paris, contenant que, tant à l'occasion de certain gros procès qu'il a eu à rencontre de nostre amé [p. 33] et feal l'evesque de Luxon2 en quoy il a moult frayé et despendu, que de ce qu'il a esté detenu longuement maladie qui lui a beaucoup cousté, que aussi qu'il est homme de petite conduite et gouvernement ou fait de sa despence, il s'est fort endebté, et a vendu sur lui à Emery Bertin3, de Fontenay, et à autres certaine grant rente, et doubtant que, se ladicte rente couroit sur lui, sa terre de l'Oblouynière fust vendue à vil pris, se trahy jà pieçà par devers feue nostre cousine Ysabeau de Vivonne, dame d'Avaugour, de Thors, des Essars4 de laquelle il estoit prouchain [p. 34] parent, la pria et requist qu'elle voulsist achetter lesdites rentes, à ce que la dicte terre ne fust perdue, ce qu'elle fist. Et après ces choses, il fut conseillé par maistre Jehan Macaire5, lors son seneschal de la dicte terre de la Blouynière, pour demourer quicte envers la dicte de Vivonne de la dicte rente qu'elle avoit droit de prendre sur lui, des arrerages qui lui en povoit devoir, et moiennant viii^e escuz qu'elle lui bailla content, que aussi qu'elle lui donna droit de chastellenie et seaulx aux contractz, et certains ses hommes pour estre gaystables à son chastel de la Blouynière, il lui donna et transporta sa dicte terre et seigneurie de la Blouynière, retenu l'usuffruit sa vie durant seulement. Après laquelle donacion ainsi faicte et que elle fut venue à la notice des amis dudit suppliant, et qui le blasmèrent d'avoir fait ladicte donnacion, le dit suppliant deist audit maistre Jehan Macaire, son seneschal, qu'il l'avoit mal conseillé de lui avoir fait faire la dicte donnacion et que toute la charge en estoit sur lui. Et alors ledit Macaire dist qu'il y pourverroit bien et demanda audit [p. 35] suppliant s'il avoit la lettre du droit de chastellenie que ladicte Ysabeau de Vivonne lui avoit donné ; lequel dist que oy. Lequel Macaire dist à icelluy suppliant qu'il les lui portast, et que les notaires qui avoient passé le contract de la dicte donnacion, qu'il avoit faicte à icelle Ysabeau, estoient ceulx qui avoient passsé les lettres du don du droit de la dicte chastellenie, que icelle Ysabeau de Vivonne avoit donné à icellui suppliant, qui estoit signées des seings manuelz de Guillaume Furet et de Jehan Loys, notaires aux contractz de Boussac. Et fist icellui Macaire une minute d'une lettre de revocacion dudit don, laquelle il bailla audit suppliant...6, lui deist qu'il lui feist faire et grossoyer, et qu'il la lui envoyast en sa maison, et que on ne pourrait faillir à contrefaire les seings des diz notaires, puisqu'on les avoit. Lequel suppliant envoya querir ung nommé Thibault Legendre, auquel il fist grosser ladicte minute en parchemin et en feist deux grosses, jasoit ce que ledit suppliant cuidast qu'il n'en eust fait que une. Et après ce, icellui suppliant demanda à ung de ses serviteurs, nommé Bertran, natif de Saint Laurens sur Sèvre, s'il savoit qu'il y eust aucun bon escripvain audit lieu; lequel respondi que oy. Et lors ledit suppliant lui bailla une coppie de la dicte lettre pour lui aler faire grosser et lui bailla argent pour ce faire. Lequel serviteur dudit suppliant apporta à icellui suppliant deux grosses de la dicte lettre, faictes à Mortagne sur Sèvre; lequel les envoya audit Macaire en sa maison, ala Macayère. Lequel Macaire s'en ala tenir les assises à Montagu. Et ce pendant survint ung nommé, maistre Jehan Bertrand, praticien à Saincte Secille, dont le dit suppliant est de parroisse, pour une journée qui estoit entreprise entre certains gentilz hommes. Et en alant ledit suppliant à la messe audit lieu de Saincte Secille, rancontra icellui maistre [p. 36] Jehan Bertran, auquel il demanda qui l'avoit là mené, qui lui respondi qu'il y estoit venu pour certaine journée entreprinse d'un debat qui estoit entre certains gentilz hommes du païs. Auquel Bertran ledit suppliant dist que, s'il s'en aloit sans le venir veoir en sa maison et boire de son vin, que jamais ne l'ameroit. Lequel Bertran fut veoir ledit suppliant en son hostel de la Blouynière, et lui estant audit hostel, ledit suppliant lui compta le contract et donnacion qu'il avoit faicte à la dicte Ysabeau de Vivonne, et lui pria qu'il lui fist une minute de revocacion dudit don, et la lui fist le plus se ver et prouffitable qu'il pourroit, affin que ses heritieis ne puissent venir au contraire. Lequel maistre Jehan Bertran fist ladicte minute, où il mist que, si les heritiers de ladicte damoiselle Ysabeau aloient au contraire, ilz encourussent la peine ou (sic) la tierce partie de tous les heritages de la dite feue Ysabeau de Vivonne. Et bailla ledit Bertran ladite minute audit suppliant et lui demanda s'il avoit plus que faire de lui ; auquel il dist que non. Et assez tost après, retourna ledit Macaire dudit Montagu, où il avoit tenu les assises, et fut audit lieu de la Blouinière tenir les assises dudit suppliant. Et quant il y fut, ledit suppliant lui deist telles parolles : «Et puis, se fera bien la besongne? » Lequel Macaire respondi qu'il estoit seur qu'elle se feroit bien, et que cellui qui la faisoit se devoit rendre à son hostel à la Macairière, et lui devoit apporter les besongnes toutes prestes. Et après ce, ledit suppliant dist audit Macaire que, depuis qu'il avoient parlé ensemble, maistre Jehan Bertran estoit venu audit lieu de la Blouynière et lui avoit fait une minute sur la matière qu'il savoit. Laquelle minute ledit suppliant monstra audit Macaire. Lequel la lut et, après ce, dist audit suppliant qu'elle valoit mieulx et estoit plus seure que celle qu'il avoit faicte; et emporta icelle minute et se chargea la faire grosser et signer. Et depuis ce que cellui qui devoit [p. 37] apporter les autres lettres signées fust venu en l'ostel dudit Macaire, icellui Macaire le demanda audit suppliant et qu'il ala par devers lui à sa maison de la Macairière et apportast x. escuz, ce que fist le dit suppliant ; et quant il y fut, ledit Macaire lui monstra celluy qui avoit contrefait les seings des notaires, que on nommoit Jehan ou Guillaume Lemée, et le dit suppliant demanda audit Macaire se c'estoit celluy qui devoit faire les besongnes, qui lui dist que oy. Et alors ledit Macaire dist audit suppliant que, quant ledit Mée yroit à sa maison qu'il lui feist bonne chière et congneust le plaisir qu'il lui faisoit, qui dist que si feroit il. Et demourèrent toutes lesdites lettres entre les mains dudit Macaire plus d'un quart d'an, par ce que ledit Macaire les voult avoir devers lui, jusques à ce que ladicte damoiselle Ysabeau fust trespassée. Lequel Macaire dist audit suppliant qu'il lui diroit quant il seroit temps de lui aider desdites lettres. Et après ce que ladite demoiselle Ysabeau fut trespassée, ledit Macaire porta lesdites lettres audit suppliant et lui dist qu'il les gardast bien, par especial la grande qui parloit de la tierce partie ; et au regart des autres, lui dist qu'elles ne lui servoient de riens. Lequel suppliant mist lesdites lettres en son hostel, en certains coffres. Et après ce, pour certain debat qui survint entre nostre amé et feal conseiller l'evesque de Luxon et ledit suppliant, et à la requeste de nostre dit conseiller et de noz officiers en Poictou, certains noz officiers, ledit suppliant estant absent et hors de sa dicte maison, entrèrent dedans icelle, la mirent en nostre main, rompirent les coffres dudit suppliant, prindrent ses biens et entre autres choses deux des dictes lettres et une coppie qui furent baillées à nostre dit cousin7 le conte de Penthevre. Et au regart de la grant lettre parlant de la tierce [p. 38] partie, elle cheut en autres mains et fut rendue audit suppliant par ung nommé Guillaume François, soubz umbre de certaine monicion que ledit suppliant fist publier contre tous ceulx qui auroient prins ses biens. Et quant ledit suppliant ot recouvert la dicte lettre, il envoya querir le dit maistre Jehan Macaire et la lui monstra. Lequel Macaire en fut bien joyeulx et dist audit suppliant que en fist faire trois ou quatre vidimus, et après lui portast l'original desdites lettres, ce que ledit suppliant fist. Et lors ledit Macaire dist audit suppliant que, s'il vouloit, il s'aideroit desdites lettres. Lequel suppliant lui demanda la manière comment, et ledit Macaire deist que Gilles Boissière, serviteur de la dite damoiselle Ysabeau, et lequel elle aymoit bien et se fioit en lui, estoit trespassé, et que ledit suppliant diroit que ledit Boissière lui avoit apporté de par ladite Ysabeau toutes lesdites lettres. Et après ledit Macaire cheust malade ou lit, de la maladie dont il trespassa, et, lui estant ainsi malade, manda querir ledit suppliant et lui bailla ladicte lettre, et lui dist telles parolles : « Monseigneur, je vous pry que tenez à mon filz ce que vous lui avez promis ». Lequel suppliant, comme dit est, en feist faire quatre grosses ou vidimus de la dite lettre par Colas Regnault, sans ce que ledit suppliant ait fait autre chose des dites lettres et coppies, ne que d'icelles il se soit aucunement aidé. Neantmoins puis naguères et après ce s'en ala ledit compaignon et oncques puis ne le veist ledit suppliant. Et après le trespas de ladicte Ysabeau de Vivonne, nostre chier et amé cousin Jehan de Brosse8 chevalier, [p. 39] conte de Penthèvre, et Nicole de Bretaigne, sa femme, estans advertiz que ledit suppliant avoit lesdites lettres, jasoit ce que d'icelles il ne se fust aidé en aucune manière, comme dit est, ont obtenu de nostre chancellerie lettres, par vertu desquelles, informacion precedent, ledit suppliant a esté adjorné à comparoir en personne par devant noz amez et feaulx conseillers les gens tenans les requestes de nostre Palais à Paris. Par devant lesquelz il a comparu et a esté par eulx interrogué sur ledit cas par diverses foiz, et a nyé par serement avoir fait faire les diz seings et contrefait les dites lettres. Et depuis a, par leur ordonnance, esté constitué prisonnier et a cogneu et confessé avoir commis et perpetré le dit cas et fait contrefaire les diz seings desdiz notaires par la manière dessus declairée. Et combien que desdites lettres il ne se fust ne soit aucunement aidé contre nosdiz cousin et cousine, le conte et contesse de Penthèvre, ne semblablement contre feue Ysabeau de Vivonne, mère de nostre dite cousine, et qu'il ait fait grosser et signer les dites lettres par simplesse et exortacion d'autruy etc., nous lui vueillons impartir nostre grace. Pour ce est il que nous, voulans misericorde preferer à rigueur de justice, audit suppliant avons ou cas dessus dit quicté, remis et pardonné, etc. Si donnons en mandement, par ces presentes, à noz amez et feaulx conseiller les gens tenans les requestes de nostre Palaiz à Paris et à tous noz autres justiciers, etc. Donné à Saint Poursain, [p. 40] le sixiesme jour d'aoust l'an de grace mil cccc. lvii. et de nostre règne le xxxv^e.

Ainsi signé : Par le roy, à la relacion du conseil. Rolant. — Visa. Contentor.