MCCCXXVI

Charles, par la grace de Dieu roy de France. Savoir faisons à tous, presens et avenir, nous avoir receue l'umble supplicacion de Laurent Boutin, franc archier, demourant à Chabans, chargié de femme et de trois petiz enfans, contenant que, cinq ans a ou environ, ung nommé Jehan de Saint Remy, aussi franc archier, qui est cault, subtil et malicieux, se transporta par devers ledit suppliant, qui estoit povre simple homme, lequel nous a servi ès reductions par nous, graces à Dieu, faictes en nostre obeissance de noz païs et duchez de Normandie et de Guienne, et luy dist telles parolles ou semblables en substance : « Tu es povre et meschant homme et n'as de quoy vivre et nourrir ton mesnaige. Se tu me veulx croire, parle sang Dieu, toy et moy serons riches à jamais. Se tu veulx venir avec moy et en ma compaignie trois mois, où je te meneray, nous aurons beaucop de biens ». Lequel suppliant, qui ne savoit et ne scet aucun mestier, de quoy il peust gangner la vie de luy, sa femme et enfans, et desiroit guaigner, luy dist qu'il estoit content et d'accord de faire ce qu'il luy commanderoit, et aler où il vouldroit aler. Et après ce, [p. 206] s'en ala icelluy suppliant avec ledit de Saint Remy, Jehan Chabans et Denis Olivier, aliez et complices dudit de Saint Remy, en la parroisse de Bouillié près Nyort, où ilz prindrent certaine quantité de froment, dont ledit suppliant eut en sa part six boisseaux ou environ. Et après se transportèrent ledit suppliant et les autres dessus nommez en l'ostel d'un nommé Jehan Picart, de Soiché près dudit lieu de Nyort, ouquel hostel ilz prindrent autre grant quantité de blé, appellé mesture, dont icelluy suppliant eut en sa part dix boisseaux ; et ce fait, se transportèrent les dessusdiz et suppliant au port de Nyort, et ilec prindrent en la saunière de Milors de Poictiers1 certaine quantité de sel, duquel sel icelluy suppliant eut en sa part six boisseaux. Et aussi se transportèrent les dessusdiz et suppliant en ung bourc appellé Ruffigné en la chastellenie de Saint Mexant, où ilz prindrent certaine autre quantité de froment en l'ostel des Ypeaux dudit lieu de Ruffigné, dont ledit suppliant eut en sa part dix boisseaux. Et depuis ledit suppliant se transporta, en la compaignie d'un nommé Jehan des Lignes, aussi franc archier, en ung certain lieu, où ilz ostèrent à ung nommé Martin Greusset, prebstre, chappellain de maistre Jehan Giller2, ung cheval[p. 207] qui valoit bien environ six escus, lequel cheval a esté depuis rendu audit Greusset, prebstre, et aussi a satisfait à ceulx à qui il povoit estre tenu à cause de ce que dit est. Pour occasion desquelz cas, ledit suppliant n'oseroit, doubtant rigueur de justice, bonnement converser ne repairer au païs, se noz grace et misericorde ne luy estoient sur ce par nous imparties, requerans humblement que, attendu qu'il a satisfait aux parties, sans à ce avoir esté contrainct, et que la grant povreté en quoy il estoit lors [p. 208] luy firent faire lesdiz larrecins, moyennant l'avertissement que luy en fist ledit de Saint Remy, aussi que en tous autres cas il est bien fame et renommé, et ne fut jamais actaint ne convaincu d'aucun autre villain cas, blasme ou reprouche, il nous plaise luy impartir nosdictes grace et misericorde. Pour ce est il que nous, ces choses considerées, voulans misericorde preferer à rigueur de justice, audit suppliant, en faveur de sesdiz femme et enfans, et des services qu'il nous a faiz èsdictes redduccions, avons lesdiz larrecins dessus declairez oudit cas quictez, remis et pardonnez, etc. Si donnons en mandement, par ces presentes, au seneschal de Poictou ou à son lieutenant et à tous noz autres justiciers, etc. Donné à Chinon, ou mois de novembre l'an de grace mil cccc. cinquante neuf, et de nostre règne le xxxviii^e.

Ainsi signé : Par le roy, a la relacion du conseil. A. Rolant. — Visa. Contentor.