CCCCLXXX

Charles, etc. Savoir faisons à tous, presens et avenir, que comme par le traitié du mariage fait entre nostre très chier et amé frere le conte de Harecourt1 et nostre seur la contesse, sa femme, nous eussions promis à nostre dit frere à li donner et asseoir deux mille livres de rente à tournois, et à present soit venu en nostre main le chastel et ville de Saint Blancey, avecques toutes ses appartenances et appendances, à nous forfait et acquis pour ce que le sire de Partenoy, de qui le chastel estoit, de son heritage, est nostre desobeissant et rebelle, et tient contre nous la partie des ennemis2, nous les diz ville et chastel et toutes ses appartenances et appendances, en quelconques proufis, rentes et revenues qu'il soient, avons assigné, baillié et delivré, assignons, baillions et delivrons à nostre dit frere, en deduisant le pris qu'il seront prisiés de la dicte somme de deux mille livrez de terre, à tenir et possider par lui, ses hoirs, successeurs ou aians cause de lui, perpetuelment et heritablement, comme sien propre et de son heritage, ou jusques à tant que en autres lieux nous li aions baillié et assigné les dictes deux mille livres de terre. Si donnons en [p. 18] mandement à noz amez et feaulx gens de nos comptes que les diz ville et chastel, appartenances et appendances d'iceulx faicent bailler et delivrer à nostre dit frere, ou pris et estimacion qu'il pourront valoir, et ycellui pris et estimacion deduisent et faicent deduire du prix des dictes deux mille livres de terre que asseoir lui devions, et au seneschal de Tourainne, d'Anjou et du Maine, et à touz noz autres justiciers, à qui il appartendra, ou à leurs lieux tenans, et à chascun d'eulx, que les diz ville et chastel, appartenances et appendences, baillent et delivrent à nostre dit frere, ou à son certain commandement, et d'iceulx le meittent en possession et saisine, et l'en facent jouir et user paisiblement de ci en avant, sans contredit ou empeschement aucun. Et que ce soit ferme chose et estable à tous jours, nous avons fait mettre nostre seel à ces presentes. Sauf en autres choses nostre droit et l'autrui en toutes. Donné en nostre chastel du Louvre lez Paris, l'an de grace mil trois cens soixante nuef, et de nostre regne le sizieme, ou mois de novembre.

Par le roy, vous present. N. de Verres.