DXLVI
Don au sire de Parthenay des biens de ses sujets qui ont été confisqués pour crime de lèse-majesté, ou qui le seront jusqu'à la fête de la Purification prochaine.
- B AN JJ. 103, n° 357, fol. 172 v°
- a P. Guérin, Archives historiques du Poitou, 19, p. 251-253
Karolus, Dei gracia Francorum rex. Notum facimus universis, presentibus et futuris, quod nos, consideracione serviciorum per dilectum et fidelem nostrum dominum de Perteniaco, militem, et ejus predecessores nobis et predecessoribus nostris, retroactis temporibus, guerras presentes precedentibus, laudabiliter impensorum, quodque [p. 252] per dictum militem qui ex zelo pure devocionis et fidei, quem ad nos et regiam nostram magestatem semper habuit, juribus superioritatis nostre ducatus Aquittanie agnitis, ad fidem et obedienciam nostram se reduxit, impendi speramus in futurum, prefato domino de Parteniaco, pro se et suis heredibus et suecessoribus, et causam ab ipsis habentibus perpetuo, bona mobilia et inmobilia quecumque et in quibuscunque rebus consistant, nobis pertinentibus causa et occasione criminis lese majestatis erga nos et nostram regiam magestatem [per] subditos dicti militis quoscunque commissa, et usque ad instans festum Purificacionis beate Marie imposterum committenda, tam in feodis quam retrofeodis et ressortis quibuscunque dicti militis, et in quacunque parte regni nostri predicta bona consistant, dedimus et concessimus, damusque et concedimus, de nostris certa sciencia et auctoritate regia, per presentes, per ipsum dominum de Perteniaco suosque heredes et successores, et causam ab ipsis habentes et habituros perpetuo, dicta bona mobilia et inmobilia ad nos causa et occasione predictis pertinentia et que pertinere poterunt, hinc ad festum Purificacionis predictum, tanquam bona sua propria tenenda, possidenda et habenda. Quapropter dilectis et fidelibus gentibus Camere compotorum nostrorum Parisius, senescallo Pictavensi ceterisque justiciariis et officiariis regni nostri, presentibus et futuris, prout ad ipsos et eorum quemlibet pertinuerit, damus tenore presentium in mandatis quatinus dictum dominum de Pertiniaco, heredesque et successores suos, et causam ab ipsis habentes et habituros perpetuo, nostra presenti gracia uti et gaudere faciant et permittant pacifice et quiete. Non obstantibus quibuscunque donis de dictis bonis, sic nobis predictis de causis pertinentibus et aquisitis, ac usque ad dictum festum Purificacionis aquirendis, per nos aut locum tenentes nostros vel alios, aliis personis factis, donis et graciis per nos dicto domino de Perteniaco [p. 253] factis, et faciendis quibuscunque. Quod ut firmum et stabile perpetuo perseveret, sigillum nostrum hiis presentibus duximus apponendum. Salvo in aliis jure nostro et in omnibus quolibet alieno. Datum Parisius, mense decembris anno Domini millesimo ccc. lxxii, regni vero nostri nono.
Per regem. T. Hocie.
