DL

Charles, par la grace de Dieu roy de France. Savoir faisons à tous, presens et avenir, que, comme le chastel et la ville de Saint Georges de Resse, en la seneschaucie de Saintonge, assis à trois lieues de la ville de Nyort, laquelle tiennent encores à present noz ennemis1, ayent esté et encores soient chascun jour moult dommages et moult gastés pour cause de noz guerres tant passées comme presentes, et ou pays d'environ yceulx chastel et ville soient pluseurs villages qui soloient estres pueplés et bien multipliez de gens, les quiex pour cause des dictes guerres se [p. 261] sont retraiz ou dit chastel, les quiex villages sont moult loing des lieux où sont les foires et marchiez, pour quoy grant travail et grant grief est aus habitans de yceulx villages d'aler achater à deux ou trois grans lieues de leurs hostelx ce qui leur est necessaire, et aussi n'a ou dit pays, ne environ près à trois lieues, aucun marchié qui y soit au jour du lundi, pour quoy grant aise et grant prouffit seroit aus dis habitans de environ les dis chastel et ville de Saint George que ou dit lieu de Saint George eust marchié, chascun lundi, et trois foires par trois jours en l'an, si comme par nostre amé et feal chevalier, Jehan de Chasteignier2, seigneur des diz chastel et ville de Saint George, le quel est de nouvel venu à nostre obeissance, nous a esté signifié, en nous suppliant humblement que les dis marchié et foires li vousissions octroier. Nous, eue consideracion à tout ce que dit est, enclinans gracieusement à la supplicacion de nostre dit chevalier, li avons octroié et octroions par ces presentes, de nostre auctorité royal, de nostre certaine [p. 262] science et grace especial, pour lui, ses hoirs et successeurs, et ceulx qui de lui auront cause, qu'il puisse d'ores en avant faire et establir apperpetuité, en sa dicte ville de Saint George, un marchié qui y soit et dure à tous jours mès, chascun lundi, et aussi y puisse mettre et establir trois foires par trois [jours] en l'an, c'est assavoir chascune foire par un jour en tel temps comme il verra que il sera plus aisié et plus proufitable pour les habitans du pays, sens prejudice d'autruy, et qu'il ait la juridicion et [co]hercion des marchans et de tous autres delinquans ès dis marchiez et foires, selon l'usage et coustume du dit pays3. Si donnons en mandement par ces presentes au seneschal de Saintonge, ou à son lieutenant, et à tous autres noz justiciers et officiers qui à present sont et seront ou temps avenir ou dit pays, et à chascun de yceulx, que de nostre dicte grace laissent et facent user et joir paisiblement et perpetuelment le dit chevalier, ses hoirs et successeurs ou dit lieu de Saint George, sens leur y mettre ne souffrir estre mis ores ou ès temps avenir aucun empeschement. Et pour ce que ce soit ferme chose et estable à tousjours mès, nous avons fait mettre nostre seel à ces presentes. Sauf en autres choses nostre droit et l'autrui en toutes. Donné à Paris, en nostre chastel du Louvre, le secont jour de janvier l'an de grace mil ccc. lxxii. et de nostre regne le ix^e.

Par le roy, en son conseil. P. Blanchet.