DLVIII

Charles, etc. Savoir faisons à touz, presens et avenir, que comme le sire de Mucidan1, du quel nous sommes seigneur [p. 297] souverain et droiturier, se soit rendu nostre rebelle et desobeissant en ce que il a tenu le parti de nostre adversaire d'Angleterre, en la guerre que il nous a nouvellement meue, et se soit armez et ait fait guerre contre nous et noz subgiez, comme adherent, allié et de l'obeissance de nostre dit adversaire, en commettant crime de lèse majesté envers nous, par quoy le chastel et chastellenie de Saincte Enomoye en Poitou, que il tenoit, et toutes les autres terres et possessions que il tenoit et tient en nostre royaume, en quelque povoir et jurisdicion que ce soit, nous sont acquis et confisquiez ; nous, pour consideracion des bons et loyaulx services que nostre amé et feal chevalier, Alain de Beaumont2, nous a faiz en noz guerres et fait [p. 298] chascun jour, et esperons que encores fera ou temps avenir, le quel a pris et mis le dit chastel en nostre obeissance, à ycellui Alain avons donné et octroié, de grace especial, de certaine science et de nostre [auctorité] royal, et, par la teneur de ces lettres, donnons et octroions, pour lui et pour ses hoirs et successeurs, et aianz cause de lui, le chastel et chastellenie dessuz diz, avec toutes leurs appartenances et appendences, en la valeur de six cens livres de terre à tournois, à tenir par lui et par ses diz hoirs et successeurs ou aianz cause perpetuelment et à tousjours. Si donnons en mandement à touz les justiciers de nostre royaume, presens et avenir, ou à leurs lieux tenans et à chascun d'eulx, si comme [p. 299] à lui appartiendra, que le dit Alain ou ses genz pour lui mettent et tiengnent en possession et saisine des diz chastel et chastellenie et appartenances, en la valeur dessuz dicte, et l'en facent et lessent et ses diz hoirs et successeurs joir et user paisiblement et perpetuelment, cessant tout empeschement. Et toutes voies nostre entencion est que, se par traictié de paix ou autrement estoit accordé que la dicte forteresse fust rendue ou temps avenir au dit sire de Mucidan, ou aus aianz cause de lui, le dit Alain ne nous en puisse demander, ne nous ne soions tenuz de lui en faire aucune recompensacion. Et que ce soit ferme chose et estable à tousjours, nous avons fait mettre nostre seel à ces presentes. Sauf en autres choses nostre droit et l'autrui [p. 300] en toutes. Donné à Paris, ou moys de mars l'an de grace m. ccc. lxxii, et le ix^e de nostre regne3.

Par le roy. Yvo.