DLXIX

Charles, etc. Savoir, etc., nous avoir oy l'umble supplication de Jehannete Labrete, povre damoiselle des parties de Poitou, grosse d'enfant, disant que, cinq mois a ou environ, elle feust venue en nostre bonne ville de Paris et se feust herbergiée en l'ostel du Barillet devant l'eglise des Mathelins1, ou quel hostel elle sejourna par aucun temps, [p. 328] en attendant que certaines gens d'armes se departissent, qui lors estoient sur les champs entre Saint Mor et Saint Fiacre, où elle avoit entencion d'aler, et d'illec à Saint Maturin de Larchamp ; la quelle suppliante trouva d'aventure en un jour de mecredi au soir, emprès les almaires du dit hostel du Barillet, un certain sachet que elle senti soubz son pié, ou quel sachet il avoit la somme de soixante frans et quatorze moutons d'or, le quel sachet elle leva de terre et pour ce que aucun n'en faisoit plainte ou semblant, le porta soubz le chevez de son lit, où elle gesoit ou dit hostel du Barillet, où elle se tint du dit jour de mecredi jusques au vendredi après ensivant, ou quel jour elle prinst congié de son hostel et se departit pour aler ou dit pelerinage. Et pour ce que le dit hoste ne autres gens d'armes qui leens estoient logiez ne faisoient aucune demande ou clameur du dit sachet ne des florins qui y estoient, emporta ycelli sachet ; et son dit hoste la convoia jusques au dehors de Paris, pour elle adrechier et lui monstrer et enseignier le chemin que elle devoit tenir ; et chemina tant que elle ala au dit pelerinage de Saint Maturin ; et ainsi que elle tenoit son chemin sur les champs, le bailli ou prevost de Grez en Gastinoiz aloit après elle, monté à cheval, qui mist main à elle de par nous, en lui imposant que elle avoit emblé ou pris le dit sachet de florins ou dit hostel, auquel prevost elle respondit que il estoit verité que elle avoit trouvé au tast de son pié le dit sachet, et sans ce que onques en eust denier osté, le rendi au dit prevost, en lui requerant que il voulsist interroguier celui qui faisoit la dicte poursuite et sceust à dire quantes pieces d'or il avoit ou dit sachet, le quel respondi que il y avoit soixante frans sans plus dire ; et depuis le dit prevost fist ouverture du [p. 329] dit sachet et y trouva la dicte somme de soixante frans et quatorze moutons. Et pour ce que elle fut prinse sur la terre et jurisdicion de nos amez le doyen et chapitre de l'eglise Nostre Dame de Paris, elle fut mise en leurs prisons, où elle fut detenue par l'espace de trois sepmaines, et depuis fut envoyé querir par nostre Prevost de Paris et fut mise derechief ès prisons de nostre Chastellet, où elle a demouré toute grosse d'anfant, en très grant povreté et misere, par l'espace de xix. sepmaines, et encore est. Si nous a fait humblement requerir que, comme elle ait paiciaument souffert l'aspreté et misere des dictes prisons par l'espace de vint et trois sepmaines et que elle rendit les dis sachet et florins par la maniere que dit est, si tost que il lui furent demendés, nous lui vuillons sur ce eslargir nostre grace et misericorde. Nous adecertes, attendu la qualité du fait, à ycelle povre suppliante ou dit cas, avons remis, quitté et pardonné, et par ces presentes lui quittons, remettons et pardonnons, de certaine science et grace especial, toute peine et amende corporelle, criminele et civile, que pour cause et occasion de ce que dit est elle puet estre encourue envers nous, en quelque maniere que ce soit, en la restituant à plain à sa bonne fame, renommée, au païs et à ses biens. Si donnons en mandement au Prevost de Paris et à tous les autres justiciers de nostre royaume et à leurs lieutenans, presens et avenir, et à chascun d'eulx, si comme à lui appartendra, que la dicte suppliante facent et seuffrent joir et user paisiblement de nostre presente grace et remission, en mettant son corps et ses biens, pour ce prins et detenuz, à plaine delivrance. Et que ce soit ferme chose et estable à tousjours, nous avons fait mettre nostre seel à ces presentes. Sauf nostre droit en autres choses et l'autrui en toutes. Donné en nostre chastel du Bois de Vincennes, l'an de grace mil ccc. lxxiii et de nostre regne le diesieme, ou mois de janvier.

Chanac. — Par le roy en ses requestes. G. Lesesne.