DXLII

Charles, par la grâce de Dieu roy de France. Savoir [p. 237] faisons à tous, presenset avenir, que nous aians en memoire la parfaite loyaulté et vraie obeissance que ès temps passez a eu à nos predecesseurs et à nous nostre bien amé Jehan Regnault1, bourgois et habitant de nostre ville et cité de [p. 238] Poitiers, le quel ou temps passé a esté maire d'icelle ville, et aussi les bons port, estat et gouvernement que il a mis ou dit office de maire pour le temps que il le exerçoit, comme autrement, et semblablement que il est personne de commendable vie et honneste conversacion, et adornez et garnis de nobles vertuz et autres dignes et louables merites, pour quoy il doit estre eslevé, preferé et essaucié en honneur, dignité et preeminence ; considerans aussi les grans et bons services que il a faiz à nos dis predecesseurs et à nous ou temps passé en pluseurs manieres, ainsi que de ce sommes acertenez, et esperons qu'il face ou temps avenir, icellui Jehan Regnault avecques toute sa lignée descendent, née et à naistre de loyal mariage, masculine et feminine, non obstant qu'il ne soit mie ou ait esté nez, extraiz ou procreez de noble sanc, de nostre certaine science, [p. 239] auctorité royal, plaine puissance et grâce especial, avons anobliz et anoblissons par ces presentes, et à lui et à sa dicte lignée masculine et feminine, procréée et à procreer, avons octroyé et octroyons que ilz soient tenuz et reputez doresenavant et à tousjours mais pour nobles en jugement, en faiz d'armes et ailleurs, en quelconques lieux que ce soit, et que lui et ses enfans masles et leur dicte lignée puissent, quant il leur plaira estre par quelconques autre chevalier aornez d'ordre et estat de chevalerie, et avec-ques ce que eulx et toute leur dicte lignée masculine et feminine, et chascun d'eulx, puissent acquerir et conquester par tout nostre royaume, et se aucuns ont desjà acquestez, tenir, avoir et possider à tous jours fiefs, arrerefiefs, terres, possessions, heritages, justices, seigneuries et quelconques autres choses nobles et de noble condicion, senz ce que pour ce ilz soient jamais tenuz de paier aucune finance à nous ne à noz successeurs roys de France, la quelle finance, quelle et combien grande que elle soit ou puist monter, nous, de nostre auctorité et puissance dessus dictes, leur avons quittée, remise et donnée, quittons, donnons et remettons, par la teneur de ces presentes. Et avec-ques ce leur octroions et voulons que il joissent de tous previleges, droiz, immunitez, franchises, coustûmes, libertez, usaiges et de toutes autres choses, comme font et ont acoustumé et doivent faire chevaliers et escuiers, et autres nobles du dit païs et de nostre dit royaume. Donnons en mandement au seneschal de Poitou et à tous les officiers, justiciers et subgiez de nous et de nostre royaulme, ou à leurs lieuxtenans, presens et avenir, et à chascun d'eulx, que le dit Jehan Regnault et toute sa dicte lignée, et chascun d'eulz facen t, laissent et seuffrent joir et user paisiblement de nostre presente grace et de nostre present octroy, senz leur faire ou souffrir estre fait au contraire destoubier ou empeschement aucun, le quel se il treuvent estre fait, si le rappellent ou facent rappeller et mettre au premier estat [p. 240] et deu. Et ad fin que ce soit chose ferme et estable à tous jours, nous avons fait mettre nostre seel à ces presentes lettres. Sauf en autres choses nostre droit et l'autrui en toutes. Donné à Paris, en nostre chastel du Louvre, l'an de grace mil ccc. lxxii. et de nostre regne le neufviesme, ou mois de decembre.

Par le roy, en son conseil. J. Tabari.