CCCCXCVII

Charles, etc. Savoir faisens à tous, presens et avenir, que nous, pour consideracion de la loyauté, vraye amour et subjection de nostre amé maistre Pierre Boschet1, advocat en nostre Parlement, nez du païs de Guyenne, a touzjours eu et encores a envers nous, le quel pour nous servir et estre vray et [fidele] subgiet, a laissié tous ses heritaiges qui montent jusques à la somme de viiixx livres de terre ou environ, avec sa chevance qu'il avoit ou dit païs, et exposé son corps en granz perilz en alant en certains voyaiges, lieux et païs pour le prouffit de nous et de nostre royaume, si comme nous lui avions ordené pour certaines et justes causes, et pour ce que le dit maistre Pierre ait plus honnestement de quoy soustenir son estat entour nous, et aussi affin qu'il soit plus astrains de demourer en nostre vraye amour et obeissance, et ait plus grant affeccion et voulenté de nous servir, à ycellui maistre Pierre, ou cas dessus dit, avons donné et donnons, de nostre grace especial, certaine science et auctorité royal, par ces presentes, touz les biens et heritages et conquestz quelconques que tenoient et possidoient, ou encores tiennent et possedent ou païs de Poitou un prestre angloys, nez du païs d'Angleterre, qui par certain temps a esté et encores est receveur du dit païs de Poitou2, [p. 65] député et ordené de par Edouart d'Angleterre, et un autre angloys, à qui ycellui prestre a donné, au mariage de lui et d'une femme d'icellui païs, pluseurs de ses biens et aquestz, qu'il avoit faiz ou dit païs, les quelz se sont renduz nos ennemis et rebelles, tenans le parti du dit Edouart, à nous appartenans et confisquez pour cause des dictes rebellions et desobeissances, à tenir, avoir et possesser paisiblement les diz biens, acquestz et heritaiges par le dit maistre Pierre, ses hoirs ou successeurs, ou les aianz cause [d'eulx] perpetuelment jusques à la dicte [p. 66] somme ; pourveu que, se yceulz angloys venoient et feussent par nous receuz par traictié, paiz ou autrement en nostre obeissance et subjeccion, nous ne soions tenuz de faire aucune recompense au dit maistre Pierre Boschet pour ce que dit est et exprimé. Si donnons en mandement au seneschal de Poitou, au procureur et receveur du dit lieu et à tous noz autres justiciers, officiers et subgiez, presens et avenir, à leurs lieux tenans et à chascun d'eulx, si comme à lui appartendra, en commettant, se mestiers est, que ou dit cas le dit maistre Pierre, ses hoirs ou ayanz cause facent et seuffrent joir et user paisiblement de nostre present grace, don et octroy, et d'iceulx biens, conquestz et heritaiges, jusques à la dicte somme, le mettent ou facent mettre de par nous en possession et saisine royaument et de fait, et des prouffiz et emolumens qui en ystront, le facent joir et user à plain, et à lui, ses hoirs ou aians cause respondre entierement dores en avant. Et que ce soit ferme chose et estable à touz jours, nous avons fait mettre nostre seel à ces lettres. Sauf nostre droit en autres choses et l'autrui en toutes. Donné à Saint Pol lez Paris, l'an de grace m. ccc. lxx. et vii^e de nostre regne, ou moys de may.

Par le roy en ses requestes. G. Hennequin, Hetomesnil.