DLXIV

Charles, par la grace de Dieu roy de France. Savoir faisons à tous, presens et avenir, nous avoir veu les lettres de nostre très chier frere le duc de Berry et d'Auvergne, conte de Poitou, contenans la forme qui s'ensuit :

Jehan, filz de roy de France, duc de Berry et d'Auvergne, conte de Poitou et de Masconnois, d'Angolesme et de Xanctonge, et lieutenant de monseigneur le roy ès dis païs et pluseurs autres parties de son royaume, à tous presens et avenir, salut. Comme pour cause du don à nous fait par monseigneur le roy [des contés] de Poitou et de Xanctonge, les chasteaulx, terres, possessions et autres biens de messire Guichart d'Angle, chevalier, ennemi et rebelle de mon dit seigneur et de nous, nous appartiegnent par confiscacion, savoir faisons que, pour les bons services que messire [p. 313] Jehan Ysoré1, seigneur de la Varenne, et messire Regnaud Chenin, sire de Mauzé2, chevaliers, ont fait à mon dit seigneur et à nous, et esperons qu'il feront ou temps avenir, à yceulx et à leurs hoirs et successeurs avons donné et octroié, donnons et octroions par ces presentes les chasteaulx, forteresces, terres, rentes, possessions et autres biens, tant meubles que heritages quelconques, qui furent messire Guichart d'Angle et qu'il avoit et tenoit, par soy ou par autres, ès seneschauciées de Poitou, Xanctonge et Angolesme, et ailleurs, au pouvoir de mon dit seigneur et de nous3, des quelles choses la succession appartient aus dis [p. 314] chevaliers, à cause de leurs femmes, filles du dit messire Guichart, à ce qu'il dient, [à] avoir, tenir, posseder et esploitier par les dis chevaliers et leurs hoirs et successeurs heritablement, par vertu du dit don, franchement et paisiblement. Et des choses par nous à eulx données les avons mis en saisine et possession, en deboutant tous autres detenteurs d'icelles, les quelx nous ostons et expellons par ces presentes, non obstant quelconques donacions d'icelles par nous faites ou à faire, les quelles nous revoquons et adnullons par ces presentes. Si mandons et commandons aus seneschaulx de Poitou et Xanctonge, ou à leurs lieux tenans, presens et avenir, et à tous autres justiciers et officiers de mon dit seigneur et de nous, qui sur ce seront requis, que les dis chevaliers, ou leurs procureurs pour eulx, il mettent et induient reaument et de fait en saisine et possession des dis chasteaulx, forteresces et autres terres et choses dessus dictes, et d'icelles et des profis d'icelles, et qui y appartiennent, les laissent, facent et seuffrent user et joir, et à eulx respondre, paisiblement et heritablement, sens les empeschier ou souffrir estre empeschiez, en aucune maniere. Car ainsi le voulons et l'avons octroyé aus dis chevaliers, de certaine science et grace especial, et de l'auctorité et puissance royal dont nous usons. Et afin que ces choses soient fermes et perpetuelment valables au proffit des dis chevaliers, de leurs hoirs et successeurs, leur avons donné ces nos lettres, seellées de nostre seel secret, en absence du grant, en las de soie et cire vert. Donné à nostre ville de Saint Jehan d'Angely, le xx^e jour de septembre l'an mil ccc. lx. et douze4.

[p. 315] Les quelles lettres dessus transcriptes et tout le contenu en ycelles nous loons, ratifions, approuvons et par ces presentes, de nostre certaine science, grace especial et auctorité royal, confermons, et voulons que les dis chasteaulx, forteresces, terres, possessions et autres biens quelconques dessus devisés, aus quelx les dis chevaliers, à cause de leurs dictes femmes, deussent et doient succeder, se le dit Guichart d'Angle feust mort avant ce que il les eust forfais, comme dessus est dit, soient et demeurent aus dis chevaliers, à leurs dictes femmes, et à leurs hoirs et aians cause, et que d'iceulx et des proffis et yssues d'iceulx il usent et joissent paisiblement, non obstant quelconque don ou octroy fait des choses dessus dictes à autre personne quelconque, depuis la date de ces presentes lettres. Si donnons en mandement, par ces meismes lettres, aus bailli de Chartres, de Cepoy et des ressors et Exempcions de Poitou et de Xantonge, et à tous nos autres justiciers et officiers, ou à leurs lieux tenans, presens et avenir, et à chascun d'eulx, si comme à lui appartendra, que les dis chevaliers ou leurs procureurs pour eulx il mettent ou facent mettre de par nous, ou dit cas, reaument et de fait en saisine et possession des dis chasteaulx, forteresces, terres, possessions, biens quelconques dessus declairiez, et d'iceulx et des dis profis et yssues d'iceulx, et aussi de nostre presente grace et confirmacion, facent et laissent joir et user les dis chevaliers, leurs femmes et leurs hoirs, successeurs et ayans [cause] paisiblement et sans aucun empeschement, et tout ce qui seroit fait au contraire et contre la teneur de ces presentes, mettent ou facent mettre sans delay au neant et à pleine delivrance. Toutevoie nostre entente n'est pas que, se par aucune maniere le dit Guichart revenoit aus [p. 316] choses dessus dictes, nous, ne nos successeurs, soins tenuz à en faire aus dis chevaliers, ne aucun d'eulx, restitucion aucune. Et pour que ce soit ferme chose et estable à tousjours, nous avons fait mettre nostre seel à ces lettres. Sauf en autres choses nostre droit et l'autrui en toutes. Donné en nostre chastel du Louvre, l'an de grace mil ccc. lxxiii. et de nostre regne le x^e, ou mois de septembre.

Par le roy, vous present. J. de Remis.