DXCIX

Charles, etc. Savoir faisons à touz, presens et avenir, que, comme nous avons entendu que le Soudit de Lastraut1, chevalier, s’est rendu publiquement et notoirement ennemi de nous et de nostre royaume, en adherant et donnant confort et aide de tout son povoir à nostre ennemi d’Angleterre, en courant par nostre royaume, pillant et mettant à mort de tout son povoir les subgez d’icellui, en commettant crime de lese majesté, pour quoy touz ses biens nous sont avenuz, appartiennent et doivent appartenir comme commis et confisquez par sa forfaiture. [p. 418] Nous, consideranz les bons et agreables services que nostre amé et feal chevalier, Jehan La Personne, viconte d’Aunoy2nous a faiz en noz guerres et en pluseurs autres et [p. 419] diverses manieres, et recompensacion des grans pertes et dommaiges qu’il a euz pour le fait de noz guerres, au dit Jehan avons donné et donnons par ces presentes, de nostre certaine science et grace especial, le chastel, chastellerie et ressort de Didonne, avecques les terres, prez, bois, [p. 420] vignes, cens, rentes, revenues, foys, hommages, justices, jurisdicions et seignories que le dit Soudit a et tient, ou souloit avoir et tenir, en nostre seneschauciée et païs de Xantonge, et autres heritages quelconques, que ycellui Soudit a et souloit avoir, quelque part que ce soit, en ycelle seneschauciée de Xantonge, soubz quelque valeur et estimation que ilz soient, à tenir, avoir, joir et possider heritaulment et perpetuelment par le dit viconte, ses hoirs et successeurs et ceulx qui de lui auront cause. Si donnons en mandement à nos amez et feaulx genz de noz comptes à Paris, et à touz noz autres justiciers, officiers et subgez, presens et avenir, et à chascun d’eulx, si comme à lui appartendra ou pourra appartenir, ou à leurs lieuxtenans, que le dit viconte ou son procureur pour lui, lessent et seuffrent joir et user paisiblement et plainnement de nostre dit don, et l’en mettent et facent tenir royaument et de fait en saisine et possession des diz biens, à nous appartenans, comme dit est. Et des proffiz, revenues, jurisdicions et autres emolumens, à ycellui chastel et chastellerie appartenans, le lessent et seuffrent paisiblement jouir, et à lui et à ses hoirs respondre, par ceulx à qui il appartendra doresenavant. Et aussi mandons à touz ceulx qui, à cause des diz heritaiges, doivent et ont acoustumé paier cens, rentes et devoirs, que au dit viconte et à ses hoirs les paient chascun an doresenavant, aux termes qu’il avoient acoustumé paier au dessuz dit Soudit, et à ycelui viconte, comme à seigneur, obeissent deuement. Nostre entencion toutes voies n’est pas que, ou cas que le dit Soudit, ou temps avenir, à nostre obeissance retournerait, pour quoy, ou pour traictié de paix fait ou à faire entre nous et nostre adversaire dessuz dit, ou pour autres causes, nous les diz biens donnez au dit viconte rendissions ou feissions rendre au dit Soudit ou à ses hoirs, nous feussions tenu, de faire au dit viconte aucune remuneracion ou recompensacion. Et pour ce que ce soit [p. 421] ferme chose et estable à tousjours mès, nous avons fait mettre nostre seel à ces presentes. Sauf en autres choses nostre droit et l’autrui en toutes. Donné à Gouvieux, le xvi^e jour de septembre l’an de grace m. ccc. lxxvi, et le xiii^e de nostre regne.

Par le roy. L. Blanchet.