DVII

Charles, etc. Savoir faisons à touz, presens et avenir, de [p. 93] la partie de Perreau d'Oradour et Jofroy d'Oradour1, son fils, escuiers, nous avoir esté humblement exposé que, comme feux Pierre de Neillac, chevalier, fust vray seigneur proprietaire et possesseur, ou temps qu'il vivoit et ou quel ala de vie à trespassement et mort vestu et saisi des chasteaux de Gargelesse et du Boschet en Brenne et des appartenences d'iceulx, et le dit chevalier eust exposé2 Heliote de Prie3, la quelle après le decès du dit Neillac. [p. 94] tint et occupa le dit chastel du Boschet et les appartenences d'iceluy et le bailla de fait à un chevalier que on appeloit Artaut d'Ussel4, des Marches de Bourgongne, lequel Artaut tint et occupa par certain temps le dit chastel, avequez lui grant quantité de gens d'armes, avec les quelx le dit Artaut fist moult de maulx en nostre dit royaume, et par especial au païs de Berry et tout le païs entour le dit chastel du Boschet, qui est assis en la duchié de Guienne, en la seneschalcie de Poitu5 ; après les quelles [p. 95] choses les dessus diz Artaut et Heliote firent alience avecques un d'Angleterre, nostre ennemi, appellé Gautier Mellot, au quel royalment et de fait le dit chastel du Boschet il baillerent et delivrerent. Et après ce que la duchié de Guienne a esté baillée par nostre très chier seigneur et pere, que Dieux absoille, et nous au roy d'Angleterre et à son filz, le prince de Gales, noz ennemis, et que le dit chastel du Boschet fust mis en l'obeissance de noz diz ennemis, le dit Gautier Mellot est alez de vie à trespassement, tenent et possident le dit chastel, et institua son heritier Janequin Durant, anglois et nostre ennemi, au quel Janequin, entre les autres choses le dit Gautier laissa le dit chastel du Boschet, qui est situé ès frontieres et ou dyocese de Berry, combien qu'il soit en la dicte duchié et seneschalcie de Poitu, le quel Janequin depuis donna le dit chastel et les appartenances d'ycelui à Ysabele de Bret, sa fame, et à Sebile la Fuilhe, fille de la dite Ysabele, qui estoient du païs de Guienne. Les quelles [choses] ainsy veuez et considerez, le dit Perreau d'Oradour, pere du dit Joffoy, qui estoit et est hoir plus prochain de la ligne et du lignage du dit feu Pierre de Neillac6, chevalier, et cousin germain d'ycelui, et que par ce le dit chastel et appartenances du Bochet appartenoit et devoit appartenir à luy et aux siens, comme au plus prochain de lignage du dit feu Pierre de Neillac, fist tant qui prist et occupa le dit chastel et en bouta hors les Angloys et noz ennemis qui dedens estoient, et rendi et a rendu et mis le dit chastel avecquez cez appartenances en nostre obeissance, en la quelle lez dis supplians sont et ont volonté d'estre tousjours à leur pooir, comme noz bons et vrais loyalz subgez. Pour les queles choses les diz supplians nous ont supplié que, consideré ce que dit est et que le dit Perreau, en recouvrant le dit chastel, perdi pluseurs de ses amis et [p. 96] gens, et que tant pour la prise du dit chastel comme pour la garde d'ycelui il ont bien fraié jusques à la somme de deux mille francs d'or et plus, par quoy les dis supplians sont moult apeticié de leur estat, il nous plaise de nostre grace et auctorité royal donner et octroier au dit Joffroy, fil du dit Perreau, pour lui et pour ses hoirs et successeurs, tout le droit et accion que nous avons et povons avoir, à la cause dessus dicte ou autres quelconques, ou dit chastel du Bochet et ces appartenances, tant en l'estanc de la Gabriere comme en toutes autres appartenances quelconques d'icelui. Les quellez choses dessus dictes considerées et afin que les supplians aient tousjours milleur voulenté de nous servir, et que par ce les autres soient plus enclinz de venir en nostre service et obeissance, nous au dit Joffroy le dit chastel du Bochet avec le dit estanc de la Gabriere et autres appartenances quelconques et appendences, et tout le droit et accion que nous avons et pourrions avoir ou dit chastel et appartenances, pour les causes dessus dictes ou quelconques autres, nous avons donné et donnons, de nostre certeinne science et grace especial, par ces presentes, à tenir par le dit Joffroy, sez hoirs et successeurs et qui d'eux auront cause perpetuelment, le chastel, estanc et appartenances dessus dictes, comme leur propre chose, sauf et reservé à nous et à noz successeurs, roys de France, la souverainneté ou ressort du chastel et appartenances dessus dictes. Si donnons en mandement, par la teneur de cez presentez, à noz seneschalz de Limosin, Quercin et de Poitou, et à tous les officiers et justiciers de nostre royaume, presens et avenir, et à chascun d'eulz que le dit Joffroy mettent en possession et saisine, se mestier est, du dit chastel et appartenances, et en ycellez le gardent et deffendent et maintiengnent, et du dit chastel, estanc et appartenances dessus dictes le dit Joffroy, ses hoirs et successeurs et qui d'eulz auront perpetuelment cause, facent et sueffrent joir et user paisiblement, comme [p. 97] leur propre chose, selon la fourme et teneur de nostre presente grace, senz leur faire sur ce ne souffrir estre fait aucun empeschement ou destourbier par quelconque maniere. Et pour ce que ce soit ferme, etc. Sauf, etc. Donné en nostre chastel du Lovre à Paris, ou mois de mars l'an de grace m. ccc. lxx, et de nostre regne le vii^e.

Par le roy. T. Hocye. — Visa.