Testaments enregistrés au Parlement de Paris sous le règne de Charles VI » Aveline, femme de Jean Maulin.

Aveline, femme de Jean Maulin.

  • R, Archives nationales, X1A 9807, fol. 86v-87. (Mention de collation, fol. 87).

[1] A tous ceulx qui ces presentes lettres verront, Jehan, seigneur de Foleville, chevalier, conseillier du roy notre sire et garde de la prevosté de Paris, salut.

[2] Savoir faisons que par devant Jehan l’Archier et Pierre le Roy, notaires du roy notred. sire, de par lui establiz ou Chastellet de Paris, fu presente Aveline, femme de honorable homme et sage maistre Jehan Maulin, conseillier du roy notred. sire et maistre de sa chambre des comptes, enferme de corps, toutesvoies saine de pensee et de bon entendement, si comme il apparoit tant en sa face comme par sa parole, actendant et considerant qu’il n’est chose plus certaine de la mort ne moins certaine de l’eure d’icelle, voulant pour ce obvier a son povoir a tous cas aventureux et non mourir intestate et pour ce, tandiz que raison gouverne sa pensee, ordener d’elle et de ses biens que notre seigneur Jhesus Crist par sa grace lui a prestez en ce siecle mortel, fist et ordena son testament et ordenance de sad. voulenté derreniere ou nom du Pere, du Filz et du Saint Esperit en la maniere qui s’ensuit.

[3] Premierement, elle, comme vraye catholique, recommenda son ame quant de son corps departira a Notre Sauveur Jhesus Crist, a la glorieuse vierge Marie sa mere, a monseigneur saint Michiel l’ange, a monseigneur saint Jehan Baptiste, a monseigneur saint Pierre, a monseigneur saint Pol, apostres, et a toute la saincte court et compaignie de paradis, et son corps a la sepulture de Saincte Eglise.

[4] En aprés, elle voult, ordena et expressement commanda toutes ses debtes loyaument cogneues estre paiees et ses torsfais dont il apperra amendez par ses executeurs ci aprés nommez.

[5] Item, elle lessa a l’euvre de l’eglise Saint Eustace a Paris, dont elle est parroissienne, XXXII s. p. ; au curé de lad. eglise XVI s. p. ; aux chapellains d’icelle eglise VIII s. p. et aux clers dud. lieu IIII s. p. ; item, a l’euvre de l’eglise Notre Dame de Paris VIII s. p. ; item, a l’Ostel Dieua Ajouté en interligne. de Paris XVI s. p. ; item, a l’ospital et college du Sepulcre a Paris en la grant rue Saint Denis et au college d’icelui hospital, parce qu’ilz seront tenus de dire vigiles de mors au lieu ou sera la sepulture de lad. Aveline, XVI s. p. ; item, aux IIII ordres mendiens a Paris, c’est assavoir cordeliers, jacobins, augustins et carmes, a chacune d’icelles IIII ordres pour dire vigiles XVI s. p. ; item, a l’euvre de l’eglise Notre Dame d’Athieres en Beausse XVI s. p. ; item, a l’eglise de Saint Anthoine les Paris VIII s. p. ; item, a l’eglise Saint Supplice VIII s. p. ; item, a l’eglise Saint Mor des Fossez VIII s. p. ; item, a l’eglise de Saint Fiacre en Brie VIII s. p. ; item, a l’eglise de Notre Dame de Bouloigne sur la Mer VIII s. p. ; item, a Notre Dame de Bouloigne lez Saint Clout VIII s. p.

[6] Item, a Colete, sa petite fille, fille de Jaquin l’Englois, elle lessa ce qu’il plaira ordener aud. maistre Jehan, son mary. Item, a Ydonie, sa seur, elle lessa ce qu’il plaira aud. maistre Jehan de ordener a ycelle ; item, a Perrete, sa seur, femme de Rolant Morel, demourant a Senliz, sa robe ronde fourree de rays de drap vermeil. Item, a seur Jehanne de Saint Denis qui a gardee et gardoit lad. testateresse en sa maladie, elle laissa ce qu’il plaira aud. maistre Jehan, son mary, lui ordener ; item, a Colin, clerc dud. maistre Jehan, qui les a servi, XXXII s. p. ; item, a Guiot des Vignes, clerc dud. maistre Jehan, VIII s. p. ; item, a Gervaisot Chopin, leur varlet, XVI s. p. ; item, a Katherine, qui demeure en leur hostel, sa cote hardie de caignet fourree de gris et une cote simple vermeille ; item, a Jehannete la Bellenicte, sa chamberiere, une cote hardie sur fleur de vesse fourree de gris.

[7] Item, a l’euvre de l’eglise de Montigny Saincte Felise XVI s. p. ; item, au prieur d’icelle eglise XVI s. p.

[8] Item, lad. testateresse ordena XX messes estre dictes et celebrees le jour de son obseque ou lieu ou sa sepulture sera, et pour ce faire laissa XL s. p., c’est assavoir pour chascune messe II s. p. Item, elle voult et ordena un anué estre fait et celebré pour le salut et remede de l’ame d’elle a l’ordenance dud. maistre Jehan, son mary.

[9] Item, lad. testateresse ordena que au demourant de ce sien presentb Ajouté en interligne. testament et ordenance de derreniere voulenté led. maistre Jehan, son mary, en face du tout a son plaisir et ordenance en la forme et maniere qu’il lui plaira et qu’il lui semblera bon a faire pour le salut et remede des ames d’elle et de leurs amis, parens et bienfaiteurs. Et pour ce faire, enteriner et acomplir, pourra prendre led. maistre Jehan et distribuer des biens de lad. testateresse ce qu’il lui plaira et bon lui semblera jusques a la somme de IIIe £ p., se tant en veul prendre et ordener a ce faire, ou moins se bon lui semble ; et les lessa pour ce et quant a ce faire lad. testateresse.

[10] Item, lad. testateresse voult et ordena que une ordenance de grace mutuelle et don egal, pieça accordee entre eulx par vertu de laquelle ilz avoient voulu et ordené que le survivant d’eulx deux eust et tenist a usuffruit le cours de sa vie durant, joïst et possidast a usuffruit tout le residu et demourant des biens meubles et conquests immeubles du premier mourant d’elle et dud. maistre Jehan, vaille, tieigne et ait son plain effect et que par vertu d’icelle led. maistre Jehan, s’il la survist, tieigne paisiblement et sans contredit a usuffruit et sad. vie durant apres le trespassement d’elle led. residu des meubles et conquests immeubles d’icelle, laquelle ordenance et grace mutuelle lad. testateresse ratifia et approuva et voult qu’elle vaille et tieigne par la meilleur voie et maniere que mieux pourra et devra valoir de droit, us, coustume ou autrement, et s’y consenti en tant que a elle est.

[11] Et ou cas que ses hoirs, legateurs ou autres vouldroient contredire, debatre ou empescher lad. grace mutuelle et don egal par quoy elle n’eust et emportast son plain effect, elle voult et ordena tous telz contredisans et empeschans estre forclos et deboutez de tout ce qui des biens de la succession d’elle leur pourroit appartenir par escheoite, lais, succession et autrement. Et voult et ordena que ce qui ainsi en appartendra ausd. contredisans et empeschans feust donné et ordené a l’ordenance et voulenté de ses executeurs ci aprés nommez, qu’elle eslut et ordena pour ce faire nonobstant quelques drois, us, coustumes ne autres choses a ce contraires qu’elle ne voult avoir lieu.

[12] Pour toutes lesquelles choses ci dessus et en ce present testament contenues et chascune d’icelles enteriner, acomplir, executer et mettre a execucion et a fin deue de point en point selon leur forme et teneur lad. testateresse fist, ordena, nomma et eslut ses executeurs et feaux commissaires led. maistre Jehan Maulin, son mary, maistre Jehan le Roy et maistre Jehan Maulin, filz de sond. mari et d’elle, clerc des comptes du roy notre sire, ensemble et les deux pour le tout, dont led. maistre Jehan son mari soit toujours l’un, es mains desquelx elle mist et bailla la saisine et possession de tous ses biens quelxconques qu’elle soubzmist pour ce du tout a la jurisdicion et contrainte de la prevosté de Paris et de tous autres justiciers soubz qui ilz seront trouvez.

[13] Et rappella et revoca lad. testateresse tous autres testaments et codicilles par elle faiz avant la date de ces presentes. Et voult et accorda que cestui testament vaille et tieigne par maniere de testament, de codicille ou de quelque autre ordenance de derreniere voulenté que mieux pourra et devra valoir de drois, us, coustume ou autrement.

[14] En tesmoing de ce, nous a la relacion desd. notaires avons mis a ces lettres le seel de la prevosté de Paris le vendredi XVIe jours de juillet l’an de grace mil IIIe IIIIXX et quinze.


a Ajouté en interligne. b Ajouté en interligne.