Martine Canu.

[1] A tous ceuls qui ces lettres verront, Guillaume, seigneur de Tignonville, chevalier, conseiller et chambellan du roy notre seigneur et garde de la prevosté de Paris, salut.

[2] Savoir faisons que, par devant Regnault le Pionnier et Jehan Huré, clers notaires jurez du roy notred. seigneur de par lui establiz ou Chastellet de Paris, fu presente Martine Canu, beguine du beguinage de Paris et maistresse d’icellui beguinage, enferme de corps, toutevoies saine de pensee et de bon entendement, si comme elle disoit et comme il apparoit de prime face, attendant et saigement considerant qu’il n’est chose plus certaine de la mort ne mains certaine de l’eure d’icelle, pensant aux chose derrenieres, desirant de tout son cuer tandis que sens et raison sont en elle ordener par disposition testamentoire des biens que notre seigneur Jhesu Crist lui a prestez et donnez en ceste mortel vie pour le salut de son ame. Et pour ce, fist, ordena et devisa en la presence desd. notaires et par ces presentes fait et ordene son testament ou ordenance de derreniere voulenté, ou nom du Pere et du Filz et du benoit Saint Esprit, en la fourme et maniere qui s’ensuit.

[3] Et premierement, elle, comme bonne et vraye catholique, recommanda devotement son ame quant elle departira de son corps a Dieu, notre createur, a la trés doulce vierge Marie, sa mere, a monsieur saint Michiel l’ange, a monsieur saint Pierre et saint Pol et a toute la benoite court et compaignie de paradis.

[4] Item, elle vout et ordena toutes ses debtes estre paiees et ses torsfaiz amendez par ses executeurs cy aprés nommez dont il leur apperra souffisamment.

[5] Item, elle laissa au curé de l’eglise Saint Pol a Paris, dont elle est paroissienne, XVI s. p. Item, elle laissa a l’euvre de lad. eglise XVI s. p. Item, elle laissa aux deux clers d’icelle eglise a chacun quatre s. p.

[6] Item, elle laissa aux religieux de Notre Dame du Carme pour dire vigiles XXXII s. p. Item, elle laissa aux trois autres ordres mendians a chacune ordre XVI s. p. pour dire vigiles. Item, elle laissa a Saincte Katherine du Val des Escoliers a Paris XVI s. p.

[7] Item, elle laissa a l’Ostel Dieu de Paris XVI s. p.

[8] Item, elle laissa aux confraries qui ensuivent ce qui s’ensuit, c’est assavoir a la confrarie de la Conception Notre Dame en lad. eglise Saint Pol cinq s. p., a la confrarie Saincte Katherine du Val des Escoliers a Paris XVI s. p., de Saint Jaques du Hault Pas cinq s. p., de Saint Michiel en l’eglise de Saint Nicolas des Champs cinq s. p.

[9] Item, elle laissa a l’eglise de Saint Denys de la Chartre, pour les reparations d’icelle, VIII s. p.

[10] Item, elle laissa a l’eglise dud. beguinage un hanap d’argent greneté, ou il a un couronnement esmaillé, et pour les reparations d’icelle eglise elle laissa XXXVI s. p. Item, elle laissa aux escoliers dud. beguinage XXXII s. p. Item, elle laissa a l’ospital dud. lieu XXXII s. p.

[11] Item, elle laissa a Robinette un lit fourni, quatre peres de draps, deux nappes, deux touailles et une sainture ferree d’argent, avec ce qui y pend, et un seurcot de pers. Item, elle laissa a Agnesot, sa fillole, qui demeure avecques elle, un lit fourni.

[12] Item, elle laissa a Guillemete la Petite, beguine dud. beguinage, un seurcot, le meilleur aprés deux, un chapperon, un cuevrechief, XXXII s. p. et ses heures, par ainsi que aprés le decés d’icelle Guillemete elle vuelt et ordene que les heures dessusd. appartiengnent a lad. Robinete, se icelle Robinete survit ycelle Guillemete.

[13] Item, elle laissa a Marion Guerart, beguine dud. beguinage, la proprieté appartenant a lad. testaterresse de la maison ou lad. Marion demeure a present, assise oud. beguinage, de laquelle maison le viagé et usufruit appartient a lad. Marion se vie durant, pour d’icelle proprieté de maison joïr et user a tousjours par lad. Marion, ses hoirs et aians cause. Avecques ce laissa a ycelle Marion un mantel fourré de connins, un chapperon et un cuevrechief.

[14] Item, elle laissa a Jehanne la Plastriere un de ses seurcos moyens et un cuevrechief. Item, elle laissa a Gennevote de Meaulx ses bonnes patenostres. Item, elle laissa a Mahault de Vernon deux cuilliers d’argent. Item, elle laissa a frere Jehan de Vernon XXXVI s. p. pour prier Dieu pour l’ame d’elle. Item, elle laissa a Jehanne, femme de Jehan le Blanc, poissonnier de mer, vint escus d’or, un annel d’or, le meilleur qu’elle ait, une bourse de soye ovree a poins avecques le pendant a clefs.

[15] Item, elle laissa au filz Simonnet la Vieille, a la fille Guiot le Maçon, a la fille Jehannin Courtnez, a la fille Jehan le Fournier, ses fillos et filleules a chacun d’eulx XXXVI s. p.

[16] Item, elle laissa a Jehan de Combes, procureur en parlement, une sainture ferree d’argent sur un tissu noir.

[17] Item, elle laissa a frere Robin le Canu une maison qu’elle dit avoir assise oud. beguinage emprés le puis pour en joïr sa vie durant seulement. Et aprés le decés d’icellui frere Robert, elle laissa lad. maison a Marguerite de Stain pour en joïr sa vie durant, parce que icelle Marguerite sera tenue faire chanter chacun an aprés le decés dud. frere Robert deux messes pour l’ame d’elle.

[18] Item, elle laissa a lad. Marguerite de Stain, en recompensacion des bons et agreables services qu’elle lui a fais ou temps passé, fait chacun jour et espere qu’elle fera ou temps a venir, tout le residu de tous ses biens meubles et conquests immeubles, parce que icelle Marguerite sera tenue paier toutes ses debtes et acomplir ce sien present testament et prier Dieu pour l’ame d’elle.

[19] Et s’i voult et ordena lad. testaterresse que aucun inventoire ne soit fait de ses biens aprés son decés.

[20] Item, elle laissa a lad. Marguerite de Stain a tousjours, pour elle, ses hoirs et aians cause, la maison ou icelle testaterresse demeure en hault, avecques une maison en bas que l’en appelle le Convent, ainsi comme elle se comporte. Avec ce lui laissa aa Ajouté en interligne. tousjours pour elle et ses hoirs une maison, ainsi qu’elle se comporte, qu’elle dit avoir assise a Paris en la rue des Escouffles, voulant et ordenant lad. testaterresse que tantost aprés son trespas lad. Marguerite puisse joïr et user de toutes les choses dessusd. a elle laissees comme de sa propre chose, et assavoir que lad. testaterresse a voulu et ordené que lesd. deux messes, que sera tenue faire dire lad. Marguerite de Stain aprés le trespas dud. frere Robert Canu a cause de lad. maison assise oud. beguinage emprés le puis, que ycelles deux messes soient chantees a note oud. beguinage a pain et vin. Et aussi laissa ycelle testaterresse aprés le decés de lad. Marguerite lad. maison assise prés du puis oud. beguinage a l’eglise dud. beguinage a tousjours chargee desd. deux messes qui seront dictes haultes et a note, a pain et a vin.

[21] Item, elle laissa a la femme Simonnet la Vieille un annel d’or a un saphir.

[22] Pour toutes lesquelles choses dessusd. enteriner et acomplir et mettre a fin et execucion deue, selon de que dessus est dit, lad. testaterresse fist, nomma et esleut ses executeurs et feaulx commissaires led. maistre Jehan de Combes, lad. Marguerite de Stain, messire Philippe le Pigaut, prestre, et Jehan le Blanc, ausquelz ensemble et aux deux d’iceulx pour le tout lad. testerresse donna et donne plain povoir, auctorité et mandement especial de ce faire ; es mains desquelx ses executeurs ycelle testaterresse transporta et delaissa tous sesd. biens meubles et immeubles pour sond. testament acomplir, lesquelx avec la reddicion du compte de ce sien present testament elle soubzmist et soubzmet a la court de parlement du roy notre seigneur a Paris, en rappellant et mettant a neant tous autres testamens et codicilles par elle fais par avant cestui sien present testament, voulant qu’il tiengne et vaille et soit acompli par maniere de testament ou ordenance de derreniere voulenté ou ce que mieulx valoir et tenir devra par raison et par coustume.

[23] En tesmoing de ce, nous, a la relacion desd. notaires, avons mis a ces lettres le seel de la prevosté de Paris l’an mil quatre cens et sept le samedi sept jours d’avril avant Pasques.

J. Hure ; R. le Pionnier.