Enguerranne de Saint-Benoît.

[1] A tous ceuls qui ces lettres verront, Guillaume, seigneur de Tignonville, chevalier, chambellan conseillier du roy notre sire et garde de la prevosté de Paris, salut.

[2] Savoir faisons que, par devant Toussains Basdoz et Jehan Tillart, clers notaires jurez du roy notred. sire de par lui establiz en son Chastellet de Paris, fu presente damoiselle Enjorranne de Saint Benoist, femme de noble homme Pierre de Precy, escuier, seigneur de Borrent, saine de corps, de pensee, de bon et vray entendement, si comme elle disoit et que de prime face apparoit, actendant et considerant en soy que de toute creature humaine les jours sont briefz, et qu’il n’est chose plus certaine de la mort ne chose plus incertaine de l’eure d’icelle, voulans obvier aux cas adventureux qui de jour en jour pevent avenir, non voulant de cest siecle departir intestate, mais voulant pourveoir et remedier au salut de son ame, et pour ce, tandiz que vigueur regne en elle et que raison, sens et entendement gouvernent sa pensee voulant ordener les biens que notre seigneur Jhesu Crist lui a prestez en cest siecle par la disposicion testamentaire, fist et ordena son testament ou ordonnance de derreniere volenté ou nom du Pere, du Filz et du benoist Saint Esperit, en la forme et maniere qui s’ensuit.

[3] Et premierement, elle, comme bonne et vraye catholique, recommanda l’ame d’elle quant de son corps departira, a notre seigneur Jhesu Crist, a la benoiste vierge Marie, a monsieur saint Michiel l’ange, a monsieur saint Pierre et saint Pol, et a toute la sainte benoiste compaignie de paradis, et son corps a la sepulture de l’Eglise, laquele elle eslit ou cimetiere de l’eglise des Sains Innocens a Paris prés du lieu ou furent sepulturez son pere et sa mere, ou en autre lieu prés d’icelui.

[4] En aprés, elle volt et ordonna ses debtes estre payees et ses torsfaiz estre amendez dont il apperra deuement a ses executeurs cy dessoubz nommez.

[5] Item, volt et ordonna que trois messes soient perpetuelment chanteez et celebrees en lad. eglise des Sains Innocens pour le salut et remede de son ame et de ses pere et mere et autres ses parens et amis par chascune sepmaine par un chappellain qui aura la chappelle, lesqueles messes seront continuelment celebrees de requiem, dont l’une sera chantee au lundi, l’autre au mercredi et la tierce au vendredi. Et s’il avenoit qu’elle alast de vie a trespassement a un autre jour que a un desd. jours elle volt et ordonna que l’une d’icelles messes soient chantees et celebrees au jour que elle ira de vie a trespassement. Et pour la fondacion et dotacion d’icelles messes, elle volt et ordonna vint cinq £ p. de rente estre prises chascun an sur toutes les rentes que elle a de son propre heritage en la ville de Paris et hors ; lesqueles rentes elle volt estre chargiees, affectés, soubzmises, obligiees et ypothequees pour fournir et faire valoir lesd. vint cinq £ p. de rente pour lesd. trois messes jusques a ce que par son heritier ou heritiers ycelles vint cinq £ p. de rente soient bien, deuement et souffisamment assises et amorties. Et ou cas que lesd. heritiers ou heritier auroient assis bien et souffisamment et feroient ou auroient fait amortir lesd. vint cinq £ p. de rente, elle volt que le residu des autres rentes demoure deschargié et autrement non. Item, elle volt et ordonna que lad. chapelle soit et appartiengne a messire Rogier le Conte, prestre chapellain de lad. testeteresse, et lequel a esté longuement demourant avec elle en son hostel, et charga et charge ses executeurs que aprés son testament ilz facent et sueffrent laissier jouïr et user de lad. rente sa vie durant pour dire et celebrer lesd. messes. Et aprés le trespassement d’icelui messire Rogier volt et ordonna que la presentacion de lad. chapelle appartiengne a maistre Jehan de Breban et Agnés, sa femme, niepce d’icelle testateresse et aux hoirs et heritiers du costé et ligne d’icelle Agnés.

[6] Item, volt et ordonna que le jour de son obit elle ait pour son luminaire treze torches et quatre gros cierges de cire, chascune torche et cierge pesant quatre lb. de cire.

[7] Item, volt et ordonna que seze £ p. soient donnees et aumosnees le jour de son obit par maniere de donnee aux povres, et que a chascun en soit donné un petit blanc de quatre d. p. la piece.

[8] Item, volt et ordonna que le jour de son obit et le lendemain soient chantees et celebrees en lad. eglise quarante messes pour le salut et remede de l’ame d’elle.

[9] Item, pour estre sepulturee et mise oud. cymetiere des Sains Innocens, elle laissa a la fabrique dix £ t.

[10] Item, elle laissa a lad. fabrique vint s. p. de rente, a ce que les marregliers seuffrent et laissent chanter et celebrer lesd. trois messes en lad. eglise par led. chappellain dessus nommé ou par ceulx qui seront presentez par lesd. heritier ou heritiers de lad. testateresse.

[11] Item, volt et ordonna que au retour de sond. obit soit fait un disner selon ce que il semblera estre bon et honnorable et expedient a ses executeurs.

[12] Item, volt et ordonna que une chasuble de drap de soye vermeille avecques un aube, un amit, estole, manipule, un calice, et corporaulx soient mises en un coffre en lad. eglise des Sains Innocens au plus prés de l’autel ou lesd. messes seront celebrees, lesquelz aournemens elle volt estre et appartenir a lad. chappelle.

[13] Item, elle laissa a Jehannete de Breban, fille de maistre Jehan de Breban et Agnés, sa femme, niepce d’icelle testateresse, un seurcot long, un seurcot ouvert et une robe a saindre avecques les pennes d’iceulx seurcotz, lesquelz seurcotz et robe sont d’escarlate vermeille.

[14] Item, elle laissa a Colete de Chaumontel, qui l’a longuement servie, et aux enfans d’icelle Colete nez et procreez de son corps et en mariage, cent s. p. de rente que elle a droit de prendre et parcevoir chascun an sur certains prez assis a Nuilly sur Marne et toutes les terres que elle avoit et a a Roissy emprés Gonnesse. Et ou cas que lad. Colete yroit de vie a trespassement sans hoirs de son corps, lad. testaterresse volt que lad. rente et terres retournent a ses heritiers.

[15] Item, elle laissa a sa cousine, la femme Estienne de Dampmaz, son mantel fourré de gris ; item, a son ainsnee fille les deux meilleurs houppelandes qu’elle aura au jour de sons trespassement.

[16] Item, lad. testateresse afferma que comme a lui competoient et appartenoient certaines maison, terres arables, vignes et autres heritages, situez et assis en la ville de Charenton et ou terrouer d’environ, qui estoient de son propre heritage, lesquelz eussent et aient eté venduz et adenerez de son consentement par tele condicion et maniere ou au moins en tele entencion que les d. qui en ystroient feussent mis et emploiez en autres heritages qui sortissent et feussent d’autele nature, comme estoient lesd. heritages, c’est assavoir de son propre heritage, desquelz d. depuis ce a esté achetee une maison assise a Paris en la rue du Temple, tenant, d’une part a Jehan Blanchart, et d’autre part a une maison qui est et appartient au seigneur de l’ostel du Cerf, demourant en lad. rue, laquele maison elle laissa et donna a Perrenot de Breban, son nepveu, filz desd. maistre Jehan de Breban et Agnés, sa femme, pour le bien et avancement de lui et pour luy aidier a tenir aux escoles.

[17] Item, laissa encores et donna a Colete de Chaumontel son seurcot d’escarlate vermeilles fourré de menu vair avecques ycelle penne.

[18] Item, elle laissa a Pierre de Precy dessus nommé son mary ce present testament acompli tout le residu de ses biens meubles et immeubles quelzconques acquis durant le mariage de sond. mary et d’elle, par tele condicion que sond. mary sera tenuz paier et acquitter toutes les debtes que elle devra et en quoy elle pourroit estre tenue en aucune maniere et ses heritiers pour et ou nom d’elle.

[19] Pour toutes lesqueles choses dessusd. et chascune d’icelles faire, enteriner et acomplir de point en point selon leur forme et teneur et mettre a fin et execucion deue, lad. testateresse fist, nomma et eslit ses amez et feaulx executeurs et feaulx commissaires, c’est assavoir led. Pierre de Precy, son mary, led. maistre Jehan de Breban, son nepveu, et maistre Pierre de Breban, clerc du roy notre sire en sa chambre des comptes, ensemble ou les deux d’iceulx, auxquelx lad. testaterresse donna et octroya plain povoir, auctorité et mandement especial de ce sien present testament acomplir selon sa forme et teneur. Es mains desquelz sesd. executeurs ycelle testateresse transporta et delaissa du tout la saisine et possession de tous ses biens meubles et heritages quelzconques, lesquelz elle soubzmist du tout a la jurisdicion et contrainte du roy notred. sire et de sa court de parlement. Et volt que la reddicion de ce sien present testament et tout le fait de son execucion soit fait et rendu en lad. court de parlement et ce sien present testament estre enregistré en lad. court de parlement ou livre et registre des testamens, voulant et accordant expressement que ce sien present testament tiengne et vaille par forme de testament, de codicille et ordonnance faite a ses derreniere volenté et tout par la forme et maniere que valoir devra et pourra selon us et coustume. Et rappella et revoca tous autres testamens faiz par devant le jour d’uy.

[20] En tesmoing de ce, nous, a la relacion desd. notaires, avons mis a ces lettres le seel de la prevosté de Paris l’an de grace mil quatre cens et sept, le jeudi vint jours du mois d’octobre.

J. Tillart, Toussains.