Eude la Pisdoe.

[1] A tous ceuls qui ces presentes lettres verronta Ajouté en interligne. , Pierre des Essars, chevalier, conseillerb Ajouté en interligne. maistre d’ostel du roy notre sire et garde de la prevosté de Paris, salut.

[2] Savoir faisons que, par devant Jehan de la Mote et Jehan Manessier, clers notaires du roy notred. sire en son Chastellet de Paris, fut presente en sa personne noble dame madame Eude la Pizdoe, femme de noble homme Jaques l’Empereur, escuier, eschanson du roy notred. sire, gisant par maladie en son lit, toutevoyes saine de pensee et de bon et vray entendement, si comme par ses paroles et de prime face apparoit, attendant et saigement en soy considerant que briefs sont les jours d’omme et de femme, et que a toute creature humaine par lec Suivi d’une rature. decours du temps approche le terme et fin de sa vie temporele, et qu’il n’est chose plus certaine de la mort ne moins certaine de l’eure d’icelle, et n’est nul si riche ne fort qu’il ne convieigne passer par les destroiz de la mort et deceder de ce siecle, mais il n’est nul si saige qui sache ou, quant, ne comment, non voulant intestate departir de ce siecle, mais de son povoir voulant et desirant pourveoir et remedier au salut et remede de l’ame d’elle etd Suivi d’une rature. prevenir aux cas fortuneux qui de jour en jour aviennent, et des biens temporelz que notre seigneur Jhesu Crist lui a prestez en ce monde transitoire disposer et ordener par maniere et disposition testamentaire, pour ce aiant en memoire ces choses, tandiz que sens et raison par discrecion gouvernent soy et sa pensee, de sa certaine science en la presence desd. notaires fist, composa, devisa et ordonna, fait, compose et ordonne son testament ou ordonnance de derraine voulenté ou nom du Pere et du Filz et du benoit Saint Esperit, un Dieu en trinité, et par la fourme et maniere qui s’ensuit.

[3] Et premierement, ycelle madamee La fin du mot est rayé, et –dame est ajouté en interligne. Eude la Pizdoe, comme bonne et vraye catholique, recommanda et recommande trés humblement et trés devotement et de tout son cuer son ame et esperit, quant de son corps departira, a notre seigneur Jhesu Crist, son createur et redempteur, a la trés glorieuse vierge Marie, sa mere, dame et mere de grace et misericorde, a monsieur saint Michiel l’archange, a monsieur saint Jehan Baptiste, a monsieur saint Pierre et saint Pol, a monsieur saint Estienne et monsieur saint Denys, a monsieur saint Nicolas, a madame saincte Katherine, et a tous les anges, arcanges, patriarches, apostres, euvangelistes, disciples, martirs, confesseurs, vierges et a tous sains et a toutes sainctes et a toute la benoite court de paradis.

[4] Aprés, ycelle dame eslut sa sepulture et voult son corps exanimé estre mis en sepulture ecclesiastique, c’est assavoir en l’eglise parrochiale de Ferrieres en Brye, devant l’ymage Notre Dame.

[5] Item, elle voult et ordena toutes ses debtes estre payees et ses torsfaiz estre amendez et reparez par ses executeurs cy dessoubz nommez.

[6] Item, ycelle testaterresse donna et laissa a la fabrique de l’eglise parrochiale de Saint Jehan en Greve a Paris la somme de cinquante £ t. pour une fois. ; item, au curé de lad. eglise six £ t. ; item, aux deux chapellains d’icelle eglise huit £ t. ; item, aux clers de lad. parroisse quarante s. t. ; item, au luminaire de Notre Dame en lad. eglise vint s. t.

[7] Item, lad. testaterresse donna et laissa aux quatre principaulx ordres mendians a Paris, pour dire vigiles et messe solennel en leurs eglises pour icelle testaterresse, c’est assavoir a chascune d’icelles quatre ordres quatre escus d’or valent quatre £ dix s. t. qui font pour tout XVIII £ t. ; item, aux religieux des Blans Manteaulx pour vigiles et messe semblablement en leurd. eglise quatre £ dix s. t. ; item, aux religieux de Saincte Croix pour semblable cause quatre £ dix s. t. ; item, semblablement aux religieux des Billetes quatre £ dix s. t.

[8] Item, lad. testateresse voult et ordena que les vigiles et messes de sesf –s rayé après de, et ses ajouté en interligne. obseques et son luminaire tant a Paris comme a Ferrieres soient fais tout ainsi et par tele maniere qu’il plaira a sesd. executeurs.

[9] Item, elle voult et ordena que le jour de son trespassement ou le landemain soient dictes et celebrees pour le salut et remede d’icelle testateresse cent messes de requiem.

[10] Item, elle laissa au pardon de Saint Jaques du Hault Pas quatre escus valent quatre £ t.

[11] Item, elle donna et laissa a la fabrique de lad. eglise de Ferrieres pour une fois cinquante £ t.

[12] Item, elle ordena et laissa cent escus d’or pour faire faire, mener et asseoir en lad. eglise de Ferrieres une tumbe sur sa sepulture, laquelle sera faicte a l’ordenance de sesd. executeurs.

[13] Item, ycelle testateresse donna ordonnag or– ajouté en interligne. et laissa pour donner et distribuer aux povres pour Dieu pour prier pour l’ame d’elle la somme de ceux cens £ t. pour une fois.

[14] Item, elle laissa et donna et voult estre donné par sesd. executeurs a quatre povres eglises d’emprés et entour lad. ville de Ferrieres, c’est assavoir a chascune desd. quatre eglises vint £ t. pour convertir et employer en aournemens d’eglise.

[15] Item, laissa et donna pour une foiz a la confrarie de Notre Dame aux bourgois de Paris vint £ t.

[16] Item, lad. testateresse volt et ordena que a tousjour mais perpetuelment chascun jour de l’an soit dicte et celebree messe en lad. eglise de Ferrieres en Brie pour le salut et remede des ames d’icelle testaterresse, dud. Jaques, son mary, et de leurs peres et meres, parens et amis trespassez. Et pour ce faire, avoir et continuer perpetuelment, elle laissa et ordena cinquante £ t. de rente annuel et perpetuel ; et volt que aux faiz et despens de son execucion lesd. cinquantes £ t. de rente annuel et perpetuel par ses executeurs soient assises, constituees et assignees en bons lieux et valables comme bien revenans. Et ycelle rente perpetuele volt et expressement ordena estre admortie et tout au mieulx et plus seur que ce pourra estre fait pour lad. messe a perpetuité.

[17] Item, ycelle testaterresse laissa et ordena la somme de deux mile £ t. et ycelle somme de deux mile £ t. volt estre baillee et delivree a son confesseur maistre Jehan Herault, chanoine, d’Aucerre, pour la distribuer et aumosner par le conseil dud. Jaques l’Empereur, son mary, et dud. maistre Jehan Herault.

[18] Item, lad. testaterresse laissa et donna a maistre Pierre l’Empereur, estudiant a Orleans, pour Dieu et en aumosne pour le tenir a l’escole, et pour lui aidier a avoir un office devers le roy ou en parlement et afin qu’il soit tenuz prier Dieu pour lad. testaterresse, la somme de deux mile £ t. pour une foiz.

[19] Item, elle laissa et donna a Denisot l’Empereur tous les biens meubles estans a Romainne et es appartenances dud. hostel de Romainne, avecques la somme de deux cens £ t. pour lui aidier a paier les amendes en quoy il a esté condempné envers le roy notre sire et l’evesque de Paris.

[20] Item, ycelle testaterresse laissa et donna a Agnés, fille Jehan Dol, pour et en acroissement de son mariage, lah Ajouté en interligne. somme de II^e cinquante £ t. et une houppelande noire a grans manches, fourree de gris.

[21] Item, donna et laissa a Guillemette, sa niepce, fille de Gilot Breteau pour une foiz III^e escuz d’or, valent III^e XXXVII £ t. Item, elle donna et laissa a Jehannete Destourbé, pour prier pour l’ame d’icelle testaterresse soixante £ t. pour une foiz. Item, elle laissa et donna a Raoulin Vernon, qui a longuement servi ycelle testaterresse, cent escuz d’or, valent cent XII £ X s. t. Item, elle laissa a la femme de maistre Barthelemi Destourbé une houppelande noire a petites manches fourree de gris. Item, elle laissa a madamoiselle la mere dud. Jaques l’Empereur, unei Suivi d’une rature. houppelande vermeille, fourree de gris ; item, a Jehanne, sa damoiselle qui la sert, une cote hardie de vers a chevaucher toute neuve et le manteau de la couleur mesmes ; item, a Marion la Chaussiere, qui a servi longuement lad. testaterresse dix £ t. pour une foiz ; item, a une autre Marion qui la sert a present quarante s. t. ; item, a Castille et a Pastoureau, aj Ajouté en interligne. chascun d’eulx six £ t. Item, au varlet de chevaulx dud. Jaques, ycelle testaterresse laissa et donna soixante sept s. six d. t. ; item, au page dud. Jaques quarante cinq s. t. Item, elle laissa a sa suer, la femme Thomas de Nuilly, un annel d’or a une perle. Item, lad. testaterresse donna et laissa a Guillemete de Fay dit Petite pour une foiz vint £ t. Item, elle laissa a maistre Jehan Herault, pour prier Dieu pour elle, vint £ cinq s. t. ; item, a frere Guillaume Boubant onze £ cinq s. t. Item, elle donna et laissa a Perrin du Hamel, son clerc, dix £ t. ; item, a Simonnet le Queux LXVII s. VI d. t.

[22] Item, lad. testaterresse volt et ordena que ses bonnes heures soient donnees, et les laissa a donner ak Ajouté en interligne. et par l’ordenance et conseil de maistre Jehan Herault, son confesseur dessus nommé, et dud. Jaques l’Empereur, son mary.

[23] Item, a l’Ostel Dieu de Paris quatre £ dix s. t., c’est assavoir la moitié a la fabrique et l’autre au linge dud. hostel.

[24] Item, lad. testaterresse ratifia, conferma et approuva, et par ce sien present testament appreuve, conferme et ratiffie au mieulx que faire peut certaines lettres de grace mutuelle et don pareil pieça passees par lad. testaterresse et par led. Jaques l’un a l’autre, voulant et expressement consentant que lesd. lettres sur ce faictes vaillent, tiengnent et sortissent leur plain effect en tout leur contenu.

[25] Pour toutes lesqueles choses dessusd. et chascune d’icelles faire, parfaire, paier et distribuer, ordener, enteriner, acomplir, et mettre a execucion deue par la maniere et condicion dessus exprimees, ycelle testaterresse fist, constitua, nomma, eslut et ordena ses executeurs et feaulx commissaires led. Jaques l’Empereur, son mary, Nicolas Petit, Haultier Petit et maistre George l’Oe, ausquelx ensemble, aux trois et aux deux d’eulx, dont led. Jaques soit l’un tousjours, ycelle testaterresse donna, bailla et octroya dés maintenant pour lors plain povoir, auctorité et mandement especial de faire, paier, enteriner et acomplir cest present sien testament, auquel elle se arreste et veult qu’il tiengne et vaille comme ordenance de testament, de codicile ou autrement par toutes les meilleurs voyes et manieres que de droit et de coustume valoir pourra et devral Ajouté en interligne, pour remplacer un mot rayé. . Es mains desquelx sesd. procureurs lad. testaterresse dés maintenant pour lors de devesti et dessaisi de tous ses biens meubles et immeubles, et en bailla par ces presentes la possession et saisine a sesd. executeurs jusques a plain acomplissement de cestuy sien present testament et toutes les deppendences d’icelui ; tous lesquelx sesd. biens meubles et immeubles dés maintenant pour lors lad. testaterresse obliga et ypotheca et volt estre et demourer chargiez, ypothequez, affectez et obligiez pour cestuy sien present testament du tout en tout enteriner et acomplir. Et les soubzmist et soubzmet pour ce du tout a la jurisdicion cognoissance et contrainte de lad. prevosté de Paris et de toutes autres justices soubz qui jurisdicions ilz seront et pourront estre trouvez, laquele testaterresse revoca et rappella tous autres testamens et codicilles, s’aucuns en avoit faiz et passez par avant le jour d’uy.

[26] En tesmoing de ce, nous, a la relacion desd. notaires, avons mis a ces presentes lettres le seel de lad. prevosté de Paris, faictes et passees doubles d’une substance par lad. testaterresse, le lundi XIIII^e jour du mois de decembre, l’an de grace mil III^e et huit.

P. de la Mote ; Mannessier.