Testaments enregistrés au Parlement de Paris sous le règne de Charles VI » Jeanne la Héronne.

Jeanne la Héronne.

  • [R, Archives nationales, X1A 9807, fol. 334-336, aujourd’hui manquants.].
  • S, Bibliothèque nationale de France, Moreau 1161 fol. 585-593. (Mention de collation, fol. 593).
  • Alexandre Tuetey, Testaments enregistrés au Parlement de Paris sous le règne de Charles VI, Paris, 1880, p. 244-252.

[A. Testament, 20 août 1420.]

[1] A tous ceulx qui ces presentes lettres verront, Pierre des Essars, chevalier, conseillier maistre d’ostel du roy nostre seigneur et garde de la prevosté de Paris, salut.

[2] Savoir faisons que par devant Jehan Piece et Jehan de Saint Germain, notaires du roy nostred. seigneur en son Chastellet de Paris, fu personnelment establie Jehanne la Heronne, poissonniere d’eaue doulce, bourgoise de Paris, enferme de corps, saine toutesvoies de pensee et d’entendement, si comme elle disoit et si comme de prime face apparoit, laquele, attendant et considerant qu’il n’est chose plus certaine de la mort ne moins certaine de l’eure d’icelle, et que briefs sont les jours de humaine creature en ceste mortele vie, non voulant de ce siecle trespasser intestate, mais, tandiz que sens et raison gouvernent sa pensee, voulant et desirant de tout son povoir pourveoir au salut et remede de son ame, des biens et choses que nostre Seigneur Jhesu Crist par sa grace lui a prestez et envoiez en cest mortel monde fist, nomma et ordena par devant lesd. notaires et par ces lectres fait et ordene ou nom du Pere et du Filz et du benoist Saint Esperit son testament ou ordonnance de derreniere voulenté en la forme et maniere qui s’ensuit.

[3] Et premierement, comme bonne et vraye catholique, recommanda humblement et devotement son ame sitost que du corps departira a Dieu, a la glorieuse vierge Marie, a monsieur saint Michiel l’angre et a toute la benoite court de paradis. Item, voult et ordena ses debtes estre paiees et ses torfaiz estre amendez par ses executeurs cy aprés nommez dont il leur apperra deuement.

[4] Item, esleut sa sepulture en l’eglise de Saint Severin a Paris, dont elle est parroissianne, en tel lieu et place qu’il plaira a sesd. executeurs. Item, voult et ordena son luminaire qui ardera autour de son corps estre fait de XII torches, chascune de quatre lb. de cire, et de quatre cierges, chascun de quatre lb. pesant ; item, aux chapellains frequantans en lad. eglise de Saint Severin jusques au nombre de XX, a chascun d’eulx II s. p. parmi ce que ilz seront tenuz de venir quierre son corps, aidier a dire vigilles pour elle et convoyer sond. corps jusques a lad. eglise de Saint Severin pour le enterrer.

[5] Item, elle voult et ordena que, en la fin de la haulte messe de son obit et a l’eure que on voudra mectre son corps en terre, soient donnez et aumosnez a povres gens par l’ordenance de sesd. executeurs en l’onneur et pour l’amour de Dieu et des VII euvres de misericorde VII fr. tout comme ilz pourront entendre, c’est assavoir a chascun pour II d. p. Item, elle voult et ordena L messes estre dictes le jour de son enterrement en lad. eglise de Saint Severin ou plus, se tant y pevent estre dictes ced. jour jusques a l’eure de mydi, et pour ce voult estre paié a chascun chapellain I s. p. Item, laissa a la fabrique de lad. eglise Saint Severin dix fr. pour une foiz.

[6] Item, laissa a lad. eglise a tousjours LX s. p. de rente perpetuele que elle et Pierre de Cerisy, son gendre, et Jehanne, sa femme, fille d’elle, ont acquestez ensemble sur la moitié de estaulx et pierres ou l’en vent le poisson d’eaue doulce a Petit Pont a Paris, prés du petit Chastellet, que tient Pierre le Nourricier, tant pour la sepulture d’elle, de sond. gendre et de sad. fille comme pour et parmi ce que les curez et chapellains et tous ceulx de lad. eglise de Saint Severin a qui y peut et doit appartenir seront tenuz de dire ou faire dire pour lad. testaterresse, pour sesd. gendre et fille, un obit pour chascun an a tousjours perpetuelment en lad. eglise de Saint Severin, a tel jour qu’il sera advisié et ordené par sesd. executeurs, et par les curez et marregliers d’icelle eglise.

[7] Item, voult et ordena un tableau de laiton estre fait et assis encontre un pillier ou le mur de lad eglise assez prés de sad. sepulture, faisant mencion icellui tableau dud. obit pour elle, pour sesd. gendre et fille, a tele devise comme sesd. executeurs le vouldront deviser ; et pour la matiere et façon dud. tableau laissa a l’ouvrier qui le fera quarante s. p. ou plus, se plus couste. Item, voult et ordena que sur lad. sepulture soit faicte et assise une tumbe de pierre, en laquele soient figurez et gravez trois personnages ou representacions, l’une d’elle, l’autre de sond. gendre, et l’autre de lad. fille, laquele tumbe se paiera et assera a ses despens.

[8] Item, laissa au curé dud. Saint Severin XXIIII s. p. ; item, aux deux premiers chapellains d’icelle esglise, a chascun IIII s. p. ; item, aux II clers d’icelle eglise, a chascun II s. p. Item, laissa aux quatre ordres mendians de Paris, a chascun ordre vint s. p. parmi ce que ilz seront tenuz venir faire leur devoir en l’ostel ou elle trespassera et accompaigner son corps jusques a lad. eglise Saint Severin et y faire leur devoir tel comme on a accoustumé a faire en tel cas.

[9] Item, laissa a l’Ostel Dieu de Paris vint fr. ; item, aux Quinze Vins de Paris vint s. p. ; item au Saint Esperit en Greve a Paris, povres orfelins et trouvez d’ilec, XX s. p. ; item, aux povres malades et accouchees dud. Hostel Dieu de Paris six fr. a distribuer en leurs mains ; item, a povres filles a marier, a distribuer par lesd. executeurs ainsi que bon leur semblera, vint fr. ; item, a ses deux filloles, c’est assavoir a Jehannette, fille de Jehan de Suresnes, et a Jehannette, fille de Raoulet Foselin, porteur d’eaue, a chascune d’icelles deux fr. ; item, a Lyegaire, femme Jehan Dupille, dix fr. et un de ses blanches ; item, a Agnesot et Marion, filles de lad. Lyegaire, a chascune II fr. ; item, a povres femmes vesves, a distribuer par sesd. executeurs jusques au nombre de XIII, quatre £ p.

[10] Item, a la confrarie du Pere, du Filz et du Saint Esperit, et a la confrarie de la Concepcion de Nostre Dame fondee en lad. eglise de Saint Severin, a chascune XXIIII s. p. ; item, aux confraries de Nostre Dame de Boulongne, de Saincte Katherine du Val des Escoliers, de Saint Michiel, de Saint Mathurin, toutes fondees a Paris, et a la confrarie de Nostre Dame des Champs lez Paris, a chascune VI s. p.

[11] Item, voult et ordena un anué estre fait et dit a pain, a vin et a chandelle de cire chascun jour par les freres religieux celestins de Paris pour le salut et remede de son ame, et pour ce faire leur laissa XL fr. Et pour ce que lesd. religieux celestins n’ont pas accoustumé que l’en face ainsi chascun jour en leur eglise comme l’en fait es autres eglises et parroisses de Paris, elle voult que sesd. executeurs et lesd. religieux advisent comment l’offrande desd. pain, vin et chandelle se fera le plus priveement et secretement que faire se pourra, et tout a une foiz, se mestier est ; et a ce qui sera advisé par sesd. executeurs ce que pourra couster lad. offrande de pain, de vin et de chandelle de cire, elle vout qu’il soit paié des biens de son execucion, oultre et par dessus lesd. quarante fr., et baillé ausd. religieux celestins. Item, laissa auxd. religieux celestins pour une foiz la somme de XXV fr. pour prier Dieu pour le salut de son ame. Item, laissa au pardon de Hault Pas au dehors de Paris six s. p.

[12] Item, laissa a Jehannette, sa chamberiere, deux fr. ; item, a la nourrice de maistre Macé Heron, son filz, XVI s. p. ; item, a Jehannette, femme de Guillaume le Borgne, XVI s. p. Item, laissa a tousjours aux enfans de Germaine, sa fille, pour eulx, leurs hoirs et ayans cause tout, tel droit, part et porcion qu’elle a et peut avoir et demander en une petite maison assise a Paris en la rue des Bouticles, prés du Petit Pont.

[13] Item, laissa a tousjours a Martin, filz dud. maistre Macé Heron, son filz, pour lui, ses hoirs et ayans cause son hostel, court, jardins, vignes et tous ses autres heritages quelzconques, sans riens excepter, qu’elle a et peut peut avoir assiz en la ville et terrouer de Montrouge, moyennant et parmi ce que il et ses ayans cause seront tenus de faire dire et celebrer chascun an a tousjours perpetuelment en lad. eglise de Saint Severin une messe solennelle de requiem a dyacre et soubz diacre, a tel jour comme elle trespassera ou qu’il sera advisé par sesd. executeurs.

[14] Item, les laiz et ordenances dessusd. paiez, enterinez et acompliz lad. testaterresse voult et ordena tout le residu de tous ses biens meubles, debtes et conquestz immeubles quelzconques estre donné, distribué et aumosné pour Dieu pour le salut de son ame, tant en messes chanter comme a povres gens et autres euvres piteables et charitables, et tout ainsi et par tele maniere comme il plaira a sesd. executeurs.

[15] Pour toutes et chacunes lesqueles choses dessusd. faire, paier, enteriner et acomplir et mectre a fin et execucion deue de point en point selon leur forme et teneur, lad. testaresse fist, nomma, esleut et ordena ses executeurs et feaulx commissaires maistre Jehan de Cerisy, notaire et secretaire du roy nostre seigneur, frere Laurent de Crespy, de l’ordre desd. celestins, ses freres, led. maistre Macé Heron, son filz, secretaire du roy nostre seigneur et de monsieur de Berry, led. Pierre de Cerisy et Jehan Patart, ses gendres, ausquelx ensemble et aux deux d’iceulx, dont l’un de sesd. frere ou led. maistre Macé soit tousjours l’un d’iceulxa Correction pour l’un d’iceulx d’eulx. , elle donna et octroya, donne et octroye plain povoir et auctorité de ce faire et de ce qui ou cas appartendra et que bons et loyaulx executeurs pevent et doivent faire en tel cas.

[16] Et voult et ordena icelle testaterresse que, ou cas et sitost que l’un de sesd. freres sera alé de vie a trespassement avant cestui sien present testament acompli, que sesd. executeurs survivans en nomment un autre ou lieu dud. trespassé, es mains desquelx ses executeurs dessus nommez elle se dessaisy de tous ses biens meubles et immeubles quelzconques presens et a venir, et les en voult estre et demourer saisiz et vestuz tantost elle alee de vie a trespassement jusques a plain acomplissement de cestui sien present testament, et lesquelz pour ce du tout elle soubzmist et soubzmect a justicier, vendre et exploiter par nous, nos successeurs, prevostz de Paris et aprés tous autres justiciers soubz qui jurisdicion ilz seront et pourront estre trouvez, en revoquant, irritant et anulant du tout au neant tous autres testamens et ordenances de derreniere voulenté par elle faiz et ordenez par avant cestui sien present testament, auquel elle se arresta et arreste du tout ; elle voult icellui estre, valoir et demourer sortir et avoir son plain effect selon sa forme et teneur par la meilleur forme et maniere que valoir pourra et devra de us, de coustume et autrement.

[17] En tesmoing de ce, nous a la relacion desd. notaires, avons mis a ces lectres le seel de la prevosté de Paris l’an de grace mil quatre cens et neuf le mardi XX jour du mois d’aoust.

Saint Germain ; Piece.

[B. Codicille, 14 juin 1411.]

[18] A tous ceulx qui ces presentes lectres verront, Bruneau de Saint Cler, chevalier, maistre d’ostel du roy nostre seigneur et garde de la prevosté de Paris, salut.

[19] Savoir faisons que par devant Jehan Piece et Jehan de Saint Germain, notaires du roy nostred. seigneur en son Chastellet de Paris, fu personnelment establi Jehanne la Heronne, poissonniere d’eaue doulce, bourgoise de Paris, enferme de corps, saine toutesvoies de pensee et d’entendement, si comme elle disoist et si comme de prime face il apparoit, laquele, en augmentant par maniere de codicille son testament par elle autreffois fait soubz le seel de la prevosté de Paris le mardi XX jour d’aoust l’an mil CCCCIX, parmi lequel ces presentes sont annexees, laissa a Katherine, fille de Germaine, sa fille, femme de Jehan Patart, sa meilleur cotte longue qu’elle ait avec la penne servant a icelle et la cotte simple de mesmes.

[20] Item, elle revoca et revoque la clause et ordenance mise en sond. testament du residu de tous ses biens meubles, debtes et conquestz immeubles, par lesquelles elle avoit voulu et ordené icellui residu estre donné, distribué et aumosné pour Dieu ; et veult que le tiers du residu de ses biens meubles et debtes tant seulement soit donné, distribué et aumosné pour Dieu pour le salut de son ame, tant en messes chanter comme a povres gens, et tout ainsi et par tele maniere comme il plaira a ses executeurs nommez en sond. testament ; et les autres deux tiers d’iceulx ses biens meubles et debtes, elle veult qu’ilz voisent et appartiennent a ses heritiers

[21] Et pour cestui sien present codicille et tous les autres laiz et ordenances contenus en sond. testament enteriner, acomplir et mectre a fin et execucion deue de point en point selon la forme et teneur, lad. testaterresse fist, nomma et ordena ses executeurs ceulx nommez en sond. testament que a present vivent, ausquelx ensemble et aux II d’iceulx, dont frere Laurens de Crespy, religieux des celestins de Paris, son frere, ou maistre Macé Heron, son filz, notaire et secretaire du roy nostre seigneur, soit tousjours l’un d’iceulx II, elle donna povoir et auctorité de ce faire tout ce que au cas appartiendra et que bons et loiaux executeurs peuvent et doivent faire en tel cas ; es mains desquelz executeurs elle se dessaisi de tous ses biens meubles et immeubles quelzconques presens et a venir, et les en volt estre et demourer saisiz et vestuz tantost ele alee de vie a trespassement jusques a plein acomplissement de cestui codicille et des autres laiz et ordenances contenuz en sond. testament ; et lesquelz ses biens elle soubzmist et soubzmet pour ce du tout a justicier, vendre et exploiter par nous, nos successeurs prevostz de Paris et par tous autres justiciers soubz qui jurisdicion ilz seront et pourront estre trouvez ; et volt sond. testament en tous les autres poins et articles et cest codicille valoir et sortir leur plain effect par la meilleur forme et maniere que valoir pourront, tant de fait comme de droit et autrement.

[22] En tesmoing de ce nous, a la relacion desd. notaires, avons mis a ces lectres le seel de la prevosté de Paris l’an de grace mil CCCC et onze le mercredi XIIII jour de juing.

J. de Saint Germain ; J. Piece.


a Correction pour l’un d’iceulx d’eulx.