Gille de Courlon.

[A. Testament, 29 avril 1400.]

[1] Ou nom du Pere et du Filz et du Saint Esperit, amen. A tous ceulx qui ces presentes lettres verront ou orront, Henry Testart, prevost de Courtenay, et Jehan de Ville, garde du seel de lad. prevosté, salut.

[2] Sachent tuit que par devant Jehan Archerat, clerc juré dud. seel et de l’escripture de lad. prevosté auquel nous adjoustons pleniere foy et auquel quant a ce qui s’ensuit nous avons commis et commettons notre povoir, establie personnelment, noble dame madame Gile de Courlon, dame du fort d’Auxi, jadiz femme de feu messire Pierre de Dixi, jadiz chevalier, et a present femme de noble homme Jehan de Saint Phale, escuier, considerans et regardans qu’il n’est chose si certaine que de la mort ne chose si incertaine que de l’eure d’icelle, et que un chascun bon chreptien pour le sauvement de son ame, lui estant en son bon sens et discretion, doit ordonner de ses biens, non voulans aller de cest siecle de vie a trespassement sans faire testament, laquelle fist, ordonna et establi son testament et derreniere voulenté en la maniere qui s’ensuit, en revocant, rappelant et mettant au neant tous autres testamens par lui faiz, se aucuns en a faiz avant la date de ce present testament.

[3] Premierement, elle recommanda son ame quant elle partira de son corps a la benoiste sainte Trinité de paradis, a Dieu le Pere, a Dieu le Filz, a Dieu le benoist Saint Esperit, et a tous les sains et a toutes les sainctes de paradis, a la glorieuse benoiste vierge Marie et a toute la court de paradis.

[4] Item, elle ordonna et veult estre enterree et esly sa sepulture en l’abbaye et eglise de Pruilly, empres feu Geuffron de Courlon et madamoiselle Ysabeau de Courgenay, ses pere et mere, dont Dieu ait les ames, et y veult estre menee et portee, en quelque lieu qu’elle aille de vie a trespassement. Item, voult, ordonna et consenti que ou lieu ouquel elle sera mise et enterree en lad. eglise de Pruilly soit mise sur son corps une tumbe de pierre, qui soit gravee et ses armes dessus, et entour de lad. tombe escript son nom selon l’ordonnance de mes executeurs cy dessous nommez.

[5] Item, voult et ordonna que avant toute euvre ses debtes soient paiees et ses torsfaiz amendez, desquelx il apperra ou pourra apparoir sommierement et de plain a sesd. executeurs.

[6] Item, voult et ordonna que le jour de son obit que il y ait quatre torches, chacune de trois lb. de cire, et XIII cierges, chascun d’une livre de cire. Item, voult et ordonna que a chascun des pouvres qui seront ordonnez pour tenir lesd. torches et cierges soient donnez trois aulnes de bureau a l’aune de Provins. Item, voult et ordonna lad. constituante que le jour de son obit il ait IX aulnes de bureau a l’aune dudit Provins, faites et cousues en maniere dou drap, sur lequel ait une croix blanche. Item, voult et ordonna que a chascun povre qui vendra a l’aumosne le jour de sond. obit soient baillez en aumosne deux d. t.

[7] Item, a lessé a chascun prestre qui chantera et celebrera messe pour lui le jour de son obit aud. lieu de Pruilly deux s. t. Item, voult et ordonna que XV s. t. soient baillez pour lire sept foiz le psaultier ; item, pour dire les sept scaulmes tous les jours d’un an, XL s. t.

[8] Item, voult et ordonna que en l’eglise ou elle trespassera soient baillez quatre cierges, chascun d’une lb. de cire, et dicte une messe. Item, a laissié pour une fois a la fabrique d’icelle eglise V s., et a cellui qui adonc desservira icelle eglise pour une fois cinq s.

[9] Item, a laissié a l’eglise de Pruilly, ou son corps doit gesir, pour chanter annuelment pour chascune sepmaine deux messes solempnees, c’est assavoir l’une au mercredi et l’autre au vendredi, pour le salut des ames de lad. constituante et de sesd. feux pere et mere et mary, de ses enfans, heritiers et successeurs, dix £ de terre a tournois, ou cent fr. pour une fois, lequel qu’il plaira mieulx a ses hoirs et executeurs, par ainsi que sesd. hoirs ne seront point tenuz de admortir lesd. X £ t. de terre. Et seront tenus l’abbé et convent de eulx obliger, et faire confermer par leur abbé en la guise et maniere qu’ilz firent pour sesd. feux pere et mere, afin qu’ilz puissent et soient tenus recevoir son corps, ceulx de ses enfans et heritiers, quant le cas y escherra, ainsi qu’ilz firent les corps de sesd. feux pere et mere. Item, a laissé a l’autel de saint Jehan de Pruilly les revestemens qui appartiennent a un prestre pour une fois.

[10] Item, a laissié a l’eglise Notre Dame de Bray toute sa terre de Lunam ainsi comme elle se comporte, avecques les maisons, cens, rentes, terres, et toutes appartenances, au prouffit de lad. eglise et du college, par ainsi qu’ilz seront tenus de chanter et celebrer tous les jours perpetuelment une messe de requiem en lad. eglise, en la chappelle Saint Nycholas, pour le salut et remede de son ame et des ames de sesd. feux pere et mere et mary et enfans, de ses predecesseurs et successeurs, et de faire un anniversaire solennel chascun an ou cueur de leur eglise, lequel anniversaire le curé d’icelle eglise leur aidera a faire, et si sera tenus de faire un autre anniversaire chascun an en son autel pour le remede des ames d’icelle constituante et des dessusd., et pour ce icellui curé prandra chascun an a tousjours XX s. t. sur et de la revenue d’icelle terre.

[11] Et ou cas que iceulx de l’eglise de Notre Dame de Bray ne pourroient tenir lad. terre de Dontilly, laquelle ses hoirs ne leur seront tenus aucunement de admortir, mais veult qu’elle soit vendue par juste et loyal pris, et l’argent converti en autre rente, laquelle ilz puissent bien tenir. Et ou cas que iceulx de l’eglise de Notre Dame de Bray supplie au roy notre sire et a monsieur l’arcevesque de Sens et a chascun d’eulx, et le veult et ordonne en tant que faire le puet et doit que lad. terre de Dontilly, ou autre rente qui en lieu d’icelle seroit achetee, leur soit empeschee et arrestee, jusques a ce que ses heritiers et successeurs puissent estre souffisamment certifiez que led. service se continue de dire et estre celebré selon son entencion et ordonnance. Touteffoiz, elle veult et ordonne que, se il avient que lad. terre de Dontilly soit en vente et qu’elle parte des mains desd. Notre Dame, que Pierre et Jehan de Courlon, freresa Ajouté en interligne. , ses cousins germains et enfans de Regnaut de Courlon, son oncle, l’aient et puissent avoir devant tous autres en païant et baillant pour ycelle juste et loyal pris et tel que on en pourroit trouver d’autre.

[12] Item, a laissié a icelle eglise Notre Dame de Bray XL s. t. pour une foiz par tele maniere que, se le cas y escheoit, quant elle sera alee de vie a trespassement, se en portant son corps a Pruilly il passoit par Bray, les chanoines et curé d’icelle eglise seront tenuz de mener la procession et venir au devant de son corps et dire vigiles et ce qui appartient, et mener et conduire son corps hors de lad. ville de Bray.

[13] Item, a laissié a l’eglise de Villiers sur Seine X s. t. pour une foiz, et au prestre qui desservira lad. eglise V s. t. Item, a laissié au luminaire de lad. eglise de Villiers un arpent de terre, pris emprés celui qui sad. feue mere laissa a lad. eglise, quant elle ala de vie a trespassement, ou ailleurs.

[14] Item, a laissié a l’eglise du Plaissie un arpent de terre a prandre empres cellui que sad. feue mere laissa a lad. eglise, ou ailleurs, pour faire chascun an un anniversaire pour ycelle dame et pour ses hoirs, lesquelx ne seront point tenus de amortir ycelle terre.

[15] Item, a laissié a la fabrique de Saint Estienne de Sens et de Saint Jaques de Hault Pas a chascun V s. t., pour une foiz. Item, a laissié a l’eglise Notre Dame de Noyen cinq s. t. Item, a laissié a l’eglise de Dontilly V s. t. ; item, a l’eglise de Leschielles V s. t. ; a la maison de Traignel V s. t. ; a l’eglise de Courlon V s. t. ; a cellui qui desservira lad. eglise de Courlon V s. t. ; a l’eglise parrochial de Chasteauneuf X s. t. ; a cellui qui desservira lad. eglise V s. t. ; a l’eglise du prioré de Courtevost V s. t. ; a l’eglise Saint Jehan dud. lieu X s. t. ; a cellui qui desservira lad. eglise II s. t. ; a l’eglise du Pont aux Dames XL s. t. ; a l’eglise Saint Loup de Noul XX s. t. et au prieur X s. t. ; au clerc XII d. t. ; a l’eglise de Saint Maturin X s. t. ; a la fabrique du Plaissie Gasteblef V s. t.

[16] A Jaqueron, femme Jehan Malingre, sa tante, XL s. t. ; a damoiselle Guillemete de Noillé XL s. t. ; a Babelon, femme Guillot du Clo, XL s. t. ;

[17] A l’eglise de Bordeaux lez Aussi V s. t., et a cellui qui desservira lad. eglise V s. t.

[18] A Loys, filz Robin Hue, LX s. t. Item, a laissié aux femmes du Plaissie Gasteblef un de ses manteaux sangles, pour relever les femmes gisans. Item, a Jehanne la Mignote, jadiz sa norrisse, demourant a Villiers sur Morin, XL s. t. Item, aux chamberieres qui la serviront au jour qu’elle yra de vie a trespassement, oultre leur salaire, a chascune V s. t. Item, a cellui qui fera la fosse ou elle sera enterree V s. t.

[19] Item, ycelle dame pour l’amour de Dieu et en ausmone a afranchi et par ces presentes afranchit Gilet Belin le jeune, son fillau, en recompensacion des agreables services que ses pere et mere lui ont faiz et a ses devanciers ; et pour ce a ordonné et ordonne que il demoure frans et quittes de ce qu’il estoit son homme de corps et que ses hoirs et successeurs n’en puissent jamais rens demander aud. Gilet ne a ses hoirs et successeurs.

[20] Item, voult et ordonna que les eglises et prestres a qui elle a faiz lais comme dit est soient tenus de dire messes et vigiles pour la recomendacion de son ame.

[21] Item, a laissié a Guillaume le Viconte, seigneur de Perreux, et a ses enfans C s. t. a prendre chascun an sur sa terre du Plaissie de Gasteblef, ausd. Pierre et Jehan de Courlon, freres, ses cousins germains, pour les bons et agreables services que ilz lui ont faiz ou temps passé et pour l’acroissement de leur bien et de leur honneur, la tierce partie de toute sa terre, rentes et heritages, pour eulx, pour leur hoirs yssus de leurs corps.

[22] Item, veult et ordonne que toutes les choses dessusd. soient acomplies avant toute euvre de ses biens meubles qui pourra, et que les demourans d’iceulx biens meubles soient distribuez pour l’amour de Dieu, et se yceulx biens meubles ne pevent souffire, que on les prengne sur le remenant de ce qu’elle aura.

[23] Item, elle fait, ordonne et institue ou residu de ses biens sa tres chiere et amee fille Ysabeau de Dixi son heritiere seule et pour le tout ainsi que de raison elle le doit estre, a laquelle elle charge sur le peril de son ame que en son present testament et ordonnance ne mette aucun empeschement, mais de tout son povoir pourchace que il soit acompli dedens l’an aprés son decés.

[24] Pour lequel son testament ou derreniere voulenté mettre a fin et execucion deue, elle a faiz, esleuz et nommez ses executeurs les dessusd. Pierre et Jehan de Courlon, ses trés chiers cousins, Guillaume le Viconte de Villeperreux, et Guillaume de Gallede, auxquelz et a chascun d’eulx portant cest present testament elle donne plain povoir, auctorité et mandement especial des maintenant pour lors de prandre par leur main tous ses biens, tant meubles comme heritaiges, et de les tenir ou faire gouverner jusques a l’enterinement de ce present sien testament ou derreniere voulenté.

[25] Et ne veult pas que les hoirs puissent joïr de sesd. biens, rentes et revenues quelxconques ne que aucune chose leur en soit baillee jusques a ce que ce present sien testament ou derreniere voulenté, comme dit est, soit entierement et du tout acompli, lequel sien testament ou derreniere voulenté elle soubmist du tout au roy notre sire, a sa court de parlement et a la court du bailliage de Sens et non a autres, obligans expressement quant a ce au roy notred. sire et a sesd. cours tous ses biens meubles et heritages, cens, rentes, revenues et autres biens et possessions quelxconques ; et veult que ce present sien testament ou derreniere voulenté vaille par la voye et maniere comme faire se pourra tant de droit comme par coustume, et s’il ne vault comme testament, qu’il vaille comme codicille, donation pour cause de mort, ou comme autre derreniere voulenté, et que l’en le puisse doubler, tripliquer et faire tant de foiz en ceste mesme substance comme bon semblera a sesd. executeurs ou a ceulx qui de l’execution de sond. testament se entremettront, non mie que elle veulle que ce soient plusieurs testamens ou plusieurs derrenieres voulentez, mais veult et entent que ce soit un testament ou derreniere voulenté redicte en plusieurs lettres ou instrumens pour eviter les perilz qui s’en pourroient ensuir s’il n’estoit fait que en une lettre seulement et que se, en sond. present testament ou ordonnance de derreniere voulenté avoit aucune doubte, obscurité ou difficulté, elle veult que sesd. executeurs les puissent interpreter et declairer comme mieulx leur semblera au prouffit et pour le salut de son ame, et pour ce elle leur donne pleniere puissance et mandement especial.

[26] Presens a ce faire avec led. juré Guillot Pommier, messire Eudes Blondeau, prestre, curé de Cudot ; et Guillem Lordeau, si comme led. juré nous a rapporté par cest escript. En tesmoing de ce, nous, a la relacion dud. juré, avons scellees ces presentes lettres de testament dud. seel de lad. prevosté.

[27] Donné le jeudi avant la Saint Jacques et Saint Philippe, apostres, penultieme jour du mois d’avril, l’an mil quatre cens.

J. Archerat.