Testaments enregistrés au Parlement de Paris sous le règne de Charles VI » Simonette la Maugère.

Simonette la Maugère.

  • [R, Archives nationales, X1A 9807, fol. 497v-498, aujourd’hui manquants.].
  • T, Bibliothèque nationale de France, Moreau 1162, fol. 428-431. (Mention de collation de l’original présenté par l’exécuteur testamentaire Étienne des Portes, fol. 431).
  • Alexandre Tuetey, Testaments enregistrés au Parlement de Paris sous le règne de Charles VI, Paris, 1880, p. 382-385.

[1] In nomine Patris et Filii et Spiritus Sancti, amen.

[2] Je, Symonnette la Maugiere, ordonne mon testament et derreniere voulenté en la maniere qui s’ensuit.

[3] Premierement, je commans mon ame a Dieu, a la benoite vierge Marie, a monsieur saint Michiel l’ange, a tous anges, arcanges, a tous saints et a toutes sainctes et a toute la Trinité de paradiz.

[4] Item, je ordonne que ung pelerinage voué a Nostre Dame de Chartres a pié soit fait et acomply et y envoier ung homme de pié, en lui baillant argent pour faire ses despens et pour faire chanter une messe basse a lad. eglise de Chartres et de faire devant Nostre Dame offrande de la valeur de deux s.

[5] Item, je vueil et ordonne que ung pelerinage voué a Nostre Dame de Liance de pié soit acomply et fait et y envoier ung homme de pié, en lui paiant tous ses despens, et de faire chanter en lad. eglise une messe basse et offrande de faire devant Nostre Dame la somme de deux s.

[6] Item, a Saint Lienart de Crocy de y envoier ung homme de pié et de y faire chanter une messe basse et mectre offrande devant le saint d’ung cierge du pris de deux s.

[7] Item, de envoier ung homme a Saint Cosme de Lusarches de pié et de y faire chanter une messe devant le saint et offrande de ung cierge de deux s.

[8] Item, je ordonne a chascune des quatre ordres mendians trois fr. par tel que ilz convoieront le corps au moutier et yla chascune ordre chantera unes vigiles a trois leçons.

[9] Item, je ordonne et laisse a ma niepce Perrette la Baboe, fille de ma suer Marguerite la Baboul, mon surcot lonc et ouvert et ma coste simple et une houppellande de quartette fourree de gris ou menu vair, comme aux executeurs semblera bon ; et pour son bien et avancement de mariage, je lui laisse deux cens fr.

[10] Item, a Jehanneton, ma chamberiere, qui nous a servis par longtemps, pour le bien et avancement de son mariage, je lui laisse dix fr., ung lit, une couverture moyenne, deux paires de draps de deux lez de chanvre, deux cuevrechiefz, ung orillier et lui laisse dix aulnes de drap pour la vestir a ses nopces du pris d’ung escu l’aune, et se ainsi est que lad. Jehanneton face aucune chose qui ne soit pas a point ou qu’elle ne se mariast au gré de ses amis et parens, je vueil le don estre nul et aussi que les executeurs ne distribuent a ame de ce que est dit au dessus jusques que elle ait trouvé partie par nom de mariage.

[11] Item, je vueil que les deux laiz dessus nommez que a ma niepce et Jehanneton, se aucunement ne se gouvernoient bien ou que ilz ne se mariassent au gré de leurs amis ou que ilz allassent de vie a trespassement, je vueil que lesd. laiz ne vaillent riens.

[12] Item, je vueil que toutes mes debtes soient paiees et mes torfaiz amendez.

[13] Item, je laisse au curé de Saint Severin vint quatre s. Item, je laisse a Perrette, ma chamberiere, dix fr.

[14] Item, je ordonne que, ou cas que mon mari yra de vie a trespassement avant que moy, que mon corps soit enterré avecques le sien, se il est enterré a Paris, ou, se il n’est enterré a Paris, que il soit mené en quelque place ou le sien sera enterré, et se je vais de vie a trespassement avant que lui, je vueil qu’il soit enterré la ou mond. mary ordonnera.

[15] Item, je vueil que la journee que le corps sera enterree en l’eglise ou il sera enterré soient chantees de chascune ordre mendianne seize messes. Item, que, se en la parroisse Saint Severin le corps n’est enterré, je vueil que en aucun jour soient chantees vigilles a neuf leçons et une haulte messe et huit basses messes des chapellains de l’eglise et que il y ait quatre grans cierges aux quatre quinés du poile. Item, je ordonne deux anuelx, ung en l’eglise ou le corps sera enterré et l’autre a Saint Severin. Item, je vueil que au corps porter en terre soient treize povres portans chascun une torche et en chantant le service. Item, je vueil que la journee que le corps sera enterré soient donnez et distribuez trente fr. aux povres.

[16] Item, je laisse a l’eglise Saint Severin, pour l’euvre de l’eglise, huit fr. ; item, aux clers de l’eglise deux fr. Item, je laisse aux dames de Sainte Avoye, a la chapelle Haudry, au Saint Esperit de Greve, a chascun seize s. pour telz qu’ilz diront vigiles et messe ; item, a toutes les confraries dont je suis, a chascune seize s.

[17] Je ordonne mes executeurs mon filz Jaquet, maistre Estienne des Portes et maistre Guillaume Laillier et les deux d’iceulx et soubzmés mon testament a la voulenté de mesd. executeurs.

[18] Item, je laisse a suer Jehanne de la Saussoye une houppellande de pers et une penne tele que il plaira aux executeurs ; item, a Jaquette, povre femme demourant en sa rue, deux fr. Item, je laisse a Jehannette la Rame qui me garde quatre fr. oultre ce que lui est deu de son salaire ; item, a messire Jehan Jaquot trente fr. ; item, a Drion quatre fr. ; item, Regnault huit fr. ; item, a Guillaume trois fr. ; item, a Thevenet trois fr. ; item, a la nourriche six fr.

[19] Presens a ce Thevenet Jolis et Guillemin Petit et Jehanne la Royne et Jehannin Carron. Fait le XXVIe jour d’octobre mil quatre cent et vint.

J. Rube.