MCCLXXIV

Charles, etc. Savoir faisons, etc., nous avoir receu l'umble supplicacion des parens et amis charnelz de Guillaume Cado, natif de Chasteau Gontier ou diocèse d'Angiers, jeune compaignon, aagé de vint ans ou environ, sellier, demourant à Lezignen, chargé de femme, à present detenu prisonnier en noz prisons à Poictiers, contenant que, environ la feste de saint Jehan Baptiste derrenierement passée, ledit Guillaume fut conjoinct par mariage avecques Fleur Rigouronne, fille de feu Olivier Rigouron, en son vivant demourant à Poictiers. Depuis lequel mariage et environ la saint Michiel aussi derrenierement passée, icellui Guillaume ala demourer audit lieu de Lezignen, où il avoit demouré autresfoiz, en entencion de gaingner sa vie et de sadicte femme. Et pour ce que audit lieu de Lezignen ne à Poictiers, il ne povoit bonnement gangner sa vie ne de sadicte femme, dont il estoittrès marry et desplaisant, pourpensa en son courage qu'il lui failloit avoir de l'argent pour vivre et entretenir son mesnage et mestier. Et de fait...1 a ou environ, ung jour de dimenche, [p. 17] icelluy Guillaume se partit du lieu de Lezignen et print ses turquoises 2 à lui necessaires en son dit mestier de sellier, et vint audit Poictiers, en entencion de desrober Husson Nouvelle prebstre, demourant ou bourg Saint Hillaire, qui avoit nom d'estre riche homme et en l'ostel duquel il avoit autresfoiz esté, par le moien d'une chamberière du païs d'Anjou que ledit Husson avoit, qui l'avoit mené boire oudit hostel ; et lui estant audit Poictiers, coucha celle nuyt avecques sa femme, en l'ostel de la mère d'icelle. Et le lendemain qui fut jour de lundi, ledit Guillaume en venant de Saint Hilaire le Grant dudit Poictiers, se transporta en l'ostel dudit Husson, et par dessus le mur de la court estant au devant d'icelle entra en la gallerie de ladite maison, et lui estant en ladite gallerie vit qu'il n'y avoit personne en icelle maison, ouvrit à sesdites turquoises la chambre dudit Husson et entra en icelle, en laquelle il trouva deux coffres appartenans audit Husson, lesquelz de sesdites turquoises il ouvrist et rompit les serrures, et trouva en l'un desdiz coffres la somme de sept escuz, et en l'autre la somme de cent escuz d'or neufz et ung petit tissu et une petite sainture garnie d'argent, cinq tasses et trois cuillers d'argent; lesquelz sommes et choses dessus dictes il print et emporta, et près l'estang dudit Saint Hilaire, en certain lieu où ne habité guères personne les mussa dedens terre, fors seulement cinq escuz d'or qu'il retint par devers lui ; lesquelz il fist changer et d'iceulx achetta des mors de brides et des estrivières, lesquelles ledit jour il porta audit lieu de Lezignen. Et certain jour après retourna querir lesdites choses au lieu où il les avoit mussées, et les emporta audit lieu de Lezignen. Et depuis naguères, par suspeçon ou autrement, à l'occasion dudit cas, il a esté prins et constitué prisonnier en nos dites prisons où il est de present, et a confessé avoir commis ledit cas [p. 18] par la manière que ditest. Et doubte que on vueille contre lui proceder par rigueur de justice et le pugnir corporellement, se noz grace et misericorde ne lui estoient sur ce imparties, humblement requerant que, attendu ce que dit est et que ledit Guillaume par neccessité a commis ledit cas, et que en tous autres cas il est bien famé et renommé, de bonne vie et honneste conversacion, non actaint ne convaincu d'aucun autre vilain cas, blasme et reprouche, il nous plaise lui impartir icelles. Pour quoy nous, ces choses considerées, voulans misericorde preferer à rigueur de justice, audit Guillaume avons oudit cas quicté, remis et pardonné, etc. Si donnons en mandement, par ces mesmes presentes, au seneschal de Poictou et à tous noz autres justiciers, etc. Donné à Lyon sur le Rosne, ou moys d'avril l'an de grace mil cccc. cinquante six avant Pasques, et de nostre règne le xxxv^me.

Ainsi signé : Par le roy, à la relacion du conseil. Gauvigneau. — Visa. Contentor. Duban.