MCCCLXXXI

Loys, par la grace de Dieu roy de France. Savoir faisons à tous, presens et advenir, nous avoir receue l'umble supplicacion de nostre amé et feal conseiller, maistre Mathurin [p. 412] Arembert1, seigneur de Cevret en nostre païs de Poictou, contenant qu'il est seigneur dudit lieu de Cevret, qui est une belle, notable et ancienne place, bien emparée, bastie et ediffiée de belles tours, garites, eschiffes, foussez, pont leveis et donnant, basse court et dangeon et autres fortifficacions et emparemens neccessaires pour la garde de ladicte place et de ceulx qui y ont leur retraite et reffuge. Et est icelle place assise en bon et fertil païs, en nostre chastellenie, terre et baronnie de Lezignen, dont [p. 413] elle est mouvant et tenue à foy et hommage lige de nous, à cent solz de devoir à muance d'omme, quant le cas y avient. Et pour ce que audit lieu, terre et seigneurie de Cevret ledit suppliant n'a seullement que basse justice, qui lui semble peu de chose, veu la grandeur et estandue de sadicte seigneurie, il nous a humblement requis que en icelle lerre et seigneurie de Cevret nostre plaisir feust de lui donner les haulte et moyenne justice, que à nous y appartient, et sur ce lui impartir nostre grace. Pour ce est il que nous, consideré l'assiète de ladicte place, en laquelle nous avons puis naguères et par aucuns jours, pour nostre plaisir, habité, et les bons et agreables services que ledit suppliant et feu maistre Jehan Arambert, son père, ont par longtemps faiz à feu nostre très cher seigneur et père que Dieu absoille, et à nous en maintes manières, fait encores et continué chacun jour ledit suppliant, et esperons que plus nous face ou temps advenir, à icellui suppliant, pour ces causes et consideracions et autres à ce nous mouvans, avons, de grace especial, plaine puissance et auctorité royal, pour l'exaltacion et acroissement de sadicte terre et seigneurie de Cevret, donné et octroyé, donnons et octroyons, par ces presentes, que [en] icelle terre et seigneurie de Cevret et ès appartenances et appendences d'icelle il ait tout droit de justice et juridicion, haulte et moienne avec la basse qu'il y avoit par avant, et tous les droiz qui en deppendent et pevent deppendre, pour en joir et user par lui et ses hoirs et aians cause, seigneurs dudit lieu, terre et seigneurie de Cevret, à tousjours mès perpetuelment. Et voulons et nous plaist que icelle haulte justice et moienne soit tenue par ledit suppliant et sesdiz hoirs et aians cause soubz les foy et hommage lige et à tel et semblable devoir seullement que d'ancienneté on nous estoit tenu de faire pour cause d'icelle terre et seigneurie, sans aucun autre acroissement de charge ou redevance ; reservé à nous toutesvoyes le ressort et sou- [p. 414] veraineté. Si donnons en mandement à noz amez et feaulx gens de noz comptes et tresoriers, etc., au seneschal de Poictou et à tous noz autres justiciers et officiers, ou à leurs lieux tenans, presens et advenir, et à chascun d'eulx, si comme à lui appartendra, que de nostre grace, volenté, don et octroy ilz facent, seuffrent et laissent ledit suppliant et ses successeurs, seigneurs dudit lieu de Cevret, joir et user plainement et paisiblement, sans lui mettre ou donner, ne souffrir estre mis ou donné aucun destourner ou empeschement. Et afin que ce soit chose ferme et estable à tousjours, nous [avons] fait mettre nostre seel à ces dictes presentes. Sauf en autres choses nostre droit et l'autruy en toutes. Donné audit lieu de Cevret, ou mois de janvier l'an de grace mil cccc. soixante et deux, et de nostre règne le deuxiesme.

Ainsi signé : Par le roy, les sires du Lau, de Beauvoir, de Bressure, le bailly de Sens et autres-presens. B. Meurin. — Visa.