MCCCXII

Charles, par la grace de Dieu roy de France. Savoir faisons à tous, presens et advenir, nous avoir receue l'umble suplicacion de Jehan Derveau, dit Chauvin, demourant à Monternoys, aagé de quarante cinq ans ou environ, contenant que, le xiiii^e jour de may mil cccc. cinquante huit, il fut au lieu du Breuil Barret, par le commandement de nostre amé Jacques Jousseaume, escuier, seigneur de la Geffardière, lequel lui avoit dit qu'il aloit audit lieu du Breuil Barret et que Mathurin Marot, substitut de nostre procureur en Poictou, lui avoit mandé se y trouver et qu'il avoit commission de prendre maistre Hector Rousseau. Et après qu'il y fut arrivé, vit devant ladicte maison dudit maistre Hector plusieurs personnes armez et embastonnez, à rencontre desquelz ledit Rousseau et ceulx qui estoient avec lui en ladicte maison tirèrent d'une coulevrine et plusieurs traictz d'arbaleste et gettèrent pierres à rencontre de ceulx qui ilec estoient venuz, pour prandre ledit maistre Hector. Et ledit supliant estant ilec avec les autres, vit ledit Jousseaume parler audit Rousseau par plusieurs foiz, et disoit à iceluy Rous- [p. 156] seau qu'il se rendist à nous ou à nostre seneschal de Poictou, et qu'il n'auroit point de mal, et yroit avec luy à Poictiers ou par devers nostredit seneschal. Auquel Jousseaume ledit maistre Hector Rousseau respondit en l'appelant vilain ladre, filz de putain et de cordelier, et disant teles paroles : « Fy du roy et de la royne et dudit seneschal. Avant que de me rendre, il mourra plus de cinquante hommes devant moi ». Et après, la femme dudit Rousseau sortit dudit hostel et vint parler audit Jousseaume et luy suplia et requist qu'il lui pleust se deporter et ne courist point sur audit Rousseau, son mary. A laquelle ledit Jousseaume respondit et dist que ledit Rousseau alast parler à luy, et que s'il se vouloit rendre, qu'il n'y auroit point de mal; et atant s'en retourna ladite femme audit hostel. Et pou après elle retourna audit Jousseaume, auquel elle dist qu'elle creoit que sondit mary avoit le diable bu corps et qu'il ne se rendroit point pour roy ne pour royne, ne pour ledit seneschal, et que incontinent qu'elle lui avoit parlé de soy rendre, qu'il l'avoit cuidé tuer et regnia Dieu que s'elle lui en parloit jamais, qu'il la tueroit. Et lors ledit Jousseaume luy dist qu'elle n'y retournast plus. Et tantost après ledit Hector Rousseau vint à la fenestre dudit hostel, qui estoit serrée, et adreça ses parolles audit Jousseaume, en lui disant : « Vilain ladre, es tu ycy venu pour prescher ?» et d'un voulge qu'il tenoit cuida frapper ledit Jousseaume qui s'estoit aprouché de ladicte fenestre, pour lui remonstrer qu'il se rendist. Et semblablement s'aproucha de ladicte fenestre nostre amé et feal Mathurin d'Appellevoisin, chevalier, et luy pria et requist qu'il se rendist et obeist à justice. Mais ledit Rousseau l'appela vilain ladre, filz de putain, comme il avoit fait ledit Jousseaume, et lui dist fy de lui et qu'il ne mourroit que de ses mains, et les seingneroit de la maistresse vayne du col, et d'une grant espée à deux mains qu'il avoit le frappa [p. 157] contre sa salade, et l'eust iceluy Rousseau [tué] ou fort blecié, comme il cuide, se n'eust esté sa salade. Et incontinent après, ledit d'Appelevoisin ala à la porte dudit hostel pour entrer dedens, et quant ledit Rousseau sentit ladite porte estre rompue, requist audit d'Apelevoisin qu'il alast parler à luy à seurté. Lequel y ala et y demoura ung grant quart d'eure ou environ, et ne scet ledit supliant qu'ilz dirent ensemble ne que ledit d'Appelevoisin fist, mais tantost après qu'il fut sorty, oyt qu'il dist audit Rousseau qu'il se gardast bien et qu'il ne sauroit tant faire qu'il ne feust prins prisonnier, avant que l'en partist d'ilec, puisqu'il ne se vouloit rendre. Lequel maistre Hector dist audit d'Appelevoisin teles parolles ou semblables : « Fy du roy, de la royne, du seneschal, de la senesclialle et des vilains tripiers de Poitiers et de Fontenay », et que autresfoiz il les avoit bien gouvernez et que si feroit il encores, et ne les craingnoit riens, et feussent ilz plus qu'ilz n'estoient. Et cependant les portes dudit hostel furent fermées, en manière qu'on n'y povoit entrer. Et ce fait, Guillaume Guerart, nostre sergent, qui illec estoit arrivé, fist commandement de par nous et nostredit seneschal audit Rousseau, qu'il se rendist, et qu'il avoit commission de le faire prandre et faire nostre prisonnier. Auquel maistre Hector dist fy de luy et de son commandement, en regniant Dieu, qu'il avoit autresfoiz cliauffé les vilains de Fontenay et que si feroit il encores. Et commancèrent luy et ceulx de sa compaignie à tirer d'arbalestes et geter pierres, en regniant Dieu qu'il tueroit tous ceulx qui estoient devant ladicte maison et les feroit mourir. Et pour ce fist nostredit sergent commandement ausdiz Jousseaume, d'Appelevoisin et autres qui ilec estoient qu'ilz se meissent en ordonnance en tour ledit hostel, afin que ledit Rousseau feust prins et garder qu'il ne saillist. Et environ souleil couchant, vit ledit supliant le feu qui sailloit par une des clieminées dudit hostel et sentoit fort comme à souffre et à pouldre [p. 158] de canon. Et quant on aperceut le feu, chacun cria audit maistre Hector qu'il se rendist et qu'il estoit en grant dangier de se brûler oudit hostel. Et quant le feu fut fort prins, ledit supliant vit iceluy Rousseau s'en yssir par dessus ledit hostel, tenant une grant espée, et ceulx qui estoient avec luy dedens ledit hostel, jusques au nombre de huit ou neuf, s'en partirent et se rendirent, ce que ne voult faire ledit Rouseau, mais regnia Dieu que jamais il ne se rendroit et gettoit des thieulles de ladicte maison à ceulx qui estoient devant ladicte maison. Et tantost après vit ledit maistre Hector Rousseau frappé d'un trait darbaleste, dont il cheut sur ladicte maison, en disant : « Ha ! tu m'as tué ! » et ne parla plus que ledit supliant oyst, dont il fut bien esbay. Et après monta ung homme sur ladicte maison pour descendre ledit Rousseau qui jà estoit mort. Et lors ung chacun se departy. A l'occasion duquel cas et pour raison d'icelui, informacion precedent, nostredit procureur en Poictou fist adjourner ledit supliant et lesdiz d'Apelevoisin, Marot, Martin et autres à comparoir par devant nostredit seneschal de Poitou ou son lieutenant à Poictiers, etc... 1 Donné à Razillé près Chinon, ou mois de may l'an de grace mil cccc. cinquante neuf, et de nostre règne le xxxvii^e.

Ainsi signé: Par le roy en son conseil. Rolant. — Visa. Contentor. Chaligaut.