MCCCL

Loys, par la grace de Dieu roy de France. Savoir faisons à tous, presens et avenir, nous avoir receue l'umble supplicacion de noz chiers et bien amez les maire et eschevins, conseillers et pers de nostre ville de Nyort, contenant comme de tout temps et d'ancienneté ilz aient acoustumé avoir corps, collège et communaulté en ladicte ville, du nombre de cent personnes, c'est assavoir de maire, douze eschevins et douze conseillers jurez et soixante quinze pers, ainsi que ont acoustumé d'avoir et ont eu par cy devant noz chiers et bien amez les habitans de noz villes de Poictiers et de la Rochelle, en noz pays de Poictou et de [p. 300] Xanctonge, du nombre desquelz eschevins soient à present noz chiers et bien amez Huguet Fouchier1 à present maire, Jehan Bastier, seigneur de Mormartin2, maistres Guillaume Laydet3, Pierre Laidet4 Jehan Yver5, Jehan [p. 301] Jau6, Jehan Laydet [..] jeune7, Pierre Taveau8, Jehan Laidet, Jehan Martin, Jehan Galemit9 lesquelz aient esté par cy devant maires de ladicte ville, en quoy ilz se soient [p. 302] employéz bien et grandement et tellement que ladicte ville et habitans en icelle ont tousjours depuis esté gouvernez et entretenuz par cy devant en bonne police et gouvernement, au bien de nous et de la chose publicque de ladicte ville ; savoir faisons que nous, les choses dessus dictes considerées et la très grant loyaulté et vraye obeissance, vouloir et affection que ont euz continuellement les dessus diz Huguet Fouchier, à present maire, Jehan Bastier, maistres Guillaume Laidet, Pierre Laidet, Jehan Yver, Jehan Jau, Jehan Laidet le jeune, Pierre Taveau, Jehan Laidet, Jehan Martin et Jehan Galemit, qui ont esté maires de ladicte ville, comme dit est, et sont de present du nombre desdiz douze eschevins, à nous et à la couronne de France, et pour les bons et grans services qu'ilz ont faiz par cy devant à noz predecesseurs et à nous ou temps passé, et que esperons que plus facent ou temps avenir, et pour consideracion du bon et grant gouvernement qui a acoustumé estre d'ancienneté en ladicte ville, et que esperons qui y sera ou temps avenir, pour avoir acoustumé de eslire à excercer lesdiz offices desdiz maire, eschevins et conseillers jurez des plus notables et bonnes personnes, dignes de grans vertuz et merites, afin que ce soit exemples aux autres habitans de ladicte ville, quant ilz verront les dessus diz estre essauciez, eslevez et perferez en honneur, preheminence et dignité, yceulx maire, eschevins et conseillers jurez de ladicte ville de Nyort et lesdiz Huguet Fouchier, à presant maire, Jehan Bastier, maistres Guillaume Laydet, Pierre Laidet, Jehan Yver, Jehan Jau, Jehan Laidet le jeune, Pierre Taveau, Jehan Laidet, Jehan Martin et Jehan Galemit, qui ont esté maires de ladicte ville et qui sont à present du nombre desdiz douze eschevins et douze conseillers, et tous ceulx qui ou temps à venir et perpetuelment en seront, avec toute leur lignée descendue, née et à naistre de loyal mariage, nonobstant que ilz ne soient ou n'ayent esté nez, extraictz et procréez de noble sang et lignage, de nostre certaine science, plaine[p. 303] puissance, auctorité royal et de nostre grace especial, avons anobliz et anoblissons par ces presentes ; et leur avons octroyé et octroyons, voulons et nous plaist que ilz soient tenuz et reputez dès maintenant et à tousjours maiz pour nobles, en jugement, en fait d'armes et ailleurs, en quelque lieu que ce soit, et que eulx et leurs enffans masles et leurdicte lignée masculine, procréez et à procréer ; puissent, toutes foiz qu'il leur plaira, estre aornez de l'ordre et estat de chevalerie, par quelque chevalier dudit ordre que bon leur semblera, et avec ce, que eulx et toute leur lignée, née et à naistre, et chacun d'eulx puissent acquerir et conquester par tout nostre royaume, et ceulx qu'ilz ont deja acquestez tenir, avoir et posseder à tousjours maiz, soient fiefz, arrière fiefz, terres, possessions, heritages, justices, seigneuries et quelconques autres choses nobles et de noble condicion, sans ce que pour ce ilz ne aucun d'eulx dudit nombre desdiz douze eschevins, maire et douze conseillers, soient jamaiz tenuz de paier aucune finance à nous ne à noz successeurs roys de France ; et laquelle finance, quelle et combien grande que elle soit et pourroit monter, nous, de nostre auctorité et puissance dessusdicte, l'avons quictée, remise et donnée, quictons, donnons et remettons, de nostre dicte grace, par la teneur de ces dictes presentes. Et avec ce, leur octroyons et voulons qu'ilz joyssent de tous privilèges, droiz, immunitez, franchises, coustumes, libertez, usaiges et de toutes autres choses, comme font et ont acoustumé et doivent faire chevaliers et escuiers et autres nobles dudit pays et de nostre dit royaume, et tout ainsi et par la forme et manière qu'il a esté autresfoiz octroyé par feu nostre très chier seigneur et ayeul, que Dieu absoille, ausdiz maire, eschevins et conseillers de nosdictes villes de Poictiers et de la Rochelle10. Si donnons [p. 304] en mandement, par ces dictes presentes, à noz amez et feaulx gens de noz comptes, au seneschal de Poictou et à tous noz autres justiciers, officiers et commissaires, par nous commis et à commettre, ou à leurs lieuxtenans et commis, presens et avenir, et à chascun d'eulx, si comme à lui appartiendra et qui requis en sera, que lesdiz maire, douze eschevins et douze conseillers jurez et les dessus nommez quia present sont, et tous leurs successeurs èsdiz offices, qui ou temps avenir seront, et leurdicte lignée, et chascun d'eulx, facent et laissent joir et user de nostre grace et octroy, sans leur faire ne souffrir estre fait au contraire aucun destourbier ou empeschement; lequel, se pour ce fait, mis ou donné leur avoit esté ou estoit, si le rappellent, ostent et remettent, ou facent rappeller, oster et mettre sans delay au premier estat et deu. Et pour ce que lesdiz maire, eschevins et conseillers jurez et les dessus nommez et leurs successeurs ne se pourroient bonnement aider de ces dictes presentes ne icelles monstrer, quant ilz voudroient ou mestier leur seroit, pour ce que elles touchent et pourroient toucher plusieurs personnes et leurs successeurs ou temps avenir, nous voulons et leur avons octroyé et octroyons que aux transcriptz ou vidimus d'icelles, faiz soubz seel royal, soit adjoustée plaine foy, et que ilz leur vaillent et prouffitent et leur soient de tel effect et valeur, comme ce present original. Et afin que ce soit chose ferme et estable à tousjours, nous avons fait mettre nostre seel à ces presentes. Sauf en autre chose nostre droit et l'autruy en toutes. Donné à Amboise, ou moys de novembre l'an de grace mil cccc. soixante et ung, et de nostre règne le premier11. [p. 305] Ainsi signé : Par le roy, les sires du Lau et de Baugy et autres presens. Le Prevost. —Visa. Contentor. Chaligaut.