MCCXCIX

Charles, par la grace de Dieu roy de France. Savoir [p. 98] faisons à tous, presens et avenir, nous avoir receue l'umble supplicacion de Richart Therry, cousturier, aagié de xix. ans ou environ, demeurant à Saint Maixent, contenant que ledit Richart, dès environ la feste des Roys derrenière passée jusques aujour du mardi gras, a besoigné de son mestier de cousturier en l'ostelde Guiot Paloton, cousturier, demourant audit lieu de Saint Maixent, en la compaignie de feu Jehan de Molieme, aussi cousturier ; lequel Richart et ledit Molieure (sic) souppèrent ensemble, le mardi vi^e jour de ce present mois de fevrier, en l'ostel dudit Guiot Paloton. Aussi y souppa ung jeune homme nommé Alixandre, qui autresfoiz fut varlet dudit Paloton. Et après qu'ilz eurent souppé, lesdiz Richart, Molieure et Alixandre se rendirent à l'ostel de Mougin Maignen, ouquel estoient Mathurin Gouraud, père de la femme dudit Mougin, ledit Mougin, sa femme, Perrette Gouraude, fille dudit Mathurin. Aussi se rendirent oudit hostel ung nommé Jehan de Caus, varlet de Vincent Maillé, cousturier, ung nommé Jehan, varlet de Sanson Vincent, barbier, ung nommé Pierre, varlet de Jehan Le Roux, cousturier, ung nommé Pierre, varlet de Guillaume de Panpelie, cousturier, Jehan de Celles, filz de Jehan de Celles, cousturier, ung jeune enfant, cousturier, nommé Chaigneau. Ouquel hostel dudit Mougin ledit Richart et les dessus nommez se rendirent, à la requeste dudit Alixandre. Et après ce qu'ilz eurent ung peu demouré oudit hostel dudit Mougin, les aucuns d'eulx changèrent de robes par manière d'esbat et yssirent dudit hostel dudit Mougin, et avec eulx estoit ung nommé François Gouraud, fils dudit Mathurin, qui sonnoit d'une reberbe, et alèrent dansant jusques à la maison de Marsault Chalaphin, cousturier en la rue Chaslon de ladite ville ; lequel Marsault, qui estoit couchié, se leva de son lit et leur fist très bonne chère ; et quant ilz eurent beu oudit hostel, ilz s'en alèrent dansant et en leur compaignie ledit Marsault jusques à l'ostel de Mery [p. 99] Dugué couslurier ; lequel Dugué n'estoit point en son hostel ; et ilz trouvèrent Jehan de Saint George, père de la femme dudit Dugué. Lesquelz de Saint Georges et ladicte femme dudit Dugué les firent boire oudit hostel, et quant ilz eurent beu, ilz s'en alèrent d'ilec dansant jusques à l'ostel de Vincent Maillé ; et s'en ala avec eulx ung nommé Rolland, varlet dudit Dugué1. Ouquel hostel ilz entrèrent ci trouvèrent ledit Vincent couchié en son lit ; et après ce qu'ilz eurent beu et dancé oudit hostel, ilz s'en alèrent en l'ostel de Jehan Merceron, aussi cousturier, lequel Merceron ilz trouvèrent aussi couchié, et le firent lever du lit et dancèrent et burent oudit hostel, et d'ilec s'en alèrent dansant au long de la grant rue Chaslon jusques au marchié. Et quant ilz furent devant la maison de Pierre Mynet, bourgois et esleu de ladicte ville2, ilz trouvèrent maistre Thibault Gracien3, Michau et Guillaume Cassez4 et plusieurs autres, et avec eulx ung nommé Bourguinion, lequel estoit crucifié et avoit ung trepié sur la teste. Et d'ilec ilz s'en alèrent à l'ostel de Ymbert Jousbaut, cousturier, demourant en la rue de la Croix de ladicte ville, et avec eulx s'estoient assemblez en ladicte rue Chaslon Jehan Joussaut, cousturier, Guillaume Ayraut, Guillaume Pampelye et ledit Ymbert Jousbaut, et semblablement estoit avec eulx Jehan Pasquier, gueysnier ; et quant ilz furent oudit hostel, ilz dansèrent en icelluy et beurent, et dudit hostel dudit Ymbert s'en alèrent à l'ostel de Jehan d'Azay, cousturier, et dudit hostel dudit d'Azay à l'ostel de Mathurin Gouraud, cousturier, et d'ilec s'en vindrent [p. 100] à l'ostel dudit Paloton, leur maistre, et d'ilec s'en alèrent à l'ostel de Guillaume Pampelye, près le marchié de ladicte ville, èsquelz hostelz ilz burent et dancèrent, comme ilz avoient fait ès autres lieux, et d'ilec s'en alèrent à la porte de Guillaume Ayraut, pour ce qu'il s'estoit amblé d'eulx et frappèrent à l'uys dudit hostel, mais ilz n'entrèrent point en icelluy. Et à ceste cause ilz chargèrent ilec une petite coulevrine que ledit Richart avoit ledit jour achattée et certaine quantité de pouldre de canon du xaintier de ladicte ville5 et dedens ladicte coulevrine misdrent du papier et ladicte coulevrine firent sonner et tirer par plusieurs foiz, tant en ladicte rue de la Croix que ilec devant l'uys dudit Ayraut, et tint plusieurs foiz ledit Molieme ladite coulevrine, pour icelle faire tirer. Et après ce que ledit Molieme eut chargié ladicte coulevrine de pouldre, et mis par dedens ung tapon de bois et du papier, ledit Richart voulut empescher que ledit Molieme ne tirast ladicte coulevrine, et luy dist qu'il alast achapter des pouldres, s'il là vouloit faire tirer, et luy voult ledit Richart bailler la broche qu'il avoit. Et à ceste occasion se meut parolles entre ledit Richart et ledit Molieme, et commencèrent à tanser de parolles, et à se appeller l'un l'autre paillart et s'entreprendre aux colletz de leurs prepoins ; et ainsi qu'ilz se tenoient l'un l'autre, ledit Alixandre se print à eulz pour les vouloir departir et frappa ledit Richart du poing sur la teste ; et lors ledit Richart dist audit Alixandre que, se il ne se ostoit d'ilec, qu'il le frapperoit. Et comme ledit Richart voulut tirer du fourreau une dague qu'il avoit, ledit Alixandre luy osta ladicte dague, et après qu'il luy eut ostée ladicte dague, ledit Alixandre le frappa deux ou trois coups du poing, en l'appellant paillart. Et ledit Molieme s'en aloit devant eulx, et [p. 101] après qu'ilz furent au droit de la maison de Laurens Paen, ledit Richart se print au corps dudit Molieme, et lors ledit Alixandre print ledit Richart et le gecta par terre, et cheurent lesdiz Alixandre et Molieme sur ledit Richard ; lequel Richard ledit Guillaume Pampelye leva de terre et le rusa6 à part dudit Alixandre et aussi dudit Molieme. Et quant ledit Richart fut levé de terre, luy estant eschauffé, jura par grans seremens (n'est recors du serement) que s'ilz ne se reculoient qu'il les frapperoit, et tira ung cousteau qu'il avoit ; et lors ledit Pasquier qui estoit en leur compaignie, comme dessus est dit, le print au colet de son pourpoint en luy demandant qu'il vouloit faire. Auquel Pasquier ledit Richart dist qu'il le laissast ester, ou autrement qu'il le blaisseroit ; et pour ce que ledit Pasquier ne le vouloit laisser, il se eschappa de luy à force, et après ce se tira et addreça audit Molieme en courant après luy, lequel il ataigny et aconsceut au droit de la maison des Poictevins7 ou ilec près, en ladicte ville de Saint Maixant, et le frappa ung seul coup dudit cousteau parmy l'aine, du cousté senestre ; et lors ledit Molieme cria : « Au meurtre ! je suis mort ! » Par le moien duquel coup, ledit Molieme ala le landemain de vie à trespassement. A l'occasion duquel cas ledit Richart a esté et est encores detenu prisonnier par justice et est en voye de y finer miserablement ses jours, se noz grace et misericorde ne luy sont sur ce imparties, humblement requerant que, attendu ce que dit est et mesmement que ledit cas est advenu par fortune et chaulde colle, et que paravant icelluy lesdiz Richart et Molieme estoient bien amis, etc. Pour quoy nous, etc., audit suppliant avons remis, quicté et pardonné, etc. Si donnôns en mandement, parces presentes, [p. 102] au seneschal de Poictou et à tous noz autres justiciers et officiers, etc. Donné à Montbason, ou mois de fevrier l'an de grace mil cccc. cinquante huit, et de nostre règne le xxxvii^e.

Ainsi signé : Par le roy, à la relacion du conseil. J. de Reilhac. — Visa. Contentor. J. Du Ban.