[p. 151]

DCCCCXXXIII

Rémission accordée à Guillaume Aalis, dit Monnier, et à Simonnet du Châtelier, pour un meurtre commis vingt-huit ans auparavant sur un ivrogne qui les avait attaqués, à condition qu’ils feront chanter chacun cent cinquante messes pour l’âme du défunt.

  • B AN JJ. 163, nos 62 et 63, fol. 29 v°
  • a P. Guérin, Archives historiques du Poitou, 26, p. 151-152
D'après a.

Charles, etc. Savoir faisons à tous, presens et avenir, nous avoir esté exposé de la partie de Guillaume Aalis, autrement dit Monnier, de l’aage de xlviii. ans ou environ, de la parroisse de Prissart ou pays de Poictou, povre laboureur, chargié de femme et de neuf enfans, disant que xxviii. ans a ou environ, le dit exposant et Symonnet du Chastellier se partirent du lieu du Chasteller pour aler au village du Ploz ou pays de Poitou, et trouverent en leur chemin, environ heure de jour faillant, Denis Guinaut, venant de Hiseret1, lequel Denis estoit un homme yvrongne et dissolu de boire, et ot le dit Denis paroles injurieuses avec les diz exposant et Symonnet et se print à eulx, et en eulx deffendant lui donnerent aucuns cops de bastons, desquelz, tant pour ce qu’il estoit si yvre qu’il ne se povoit soustenir, comme par sa mauvaise garde ou autrement, mort s’en ensuy en la personne du dit Denis Guinaut. Pour les quelles choses le dit exposant, doubtant rigueur de justice, combien que il en tous autres cas ait esté de bonne vie et renommée, n’oseroit jamaiz demourer seurement ou dit pays, se de lui n’avions pitié et compassion. Si nous a humblément supplié que sur ce lui vueillons impartir nostre grace. Pour quoy nous, ces choses considerées et le long temps qu’il a que le dit cas advint, etc., à icellui suppliant ou cas dessus dit avons quicté, remiz et pardonné, etc., parmi ce toutes voies qu’il sera tenu de faire chanter [p. 152] et celebrer cent et cinquante messes pour l’ame du dit Denis. Si donnons en mandement par ces presentes au bailli de Touraine et à tous noz autres justiciers, etc. Donné à Paris, ou moys d’octobre l’an de grace mil cccc. et huit, et de nostre regne le xxixe.

Par le roy, presens pluseurs des chambellans. Coste.

Semblable pour Symonnet du Chastelier et pareillement signée et donnée, scellée soubz le scel ordené en l’absence du grant.


1 Sic. Lisez « Luseret ».