MXVIII

Charles, par la grace de Dieu roy de France. A noz amez et feaulx les generaulx conseillers et commissaires par nous deputez sur le fait de la refformacion de noz monnoyes et autres abuz, et aussi des nouveaulx acquests, salut et dilection. Nous, à la requeste et contemplacion de noz bien amez les gens d’eglise et autres gens des trois estaz de nostre païs de Poictou, et pour certaines causes qui à ce nous meuvent, avons, par l’advis et deliberacion de nostre grant conseil, ordonné et ordonnons par ces presentes et par icelles vous mandons et enjoingnons estroictement, et à chascun de vous, que, icelles par vous veues, vous cessez du tout de proceder et besongner ou fait de la dicte reformacion, et vos dictes commissions en et par tout nostre dit païs de Poictou, sans ilecques ne autre part plus molester ou travailler, à celle cause, les dictes gens d’eglise ne autres noz subgiez d’icelui païs. Car ainsi nous plaist et le voulons estre fait. Si gardez, comment que soit, que ne faciez en aucune maniere le contraire. Et pour ce que besoing sera de soy aidier de ces presentes en pluseurs lieux, nous voulons au vidimus d’icelles estre [p. 429] par vous et autrement foy adjoustée comme à l’original. Donné à Mehun sur Evre, le derrenier jour d’avril l’an de grace mil cccc.xxvi, et de nostre regne le quatriesme1.

Ainsi signé : Par le roy, en son grant conseil, où la royne de Sicile2, vous, l’arcevesque de Thoulouse3, le mareschal de la Fayete4, les sires de Treves5 et de Giac et plusieurs autres estoient. J. Le Picart.

Collacio facta est cum originali.