DCCCCLXIV

Charles, etc. Savoir faisons à tous, presens et avenir, nous avoir receue l’umble supplicacion de nostre amé et feal chevalier, conseiller et chambellan, Jehan de Torsay1, chambellan aussi de nostre très chier et très amé oncle le duc de Berry, contenant comme certains debaz feussent [p. 243] meuz ou esperez à mouvoir entre le dit suppliant, d’une part, et les prieur et chappitre de Saincte Ragonde de Poictiers, d’autre part, pour raison du lieu et terre de la Lembertiere et de ses appartenances et appendences, assis en la chastellenie, seignorie et terre de Lezay en Poictou, sur lesquelz debaz les dictes parties ont parlé ou traictié [p. 244] ensemble que le dit lieu et terre de la Lembertiere sera et demourra dores en avant au dit chevalier et aux siens, parmi leur baillant à l’encontre d’icelui lieu et terre, par maniere d’eschange ou autrement, la disme de Naytré assise ou dit pays de Poictou, laquele peut bien valoir par an soixante livres ou environ, et ycelle faisant admortir, et [p. 245] nous humblement suppliant que, attendu que la dicte disme est tenue de pluseurs en fiefz et en arriere fiefz et que le dit lieu et terre de la Lambertiere, qui a esté en la main des diz prieur et chappitre par l’espace de lx. ans ou environ, retournera prophaine et en main seculiere, nous vueillions la dicte disme admortir. Et nous, inclinans à la [p. 246] dicte supplicacion, pour consideracion de ce que dit est et des bons et aggreables services que nous a faiz le dit Jehan et fait de jour en jour, et esperons qu’il face ou temps avenir, avons la dicte disme admortie et admortissons de nostre certaine science, plaine puissance et auctorité royal, et grace especial, par la teneur de ces presentes, voulans [p. 247] et octroyans que les diz prieur et chappitre, après ce que la dicte disme leur sera baillée et transportée, comme dit est, ayent, tiengnent et possident perpetuelment ycelle disme, dès lors en avant admortie et à Dieu dediée, sans ce qu’ilz soient, puissent ne doient estre contrains par nous et noz officiers, ne leurs successeurs et leurs officiers, de la mettre hors de leurs mains, ne pour ce paier à nous [p. 248] ne à noz successeurs, ores ne pour le temps avenir, aucune finance, pourveu toutes voies que premierement et avant toute euvre, ledit chevalier nous baillera et assignera realment et de fait terre ou rente assise soubz nous et en nostre terre et justice sans moien, jusques à la valeur de la tierce partie d’autant comme vault et peut valoir la dicte disme, pour adjoindre à nostre demaine, ou icelui nostre domaine deschargera d’autant comme la dicte tierce partie vault, ou paiera pour ce finance moderée pour acheter heritaiges, pour nous ou nostre dit demaine descharger, à l’ordonnance de noz amez et feaulx gens de noz comptes et tresoriers à Paris. Si donnons en mandement à nos diz gens de nos diz comptes et tresoriers à Paris, et à touz noz autres justiciers et officiers, presens et avenir, ou à leurs lieuxtenans, et à chascun d’eulz, si comme à lui appartendra, que de noz presens don, transport, admortissement, grace et octroy ilz facent, seuffrent et laissent le dit chevalier joir et user plainement, paisiblement et perpetuelment, sans le molester, travailler ou empeschier, ne souffrir estre molesté, travaillé ou empeschié, ores ne pour le temps avenir, en aucune maniere au contraire. Et afin que ce soit ferme chose et estable à tousjours, nous avons fait mettre nostre seel à ces presentes. Sauf en autres choses nostre droit et l’autruy en toutes. Donné à Paris, le x^me jour de mars l’an de grace mil cccc. et treize, et de nostre regne le xxxiiii^e2.

[p. 249] Par le roy, en son conseil, où le roy de Secile3, messeigneurs les ducz d’Orleans, de Bar4 et en Bavyere5, et autres estoient. N. Ferron.