DCCCCLXXX

Charles, etc. Savoir faisons à tous, presens et avenir, nous avoir receu l’umble supplicacion de nostre très chiere et amée cousine Brunissant de Pierregort, dame de [p. 294] Partenay1, fille de feu Archambaut conte de Pierregort et de [p. 295] Loyse de Mataz, sa femme2, contenant comme, depuis trois ans en ça ou environ, la dicte Loyse de Mataz soit alée de vie à trespassement, dame vestue et saisie des villes, chasteaulx et forteresses, terres et seignories de Royan, Mornac et autres belles terres et seignories à elle appartenant de son propre domaine et heritaige, delaissée nostre dicte cousine, sa fille ainsnée ; de la quele succession soit meu en nostre court de Parlement certain plait et procès en cas de saisine et de nouvelleté, entre nostre très chier et feal cousin le sire de Partenay3 et nostre dicte cousine, sa [p. 296] femme, à cause d’elle, demandeurs et complaignans, d’une part, et nostre amé et feal Regnault sire de Pons4, qui de fait tient et occupe la dicte succession, ou la plus grant partie d’icelle, defendeur et opposant, d’autre part. Et combien que aux tiltres et moiens dessus diz iceulx biens, terres et seignories, demourez du dit decès, competent et appartiennent de toute bonne equité à noz diz cousin et cousine, à cause d’elle, neantmoins nostre dicte cousine se doubte que, soubz umbre de la dicte confiscacion que nous avons pretendue à avoir et à nous appartenir des biens de Archambaut, derrenier conte de la dicte conté de Pierregort, frere de nostre dicte cousine, lequel est, si [p. 297] comme on dit, alé de vie à trespassement, ou autrement, nostre procureur general ou autres disans avoir don ou autre tiltre de nous, ne vueillent pretendre, en lieu du dit Archambaut, frere de nostre dicte cousine, avoir et demander aucun droit en la dicte succession, et en ce empescher nostre dicte cousine, qui seroit en son très grant prejudice, dommaige et desheritement de la dicte succession qui lui doit appartenir de droit naturel, se par nous ne lui estoit sur ce pourveu de nostre gracieux et convenable remede, si comme elle dit, requerant humblement icelui. Pour quoy nous, inclinans à la dicte supplicacion, pour consideracion des choses dessus dictes et que nostre dicte cousine, laquelle a tousjours obey à nous et à tous noz mandemens, comme nostre vraye et loyale subgecte, ne tient aucuns des biens de son dit feu pere et n’a de present aucunes terres dont elle puisse soustenir son estat, si non par le moien de nostre dit cousin, son mary, qui est [p. 298] chose piteable, attendu la noble lignée dont elle est descendue, et pour certaines causes et consideracions qui à ce nous ont meu et meuvent, à icelle nostre cousine, de nostre grace especial, avons donné et delaissié, donnons et delaissons par ces presentes à tousjours tout tel droit, action et poursuite que à cause et occasion de la dicte confiscation du dit Archambaut, son frere, ou autrement, nous peut ou doit, pourroit ou devroit competer et appartenir ès diz biens, terres et seignories, villes, chasteaulx et forteresses demourez du dit decès de la dicte Loyse de Mataz, sa mere, pour en joir par elle et ses ayans cause à tousjours mais perpetuelement, comme de leur propre chose ; et sur ce imposons silence perpetuel à nostre dit procureur, à noz receveurs et à tous noz autres officiers, à qui il appartendra, presens et avenir. Si donnons en mandement à noz amez et feaulx conseillers les gens tenans nostre dit Parlement, les gens de noz comptes et tresoriers à Paris, etc. Donné à Paris, le xiii^e jour de may l’an de grace mil cccc. et seize, et de nostre regne le xxxvi^e.

Par le roy en son conseil, le roy de Secile, le connestable5, le chancellier de la royne6, Jehan Picquet7 et autres presens, etc. J. de Villebresme.