MXXXVI

Karolus, Dei gratia Francorum rex. Notum facimus universis, presentibus pariter et futuris, nos vidisse litteras carissimorum progenitorum nostrorum Philipi et Ludovici, inclite memorie regum Francie, majoribus, burgensibus et communie ville de Nyorto in comitatu nostro Pictavie concessas, tenorum subsequentium :

In nomine sancte et individue Trinitatis, amen. Philippus, Dei gratia Francorum rex. Noverint universi, presentes pariter et futuri, quod nos concedimus burgensibus nostris de Nyorto, in eadem villa commorantibus, ut communiam suam habeant ad puncta et consuetudines communie Rothomagensis, que continentur in registro nostro. Quod ut perpetuum robur obtineat, sigilli nostri auctoritate et regii nominis karactere inferius annotato presentem paginam, salvo jure nostro et ecclesiarum nostrarum, confirmamus. Actum Pictavis, anno incarnati Verbi millesimo ducentesimo quarto, regni nostri vicesimo quinto. Astantibus in palacio nostro quorum nomina supposita sunt et signa. Dapifero nullo. S. Guidonis, buticularii. S. Mathei, camerarii. S. Droconis, constabularii. Data vacante cancellaria, per manum fratris Garini.

Ludovicus, Dei gratia, etc. Actum apud Sanctum Maxentium, anno Domini m. cc. tricesimo, mense julii1.

Quas quidem litteras superius insertas et inscriptas et omnia et singula in eis contenta, ratas et gratas, rataque [p. 59] et grata habentes, ipsas et ipsa laudamus et approbamus, auctoritate nostra regia et plena potestate confirmamus per presentes, si et in quantum majores, burgenses et habitatores de Niorto privilegiis, franchisiis et libertatibus, de quibus in predictis litteris fit mentio, hactenus debite usi sunt ; harum tenore presentium mandantes senescallo Pictavensi ceterisque justiciariis et officiariis nostris, presentibus et futuris, aut eorum locatenentibus, quathinus majores, burgenses et communiam dicte ville Niorti nostris presentibus approbacione, ratifficacione, confirmacione et gracia uti et gaudere faciant et paciantur, nullam molestiam sibi in contrarium inferentes. Salvo tamen in aliis jure nostro et in omnibus quolibet alieno. Quod ut stabile sit et perseveret, hiis presentibus nostrum sigillum in absencia magni ordinatum duximus apponendum. Datum Turonis, die vicesima prima mensis augusti anno Domini millesimo cccc. tricesimo quarto, regni nostri duodecimo2.

Sic signatum : Per regem, episcopo Magalonensi, domino de Treviis et aliis presentibus. J. Gilier. — Visa. Contentor. Chaligaut.